ದಾವಣಗೆರೆ: ಹಾಂಗಾಚೆ ಜಯದೇವ ವೃತ್ತಾಂತ ಆಸಚೆ ಶ್ರೀನದ್ ಜಗದ್ಗುರು ಕೂಡಲೀ ಶೃಂಗೇರಿ ಮಠಾಚೆ ದಾವಣಗೆರೆಂತು ಆರತಾ° ಮಹಾಶಿವರಾತ್ರಿ ಮಹೊತ್ಸವು ಶಾಸ್ತ್ರೋಕ್ತ ಜಾವನು ವಿವಿಧ ಧಾರ್ಮಿಕ ವಿಧಿ ವಿಧಾನ, ಆಧ್ಯಾತ್ಮ ಪರಂಪರೆಚೆ ರುದ್ರಾಭಿಷೇಕ, ಅರ್ಚನಾ ರುದ್ರಹೋಮ, ಫೆ. 18 ಸಾಂಜವೇಳ ದಾಕೂನ ಫೆ. 19 ದೋನಪಾರ ತಾಂಯ ನಿರಂತರ ಮಹಾನ್ಯಾಸ ಪೂರ್ವಕ ಪಂಚಾಮೃತ ಸಹಿತ ಶತರುದ್ರಾಭಿಷೇಕ ಜಾಗರಣ ಕರನು ಅಸಂಖ್ಯಾತ ಸಾರ್ವಜನಿಕ ಭಕ್ತಾಲೆ ಸಹಕಾರ ಆನಿ ಸಹಯೋಗಾನ ಚಲೆ°. ದಾವಣಗೆರೆ ಜಿಲ್ಲಾ ಪುರೋಹಿತ ಸಂಘಾಚೊ ಅಧ್ಯಕ್ಷ ಶ್ರೀಮಠಾಚೊ ಮುಖ್ಯಸ್ಥ ವೇದಮೂರ್ತಿ ಪವನ್ ಭಟ್ ಹಾಂಗೆಲೆ ಮುಖೇಲಪಣಾರಿ ಸೋಂದಾ ಸ್ವರ್ಣವಲ್ಲಿ ಸಂಸ್ಥಾನಾಚೆ ಪುರೋಹಿತ ಸಹಿತ ಗಣೇಶ್ ಭಟ್, ಅಜೇಯ ಭಟ್, ಕೃಷ್ಣ ಭಟ್, ಶ್ರೀಪಾದ ದೇಶಪಾಂಡೆ, ಅನಂತ ಭಟ್, ಗಿರೀಶ್ ಭಟ್, ಅಶೋಕ್ ದಿಕ್ಷೀತ್ ಮ್ಹಾಲ್ಗಡೆ ಪುರೋಹಿತ ಜಯತೀರ್ಥಾಚಾರ್, ಆನಂದತೀರ್ಥಾಚಾರ್, ದಾವಣಗೆರೆಚೆ ಶ್ರೀ ಗಾಯತ್ರಿ ಪರಿವಾರಾಚೆ ಪ್ರಧಾನ ಕಾರ್ಯದರ್ಶಿ ಸಾಲಿಗ್ರಾಮ ಗಣೇಶ್ ಶೆಣೈ ಆನಿ ಹೇರ ಉಪಸ್ಥಿತ ಆಶಿಲೆ.

ರಾಣೇಬೆನ್ನೂರು: ಹಾಂಗಾಚೆ ಸ್ಪಟಿಕ ಶ್ರೀ ಕ್ಷೇತ್ರ ಲಿಂಗದಹಳ್ಳಿ ಗ್ರಾಮಾಚೆ ರಂಭಾಪುರಿ ಶಾಖಾ ಹಿರೇಮಠ ಹಾಜೆ ವಠಾರಾಂತು° ಮಾರ್ಚ್ 4 ಆನಿ 5 2023 ಶನಿವಾರ ಆನಿ ಆಯುತಾರ ಶ್ರೀಮದ್ ಜಗದ್ಗುರು ರೇಣುಕರ ಜಯಂತಿ, ರಥೋತ್ಸವಾ ನಿಮಿತ ರಾಜ್ಯ ಸ್ಥರಾಚೆ ಭಜನಾ ಸ್ಪರ್ಧೊ ಆಯೋಜನ ಕೆಲಾ. ದಾಋಲೆ ಆನಿ ಬಾಯಲಾಂಕ ಪ್ರತ್ಯೇಕ ಸ್ಪರ್ಧೋ ಚಲನು ಪ್ರತ್ಯೇಕ ನಗದ ಇನಾಂ ದಿತಾತಿ. ಪಯಲೆ° ಇನಾಂ ರೂ. 20,000, ದುಸ್ರೆ° ಇನಾಂ ರೂ, 15,000, ತಿಸ್ರೆ° ಇನಾಂ ರೂ. 10,000 . ಹಾಜೆ ಸಾಂಗತ ವಾಂಟೊ ಘತಿಲೆ ಸಗಟಾಂಕ ಪ್ರಮಾಣ ಪತ್ರಯೀ ಮೇಳತಾ ಮ್ಹಣು ಕಳವಣಿಂತು° ಸಾಂಗಲಾ°. ನಿಯಮ ಆನಿ ನಿಬಂಧನಾ ಆಸಚೆ ಹ್ಯಾ ಸ್ಪರ್ಧೆಕ ನೊಂದ ಕರೂಂಕ ಆಖೇರಿಚೊ ದೀಸ ಫೆ. 28 ಜಾವನು ಆಸಾ ಮ್ಹಣು ರಂಭಾಪುರಿ ಶಾಖಾ ಹಿರೇಮಠ ಹಾಜೆ ಪೀಠಾಧ್ಯಕ್ಷ ಶ್ರೀ ಷ: ಭ್ರ: ವೀರಭದ್ರ ಶಿವಾಚಾರ್ಯಾ ಹಾಂನಿ° ಕಳವಣಿಂತು° ಸಾಂಗಲಾ°, ಸಂಪರ್ಕ:-9902409238-9008685715-9242881170- http://spatikalingashreekshetra.com

ದಾವಣಗೆರೆ: ಹಾಂಗಾಚೆ ದಾವಣಗೆರೆ ದೈವಜ್ಞ ಬ್ರಾಹ್ಮಣ ಸಮಾಜಾಚೆ ಚುನಾವ ಆರತಾಂ ಚಲೆ. ತಾಂತು° ಅತ್ಯಧಿಕ ಮತ ಫಾವೊ ಕರನು ನವೀನ ಅಧ್ಯಕ್ಷ ಜಾವನು ವಿಂಚೂನ ಆಯಿಲೆ ಪ್ರಶಾಂತ್ ವಿಶ್ವನಾಥ್ ವೆರ್ಣೇಕರ್ ಹಾಂಕಾ° ಶ್ರೀಮತಿ ಪ್ರೇಮಾ ಅರುಣಾಚಲ ಎನ್. ರೇವಣಕರ್ ಪ್ರತಿಷ್ಠಾನಾ ತರಪೇನ ಸನ್ಮಾನ ಚಲೊ. ಶ್ರೀಮತಿ ಗೌರಮ್ಮ ನರಹರಿ ಶೇಟ್ ಸಭಾಂಗಣಾοತು° ಚಲೆಲೆ ಹ್ಯಾ ಕಾರ್ಯಕ್ರಮಾಂತು° ಪ್ರತಿಷ್ಠಾನಾಚೆ ಸಂಸ್ಥಾಪಕ ಡಾ. ನಲ್ಲೂರು ಅರುಣಾಚಲ ಎನ್. ರೇವಣಕರ್, ಪ್ರೇಮಾ ಅರುಣಾಚಲ ರೇವಣಕರ್, ಸಾಲಿಗ್ರಾಮಾಚೆ ಶ್ರೀಮತಿ ಸರಸ್ವತಿ ದಾಸಪ್ಪ ಶೆಣೈ ಪ್ರತಿಷ್ಠಾನಾಚೊ ಸಂಸ್ಥಾಪಕ ಸಾಲಿಗ್ರಾಮ ಗಣೇಶ್ ಶೆಣೈ ಆನಿ ಹೇರ ಮಾನಾಚೆ ಸೊಯ್ರೆ ಆಶಿಲೆ. ದಾವಣಗೆರೆಚೆ ದೈವಜ್ಞ ಬ್ರಾಹ್ಮಣ ಸಮಾಜಾಚೆ ನವೀನ ಜಾವನು ವಿಂಚೂನ ಆಯಿಲೆ ಸಗಟ ವ್ಹಾಂಗಡ್ಯಾಂಕ ಶ್ರೀ ವಿಮಲೇಶ್ವರ ದೇವಾಲೆ ಯಾದಸ್ತಿಕಾ ದಿವನು ಸನ್ಮಾನ ಚಲೊ ಮ್ಹಣು ಪ್ರತಿಷ್ಠಾನಾಚಿ ಉಪಾಧ್ಯಕ್ಷಾ ಅನಿತಾ ರಾಜೇಶ್ ಪಾವಸ್ಕಾರ್ ಹಾಂನಿ° ಕಳವಣಿಂತು° ಸಾಂಗಲಾ°.

ಮಂಗಳೂರು ಲಿಟ್‌ಫೆಸ್ಟ್ 2023 ತು° ಕರಾವಳಿಚೆ ಭಾಷಾ ಸಾಮರಸ್ಯ ಬದಲ ಲಕ್ಷ್ಮಿನಾರಾಯಣ ಕಜೆಗದ್ದೆ, ಕೊಂಕಣಿ ವಾವ್ರಾಡಿ ಡಾ. ಜಗದೀಶ ಪೈ, ತುಳು ಜಾನಪದ ಕಲಾವಿದ ದಯಾನಂದ ಜಿ ಕತ್ತಲ್ಸಾರ್ ಆನಿ ಮಂಗಳೂರು ವಿಶ್ವ ವಿದ್ಯಾನಿಲಯಾಚೊ ಡಾ. ಮಾಧವ ಎಂ.ಕೆ. ಹಾಂಗೆಲೆ ಮಧೆ° ಸಂವಾದ ಚಲೊ. "2000 ವರಸ ಮಾಕ್ಷಿ ಸರಸ್ವತಿ ನ್ಹಂಯಚೆ ತಡಿಯರಿ ಜೀವನ ಕರನು ಆಶಿಲೆ ಸಾರಸ್ವತ ಲೋಕ ಅನೇಕ ಕಾರಾಣಾಕ ಲಾಗೂನ ಗೋವಾ ಪ್ರದೇಶಾಕ ಆಯಿಲೆ. ಕೊಂಕಣ ಪ್ರದೇಶಾಂತ ಆಶಿಲ್ಯಾನ ಹಾಂಕಾ° ಕೋಂಕಣಸ್ಥ ಮ್ಹಣತಾತಿ. ಪೋರ್ಚುಗಿಸ ಆಡಳಿತಾಕ ಲಾಗೂನ ಕೊಂಕಣಿ ಸಾಹಿತ್ಯ ಚಡ ವಾಡೂಂಕ ಜಾಯನಿ. ಉಪರಾಂತ ಕೊಂಕಣಿ ಸಾಹಿತ್ಯಾಚೆ ಅಭಿವೃದ್ಧಿ ಜಾಲೆ ಆಣಿ ಆಜಿ ಕೊಂಕಣಿ ರಾಷ್ಟ್ರ ಸ್ಥರಾರಿ ಮಾನ್ಯತಾ ಪಾವಿಲಿ ಭಾಸ ಜಾಲ್ಯಾ"ಮ್ಹಣು ಕೊಂಕಣಿ ವಾವ್ರಾಡಿ ಜಗದೀಶ ಪೈ ಹಾಂನಿ° ಸಾಂಗಲೆ°. ಅಕಾಡೆಮಿಯಾನಿ ಭಾಷಾಸಾಮರಸ್ಯಾಕ ಖೂಬ ತರಾನ ದೇಣಗಿ ದಿವಯೆತ, ಅಕಾಡೆಮಿ ಸರಕಾರಚೆ ಅನುದಾನಾನ ಚಲತಾ ದಾಕೂನ ಕಸಲೆಂಯಿ ಅಸಾಧ್ಯ ಮ್ಹಣು ನಾ. ಕೊಂಕಣಿ ಭಾಸ ಉಲೊವಚೆ 42 ಪಂಗಡ ಆಸಾತಿ. ಸಗಟಾಲೆ ಸಂಪ್ರದಾಯ, ಆಚರಣ ಕೊಂಕಣಿ ಅಕಾಡೆಮಿ ಚಿತ್ರೀಕರಣ ಕರನು ದವರಲಾ° ಮ್ಹಣು ತಾಂನಿ° ಸಾಂಗಲೆ°.
"ಅರೆಭಾಷಾ ಒಕ್ಕಲಿಗ ಸಮುದಾಯಾನ ಉಲೊವಚಿ ಭಾಸ ಆಸಾ. ಹೀ ಭಾಸ ಉಲೋವಚೆ ಲೋಕ ಸಾಬಾರ 6-7 ಲಾಖ ಆಸತಲೆ. ಶುರುವೆಕ ಹ್ಯಾ ಭಾಶೆಕ ಗೌಡ ಕನ್ನಡ ಮ್ಹಣತಲೆ. ಆಜಿ ಅರೆಭಾಷಾ ಮ್ಹಣತಾತಿ. ದ್ಹಾ ವರಸ ಮಾಕ್ಷಿ ಕರ್ನಾಟಕಾಂತ ಅಕಾಡೆಮಿ ಸ್ಥಾನಮಾನ ಮೆಳನು ಆಜಿ ಖೂಬ ಸಾಹಿತ್ಯ ರಚನ ಜಾಲೆಲೆ° ಆಸಾ" ಮ್ಹಣು ಲಕ್ಷ್ಮಿನಾರಾಯಣ ಕಜೆಗದ್ದೆ ಹಾಂನಿ° ಸಾಂಗಲೆ°.
"ತುಳುಭಾಸ ಉಲೊವಚೆ ಸಾಬಾರ ಪಂಗಡ ಆಸಾತಿ. ಹಾಂಗಾಚಿ ವ್ಯಾವಹಾರಿಕ ಭಾಸ ತುಳು ಆಸಾ. ಭಾಷಾ ಸಂಸ್ಕೃತಿ ಬಾಂದೂನ ವಾಡೊನ ಹಾಡಚೆ ನದರೆನ ಅಕಾಡೆಮಿಚೊ ವಾಂಟೊ ಹೋಡ ಆಸಾ. ಭಾಸ ಫಕತ ಎಕ ವರ್ಗಾಕ ಸೀಮಿತ ಜಾವನು ಆಸನಾ. ಕೊಂಕಣಿ ಭಾಷಿಕ ಲೋಕಾನಯಿ ತುಳು ಸಾಹಿತ್ಯಾಕ ಸಂಸ್ಕೃತಿಕ ಯೋಗದಾನ ದಿಲೆಲೆ° ಆಸಾ. ಆರತಾ° ಆಮಿ ಇಸ್ಲಾಂ ಧರ್ಮಾಚೆ ಸಾಧಕಾಕ ಸನ್ಮಾನ ಕೆಲೆಲೊ ಆಸಾ." ಮ್ಹಣು ದಯಾನಂದ ಜಿ ಕತ್ತಲ್ಸಾರ್ ಹಾಂನಿ° ಸಾಂಗಲೆ°.