ಮಂಗಳೂರು: ಕರ್ನಾಟಕ ಸರ್ಕಾರಾಚೆ ಕುವೆಂಪು ಭಾಷಾ ಭಾರತಿ ಪ್ರಾಧಿಕಾರಾನ ಪ್ರಕಟ ಕೆಲೆಲೆ ಕನ್ನಡಾಚೊ ಶ್ರೇಷ್ಠ ಕವಿ ಡಿವಿಜಿಲೆ ಮಂಕುತಿಮ್ಮನ ಕಗ್ಗ ಪ್ರೊ. ಸ್ಟೀವನ್ ಕ್ವಾಡ್ರಸ್ ಪೆರ್ಮುದೆನ ಕೊಂಕಣಿಕ ಭಾಶಾಂತರ ಕರನು ಸಂರಚಿತ ಕೆಲೆಲಿ ಕೃತಿ ‘ಮಂಕುತಿಮ್ಮಾಚೆ° ಕಾವ್ಯೆ°’ ಪುಸ್ತಕಾಚೆ ಲೊಕಾರ್ಪಣ್ ಮೂಡ್‍ಬಿದ್ರಿ ಕೋರ್ಪುಸ್ ಕ್ರಿಸ್ತಿ ಫಿರ್ಗಜೆಚೊ ವಿಗಾರ್ ಬಾಪ್ ಒನಿಲ್ ಡಿಸೋಜಾ ಹಾಂನಿ° ಕೆಲೆ°. ಕಾರ್ಯಾಂತ್ ಸಂತ ಎಲೋಶಿಯೆಸ್ ಕಾಲೆಜಾಚೊ ರಿಜಿಸ್ಟ್ರಾರ್ ಡಾ. ಆಲ್ವಿನ್ ಡೆ’ಸಾನ ಪುಸ್ತಕಾಚಿ ವಳಕ ಕರನು ದಿಲಿ. ಮಂಕುತಿಮ್ಮನ ಕಗ್ಗ ಕಾವ್ಯಾಂತು° ಡಿವಿಜಿನ ಸಾದ್ಯಾ ಲೊಕಾಂಚೊ ಅನುಭವ ಆನಿ ಅನುಭಾವ ಪ್ರಸ್ತುತ ಕರಚೆ° ಪ್ರಯತ್ನ ಕೆಲಾ° ಮ್ಹಣು ತಾಂನಿ° ಸಾಂಗಲೆ°.

ಕುವೆಂಪು ಭಾಷಾ ಭಾರತಿ ಪ್ರಾಧಿಕಾರಾಚೊ ಅಧ್ಯಕ್ಷ ಡಾ. ಗಿರೀಶ್ ಭಟ್ ಅಜಕ್ಕಳ ಮುಕೆಲ ಸೊಯರೊ ಆಶಿಲೊ. ತಾಣೆ ಪ್ರಾಧಿಕಾರಾಚೆ ಯೋಜನಾಂಚೊ ಆನಿ ದ್ಯೇಯೋದ್ದೇಶಾಂಚಿ ವಳಕ ಕರನು ದಿಲಿ. ಕಾಲೇಜಾಚೊ ಪ್ರಾಂಶುಪಾಲ ಬಾಪ್ ಡಾ. ಪ್ರವೀಣ್ ಮಾರ್ಟಿಸ್ ಸುವಾಳ್ಯಾಚೆ ಅಧ್ಯಕ್ಷ ಆಶಿಲೆ. ಇಂಗ್ಲಿಷ್ ಉಪನ್ಯಾಸಕಿ ಸೆವ್ರಿನ್ ಪಿಂಟೊನ ಸ್ವಾಗತಾಚೆ ಉತ್ರ° ಸಾಂಗಲಿ°. ಪ್ರೊ. ಸ್ಟೀವನ್ ಕ್ವಾಡ್ರಸ್ ಪೆರ್ಮುದೆನ ಆಬಾರ ಮಾನಲೊ. ವಿದ್ಯಾರ್ಥಿ ರಾಹುಲ್ ನೊರೊನ್ಹಾನ ಸೂತ್ರ ಸಂಚಾಲನ ಕೆಲೆ°.

ಬಜಪೆ: ನಿವೃತ್ತ ಪಿ. ಡಬ್ಲು. ಡಿ. ಅಧಿಕಾರಿ ಆನೀ ಸಮಾಜ ಸೇವಕ ಕಕ್ವ ರಾಘವ ಕಾಮತ ಹಾಂನಿ° ನಿವೃತ್ತ ಬಿ. ಎಸ್. ಎನ್. ಎಲ್ ಉದ್ಯೋಗಿ ವಸುಧಾ ಹಾಂಕಾ° ಲಗ್ನ ಜಾವನು ಪನ್ನಾಸ ವರಸಂ ಜಾಲೆಲೆ ಸುವೇಳಾರಿ ಬಂಧುಮಿತ್ರಾಲೆ° ಸಾಂಗತ ಸಂತೋಸ ವಾಂಟೂನ ಘೆವಚೆ ನದರೇನ ಆಜಿ (ಮೆ.22) ಸತ್ಯನಾರಾಯಣ ಪೂಜಾ ಆಯೋಜನ ಕೆಲಿ.
ರಾಘವ ಕಾಮತ ಹಾಂನಿ° ಸರಕಾರಿ ಉದ್ಯೊಗಾಂತು° ಆಸಚೆ ವೇಳಾರ ದಾಕೂನ ಸಮಾಜ ಸೇವೆಂತೂಯಿ ಮುಕಾರ ಆಶಿಲೆ. ಮಾತೃಭಾಸ ಕೊಂಕಣಿ ಬದಲ ವಿಶೇಷ ಕಾಳಜಿ ಆಶಿಲೆ ಹಾಂನಿ° ಕೊಡಿಯಾಲಚೆ ಕೊಂಕಣಿ ಸಾಂಸ್ಕ್ರತಿಕ  ಸಂಘಾಚೆ ಅಧ್ಯಕ್ಷ ಜಾವನು ಖೂಬ ಕಾರ್ಯಕ್ರಮ ಆಯೋಜನ ಕೆಲೆಲೆ ಆಸಾ.
ಜ. 1 1947ಕ ಜಲ್ಮಾಕ ಆಯಿಲೆ ಹಾಂನಿ° ಮುಲ್ಕಿ ವಿಜಯಾ ಕಾಲೇಜಾಂತು° ಬ್ಯಾಚುಲರ್ ಆಫ್ ಆರ್ಟ್ಸ್ ಪದವಿ ಫಾವೊ ಕೆಲಿ. 36 ವರಸ° ಸರಕಾರಿ ಸೇವಾ ದಿಲೆಲೆ ಹಾಂಕಾ° ತೇಗ ಲೋಕ ಚೆರಡುವ°. ದೋನ ಚೆಲಿಯೊ ಆನಿ ಏಕ ಚೆಲೊ. ಸಮಾಜ ಸೇವಾ ನಂತಾ° ದಾನಧರ್ಮಾಂತೂಯಿ ಮುಕಾರ ಆಸಚೆ ಹಾಂನಿ° ಶಿಖಿಲೆ ಶಿಕ್ಷಣ ಸಂಸ್ಥೆಕ ದಿಲೆಲೆ ದೇಣಿಗಾ ಮಾನೂನ ಗೆವನು 1967 ಇಸವಿಂತು° ಸ್ವತ: ಡಾ| ಟಿ. ಎಂ. ಎ. ಪೈ ಹಾಂನಿ° ಸನ್ಮಾನ ಕೆಲೆಲೊ ಆಸಾ.
ಆಲ್ ಕರ್ನಾಟಕ ಸ್ಟೇಟ್ ಗವರ್ನಮೆಂಟ್ ಎಂಪ್ಲಾಯಿಸ್ ಅಸೋಸಿಯೇಶನ್ಸ್ ಫೆಡರೇಶನ್ ಹಾಜೆ ಉಪಾಧ್ಯಕ್ಷ, ಬಜಪೆ ಸಿಟಿಜನ್ಸ್ ಕ್ಲಬ್ ಹಾಜೊ ಉಪಾಧ್ಯಕ್ಷ, ಕನ್ನಡ ಸಾಹಿತ್ಯ ಪರಿಷತಾಚೊ ಅಜೀವ ಸಾಂದೊ, ಕೊಂಕಣಿ ಭಾಷಾ ಮಂಡಳ ಕರ್ನಾಟಕ ಹಾಜೊ ಸಾಂದೊ, ವಿಶ್ವ ಕೊಂಕಣಿ ಕೇಂದ್ರಾಚೊ ಸಾಂದೊ, ಸಿನಿಯರ್ ಸಿಟಿಜನ್ಸ್ ಸರ್ವಿಸ್ ಕ್ಲಬ್ ಹಾಜೊ ಸಾಂದೊ ಜಾವನು ಹಾಂನಿ° ಖೂಬ ಸೇವಾ ದಿಲೆಲಿ ಆಸಾ.

ಆಯಚೆ ಸುವಾಳ್ಯಾಂತು° ದ್ಹುವ ಸುಪ್ರಿಯಾ ಪೈ, ಜಾಂವಯಿ ಎಂ. ಶಾಂತರಾಮ ಪೈ, ನಾತ್ತು ಪ್ರಥಮೇಶ ಪೈ, ದ್ಹುವ ಪ್ರತಿಭಾ ಪಿ. ಶೆಣೈ, ಜಾಂವಯಿ ಪ್ರಕಾಶ ಟಿ. ಶೆಣೈ, ನಾತ್ತು ಪ್ರತೀಕ ಶೆಣೈ, ಪೂತು ಗಣೇಶ ಆರ್. ಕಾಮತ, ಸೂನ ಪ್ರಥ್ವಿ ಜಿ. ಕಾಮತ, ನಾತ್ತು ರೆಯಾಂಶ್ ಕಾಮತ ಆನಿ ಬಂಧುಮಿತ್ರ° ಉಪಸ್ಥಿತ ಆಸೂನ ಶುಭಾಷಯ ಪಾಟಯಲೊ.

ಮಂಗಳೂರು: ರಾಷ್ಟ್ರೀಯ ಶಿಕ್ಷಣ ನೀತಿ20 ಹಾಜೆ ಪ್ರಮಾಣೆ ಮಾತೃಭಾಶೆಂತು° ಶಿಕ್ಷಣ ಅನುಷ್ಠಾನ ಕರಚೆ ನದರೇನ ಕರ್ನಾಟಕಾಚೆ ಇಲಾಖಾವತಿನ ಚಾಲನೆರಿ ಆಸಚೆ ಕೆ.ಜಿ. ದಾಕೂನ 5ವೆ° ಕಕ್ಷಾಚೆ ಪಠ್ಯ ಪುಸ್ತಕ° ಕೊಂಕಣಿ ಭಾಶೆಕ ಅಣಕಾರ ಕರಚಾಕ ಅನುದಾನ ಆನೀ ಸೌಲಭ್ಯ ದಿವಕಾ ಮ್ಹಳೆಲಿ ಮಾಘಣಿ ರಾಜ್ಯ ಸರಕಾರಾಚೆ ಪ್ರಾಥಮಿಕ ಆನಿ ಪ್ರೌಢ ಶಿಕ್ಷಣ ಮಂತ್ರಿ ಬಿ. ಸಿ. ನಾಗೇಶ ಹಾಂಕಾ° ಕೊಂಕಣಿ ಶಿಕ್ಷಣ ಸಂಸ್ಥೆಂಚೊ ಸಂಘ ಹಾಜೊ ಅಧ್ಯಕ್ಷ ಪ್ರೊ. ಡಾ. ಕಸ್ತೂರಿ ಮೋಹನ ಪೈ, ವಿಶ್ವನಾಥ ಭ್ಹಟ್ಟ ಆನಿ ವಿಜಯಚಂದ್ರ ಕಾಮತ ಹಾಂಗೆಲೆ ಮುಖೇಲೆಪಣಾರಿ ಪುತ್ತೂರಾಂತು° ದಿವಚೆ° ಜಾಲೆ°.
ಪುತ್ತೂರು ಶಾಸಕ ಸಂಜೀವ ಮಠಂದೂರು ಉಪಸ್ಥಿತ ಆಶಿಲೆ.

ಮಂಗಳೂರು: 2022 ವರಸಾಚೆ ಎಸ್. ಎಸ್. ಎಲ್. ಸಿ ಪರೀಕ್ಷೆಂತು° ಕರ್ನಾಟಕಾಚೆ 145 ವಿದ್ಯಾರ್ಥಿಯಾನಿ 625/625 ಅಂಕ ಜೊಡಲ್ಯಾರಿ ದಕ್ಷಿಣಕನ್ನಡ ಜಿಲ್ಲೆಚೆ 17 ವಿದ್ಯಾರ್ಥಿಯಾನಿ 625/625 ಅಂಕ ಜೊಡುನ ಜಿಲ್ಲೆಚೆ ಭರಮ ವಾಡಯಲ್ಯಾ. 1. ರೋಶನ್, 2. ಸಾತ್ವಿಕ್ ಹೆಚ್. ಎಸ್., 3. ಸುಜಯ್ ಬಿ., 4. ಇಂದಿರಾ ಅರುಣ್ ನ್ಯಾಮಗೌದರ್, 5. ಇರಯ್ಯ ಶ್ರೀಶೈಲಾ ಶೆಗುನಸಿಮತ್, 6. ಕಲ್ಮೇಶ್ವರ್ ಪುಂಡಲೀಕ್ ನಾೈಕ್, 7. ಶ್ರೇಯಾ ಆರ್. ಶೆಟ್ಟಿ, 8. ಸುದೇಶ್ ದತ್ತಾತ್ರೇಯ ಕಿಲ್ಲೇದರ್, 9. ಅಭಯ್ ಶರ್ಮಾ ಕೆ. 10. ಅಭಿಜ್ಞಾ ಆರ್., 11. ಅತ್ಮೀಯ ಎಂ. ಕಶ್ಯಪ್, 12. ಧನ್ಯಶ್ರೀ, 13. ಮಧುಶ್ರೀ, 14. ಶ್ರೀಜಾ ಹೆಬ್ಬಾರ್, 15. ಸ್ವಾತಿ, 16. ವಿ. ಅಕ್ಷತಾ ಕಾಮತ್, 17. ವೀಕ್ಷಾ ವಿ. ಶೆಟ್ಟಿ. ಹಾಂನಿಂ ದಕ್ಷಿಣ ಕನ್ನಡಾಚೆ ವಿದ್ಯಾರ್ಥಿ ಜಾವನು ಆಸಾತಿ. ಎಸ್.ಎಸ್.ಎಲ್.ಸಿ ಪರೀಕ್ಷೆಂತು° ಅವ್ವಲ್ ಸಾಧನಾ ಕೆಲೆಲೆ ಸಗಟ ವಿದ್ಯಾರ್ಥಿಯಾಂಕ ಕೊಡಿಯಾಲಚೆ ವಿಕಾಸ್ ಪದವಿ ಪೂರ್ವ ಕಾಲೇಜಾಚೆ ಆಡಳಿತ ಮಂಡಳಿನ ಉಜ್ವಲ ಭವಿಷ್ಯ ಆಶೆಯಲಾ°.

ದಾವಣಗೆರೆ - ದಾವಣಗೆರೆಚೆ ಶ್ರೀಮತಿ ಸರಸ್ವತಿ ದಾಸಪ್ಪ ಶೆಣೈ ಪ್ರತಿಷ್ಠಾನಾಚಾನಿ ಹರ ವರಸ ದಿವಚೆ ಮ್ಹಣಕೆ ಹ್ಯಾ 2021-22 ವರಸಾಂತ ಎಸ್. ಎಸ್. ಎಲ್. ಸಿ. ಸಾರ್ವಜನಿಕ ಶಿಕ್ಷಣ ಇಲಾಖೆಚೆ ಪರೀಕ್ಷೆಂತು° 625 ಕ 600 ಕಯೀ ಚಡ ಅಂಕ ಜೋಡಿಲೆ ವಿದ್ಯಾರ್ಥಿಯಾಂಕ ರಾಜ್ಯ ಸ್ಥರಾರಿ “ಸರಸ್ವತಿ ಪುರಸ್ಕಾರ” ರಾಜ್ಯ ಪ್ರಶಸ್ತಿ ದೀವನು ಗೌರವಾರ್ಪಣ ಕರತಾತಿ ಮ್ಹಣು ಪ್ರತಿಷ್ಠಾನಾಚೊ ಸಂಸ್ಥಾಪಕ ಸಾಲಿಗ್ರಾಮ ಗಣೇಶ್ ಶೆಣೈ ಹಾಂನಿ° ಕಳಯಲಾ°. ವಿಂಚೂನ ಆಯಿಲೆ ವಿದ್ಯಾರ್ಥಿಯಾಂಕ ನಾವಾದೀಕ ಮ್ಹಾಲ್ಗಡೆ ಸಾಹಿತ್ಯ, ಸಂಗೀತ ಪಂಡಿತ ಲೋಕಾಲೆ ಸಮ್ಮುಖಾರಿ ಸನ್ಮಾನ ಕರತಾತಿ ಮ್ಹಣು ಪ್ರತಿಷ್ಠಾನಾಚೊ ಅಧ್ಯಕ್ಷ ಡಾ. ನಾಗೇಶ್ ಕಿಣಿ ಹಾಂನಿಂ ಕಳಯಲಾಂ. ಉಮೇದಿ ಆಶಿಲ್ಯಾನಿ ಎಸ್.ಎಸ್.ಎಲ್.ಸಿ. ಪರೀಕ್ಷೆಚಿ ಅಂಕ ಪಟ್ಟಿಚೆ ಜೆರಾಕ್ಸ್ ಪ್ರತಿ ಬರೆ° ತಸ್ವೀರಾಚೆ ಸಾಂಗತ ಸಕಳ ದಿಲೆಲೆ ಪತ್ತೆಕ 25-06-2022 ಭಿತರಿ ದಾಡೂನ ದಿವಕಾ ಮ್ಹಣು ಕಾರ್ಯದರ್ಶಿ ಸಾಲಿಗ್ರಾಮ ಶ್ರೀಪತಿ ರಾಘವೇಂದ್ರ ಶೆಣೈ ಹಾಂನಿ° ಕಳಯಲಾ°.
ಪತ್ತೋ: ಜ್ಯೋತಿ ಗಣೇಶ್ ಶೆಣೈ ಗೌರವಾಧ್ಯಕ್ಷಾ, ಶ್ರೀಮತಿ ಸರಸ್ವತಿ ದಾಸಪ್ಪ ಶೆಣೈ ಪ್ರತಿಷ್ಠಾನ `ಶೆಣೈಮನೆ’, ಕಾವೇರಿ ಅಪಾರ್ಟ್‍ಮೆಂಟ್, ಕುಂದುವಾಡ ರಸ್ತೆ, ಮಹಾಲಕ್ಷ್ಮೀ ಬಡಾವಣೆ, ದಾವಣಗೆರೆ - 577006. 9538732777.