ಹರಿದ್ವಾರ: ಆರ್ಥಿಕ ಶಕ್ತಿಕಯೀ ಆಧ್ಯಾತ್ಮಾಚಿ ಶಕ್ತಿ ಚಡ ಶ್ರೇಷ್ಠ. ಆಸ್ತಿ ಜೋಡಚಾಕಯೀ ತ್ಯಾಗ ಮಹತ್ವಾಚೆ° ಆಸಾ. ಸೂಪರ್ ಪವರಾಕಯೀ ವಿಶ್ವಗುರುಕ ಚಡ ಗೌರವ ಆಸಾ ಮ್ಹಣು ಸಾಂಸದ ಡಾ. ಸುಧಾಂಶು ತ್ರಿವೇದಿ ಹಾಂನಿ° ಸಾಂಗಲಾ°. ಉತ್ತರಾಖಂಡಾಚೆ ಹರಿದ್ವಾರಾಂತು° ವಿಶ್ವ ಸಾರಸ್ವತ್ ಫೇಡರೇಶನ್ ಹಾಂನಿ° ಆಯೋಜನ ಕೆಲೆಲೆ ದೋನ ದೀವಸಾಚೆ ವಿಶ್ವ ಸಾರಸ್ವತ ಸಮ್ಮೇಳನಾತು° ಬೀಜಭಾಷಣ ದೀವನು ತಾಂನಿ° ಆಶಿ° ಸಾಂಗಲೆ°. ಕಾಶೀಮಠಾಧೀಶ ಶ್ರೀಮದ್ ಸಂಯಮೀοದ್ರ ತೀರ್ಥ ಸ್ವಾಮೀಜಿ ಆನಿ ಚಿತ್ರಾಪುರ ಮಠಾಧೀಶ ಸದ್ಯೋಜಾತ ಶಂಕರಾಶ್ರಮ ಸ್ವಾಮೀಜಿ ಹಾಂನಿ° ದಿವೊ ಲಾವನು ಸಮ್ಮೇಳನಾಚೆ ಉಗ್ತಾವನ ಕೆಲೆಂ. ಉದ್ಯಮಿ ಪ್ರಕಾಶ್ ಪೈ, ಮೇಜರ್ ಗಗನ್ ದೀಪ್ ಭಕ್ಷಿ, ನಾವದಿಕ ಗಾಯಿಕಾ ಸುಮನ್ ಕಲ್ಯಾಣಪುರ್ ವಿಶ್ವ ಸಾರಸ್ವತ್ ಸಮ್ಮಾನ್ ಪುರಸ್ಕಾರ ಫಾವೊ ಜಾಲೊ. ಕಲಾಕಾರ ವಿಲಾಸ್ ನಾಯಕ್ ಹಾಂಕಾ° ಸಾರಸ್ವತ್ ಯೂಥ್ ಐಕಾನ್ ಪ್ರಶಸ್ತಿ ಪ್ರಾಪ್ತ ಜಾಲಿ. ಉತ್ತರ ಪ್ರದೇಶ ಸರಕಾರಾಚೊ ಪ್ರಧಾನ ಕಾರ್ಯದರ್ಶಿ ನಿತಿನ್ ಗೋಕರ್ಣ ಹಾಂನಿ° ಸಾರಸ್ವತ ಪರಂಪರಾ ಜಾಗೋರ ಕೆಲಿ. ಸಾರಸ್ವತ ಸಮಾಜಾಚೆ ಫುಡಾರಿ ವೇದಿಕೆರಿ ಉಪಸ್ಥಿತ ಆಶಿಲೆ. ಕರ್ನಾಟಕ, ಮಹಾರಾಷ್ಟ್ರ, ದೆಹಲಿ ಆನೀ ದೇಶಾಚೆ ವೆಗವೆಗಳೆ ರಾಜ್ಯಾಚೆ ಸಾಬಾರ ಲೋಕ ಉಪಸ್ಥಿತ ಆಶೀಲೆ.

ದಾವಣಗೆರೆ: ಹಾಂಗಾಚೆ ಜಯದೇವ ವೃತ್ತಾಂತ ಆಸಚೆ ಶ್ರೀನದ್ ಜಗದ್ಗುರು ಕೂಡಲೀ ಶೃಂಗೇರಿ ಮಠಾಚೆ ದಾವಣಗೆರೆಂತು ಆರತಾ° ಮಹಾಶಿವರಾತ್ರಿ ಮಹೊತ್ಸವು ಶಾಸ್ತ್ರೋಕ್ತ ಜಾವನು ವಿವಿಧ ಧಾರ್ಮಿಕ ವಿಧಿ ವಿಧಾನ, ಆಧ್ಯಾತ್ಮ ಪರಂಪರೆಚೆ ರುದ್ರಾಭಿಷೇಕ, ಅರ್ಚನಾ ರುದ್ರಹೋಮ, ಫೆ. 18 ಸಾಂಜವೇಳ ದಾಕೂನ ಫೆ. 19 ದೋನಪಾರ ತಾಂಯ ನಿರಂತರ ಮಹಾನ್ಯಾಸ ಪೂರ್ವಕ ಪಂಚಾಮೃತ ಸಹಿತ ಶತರುದ್ರಾಭಿಷೇಕ ಜಾಗರಣ ಕರನು ಅಸಂಖ್ಯಾತ ಸಾರ್ವಜನಿಕ ಭಕ್ತಾಲೆ ಸಹಕಾರ ಆನಿ ಸಹಯೋಗಾನ ಚಲೆ°. ದಾವಣಗೆರೆ ಜಿಲ್ಲಾ ಪುರೋಹಿತ ಸಂಘಾಚೊ ಅಧ್ಯಕ್ಷ ಶ್ರೀಮಠಾಚೊ ಮುಖ್ಯಸ್ಥ ವೇದಮೂರ್ತಿ ಪವನ್ ಭಟ್ ಹಾಂಗೆಲೆ ಮುಖೇಲಪಣಾರಿ ಸೋಂದಾ ಸ್ವರ್ಣವಲ್ಲಿ ಸಂಸ್ಥಾನಾಚೆ ಪುರೋಹಿತ ಸಹಿತ ಗಣೇಶ್ ಭಟ್, ಅಜೇಯ ಭಟ್, ಕೃಷ್ಣ ಭಟ್, ಶ್ರೀಪಾದ ದೇಶಪಾಂಡೆ, ಅನಂತ ಭಟ್, ಗಿರೀಶ್ ಭಟ್, ಅಶೋಕ್ ದಿಕ್ಷೀತ್ ಮ್ಹಾಲ್ಗಡೆ ಪುರೋಹಿತ ಜಯತೀರ್ಥಾಚಾರ್, ಆನಂದತೀರ್ಥಾಚಾರ್, ದಾವಣಗೆರೆಚೆ ಶ್ರೀ ಗಾಯತ್ರಿ ಪರಿವಾರಾಚೆ ಪ್ರಧಾನ ಕಾರ್ಯದರ್ಶಿ ಸಾಲಿಗ್ರಾಮ ಗಣೇಶ್ ಶೆಣೈ ಆನಿ ಹೇರ ಉಪಸ್ಥಿತ ಆಶಿಲೆ.