ಉಡುಪಿ: ಹಾಂಗಾಚೆ ಶ್ರೀ ಲಕ್ಷ್ಮೀ ವೆಂಕಟೇಶ ದೇವಳಾಚೆ ದೇವಾಲೆ ಸನ್ನಿಧಿಂತು° ಗೋಪೂಜಾ ಚಲಿ. ಅರ್ಚಕ ವಿನಾಯಕ ಭಟ್ ಧಾರ್ಮಿಕ ಪೂಜಾ ಚಲಯಲಿ. ಆಡಳಿತ ಮೊಕ್ತೇಸರ ಪಿ. ವಿ. ಶೆಣೈ, ನರಹರಿ ಪೈ, ಶ್ರೀನಿವಾಸ ಕಾಮತ್ ಆನಿ ಹೇರ ಲೋಕ ಉಪಸ್ಥಿತ ಆಶಿಲೆ.

To Support Kodial Khaber click the following button.

ಮಂಗಳೂರು: ಹಾಂಗಾಚೆ ಜಿ.ಎಸ್.ಬಿ. ಮಹಿಳಾ ವೃಂದ (ರಿ.) ಹಾಂನಿ° ನ. 12ಕ ಶ್ರೀ ಗೋಕರ್ಣ ಮಠಾಂತು° ದೀಪಾವಳಿ ಪರಬೆಚೆ ವಾಂಟೊ ಜಾವನು ಶ್ರೀ ಲಕ್ಶ್ಮೀ  ಪೂಜಾ ಕೆಲಿ. ವೇದಮೂರ್ತಿ ಹಾಂಗೆಲೆ ಮುಖೇಲಪಣಾರಿ ಚಲೆಲೆ ಶ್ರೀ ಲಕ್ಶ್ಮೀ ಅಷ್ಟೋತ್ತರಾಂತು° 70 ಸುವಾಸಿಯಾನಿ ವಾಂಟೊ ಘೆತಲೊ. ಅಧ್ಯಕ್ಷಾ ನಯನಾ ರಾವ್ ಹಾಂನಿ° ದೇವಾ ಮುಕಾರಿ ದಿವೊ ಲಾಯಲೊ. ಆದಲಿ ಅಧ್ಯಕ್ಷಾ ಮರೋಳಿ ಸಬಿತಾ ಕಾಂತ ಹಾಂನಿ° ಮಾರ್ಗದರ್ಶನ ದಿಲೆ°. ಉಪಾಧ್ಯಕ್ಷಾ ಲಕ್ಶ್ಮೀ ಭಂಡಾರಕಾರ, ಕಾರ್ಯದರ್ಶಿ ವಿಜಯಲಕ್ಶ್ಮೀ ಕಾಮತ್, ಕಾರ್ಯಕಾರಿ ಮಂಡಳಿಚೆ ಸಾಂದೆ ಆನಿ ಹೇರ ಸಾಂದೆ ಉಪಸ್ಥಿತ ಆಶಿಲೆ.

To Support Kodial Khaber click the following button.

ಪದ್ಮನಾಭ ಬಾಲಕೃಷ್ಣ ಆಚಾರ್ಯ (ಜನನ 8 ಅಕ್ಟೋಬರ್ 1931) ಹಾಂನಿ° ಆಜಿ ಮುಂಬಯಿoತು° ಅಂತರಲೆ. ರಾಷ್ಟ್ರಪತಿ ಪ್ರಣಬ್ ಮುಖರ್ಜಿ ಹಾಂನಿ° ಹಾಂಕಾ° 14 ಜುಲೈ 2014 ದೀವಸು ನಾಗಾಲ್ಯಾಂಡ್ ರಾಜ್ಯಾಚೊ ಗವರ್ನರ್ ಜಾವನು ನೆಮಣೂಕ ಕೆಲೆಲೊ. 12 ಡಿಸೆಂಬರ್ 2014 ಆನಿ 17 ಆಗಸ್ಟ್ 2016 ಮಧೆ° ಹಾಂನಿ° ಅಸ್ಸಾಂ ರಾಜ್ಯಾಚೆ ರಾಜ್ಯಪಾಲ ಜಾವನೂಯಿ ಚಡತಿ ಜಬಾಬದಾರಿ ಘೆತಿಲಿ. 21 ಜುಲೈ 2014 ದಾಕೂನ 19 ಮೇ 2015 ತಾಂಯ° ತ್ರಿಪುರಾ ರಾಜ್ಯಾಚೆ ಗವರ್ನರ್ ಜಾವನು ಆಶಿಲೆ. 26 ಜನವರಿ 2017 ದಾಕೂನ ಅರುಣಾಚಲ ಪ್ರದೇಶ ರಾಜ್ಯಾಚೆ ಗವರ್ನರ್ ಜಾವನು ಹಾಂಕಾ° ಚಡತಿ ಜಬಾಬದಾರಿ ದಿಲೆಲಿ. ಜುಲೈ 2019ತು° ಥೊಡ ಹಪ್ತೆ ಕಾತಿರ ಹಾಂನಿ° ಮಣಿಪುರಾಚಿ ಜಬಾಬದಾರಿ ಘೆತಿಲಿ ಆಸಾ. ತ್ಯಾಚ ವರಸ ಹಾಂಗೆಲಿ ರಾಜ್ಯಪಾಲ ಹುದ್ದೆಚಿ ಅವಧಿ ಸಂಪಲಿ.
ಉಡುಪಿಚೆ ಬಾಲಕೃಷ್ಣ ಆನಿ ರಾಧಾ ಆಚಾರ್ಯ ದಂಪತಿಲೊ ಪೂತು ಜಾವನು ಆಸಚೆ ಹಾಂನಿ° ಕರ್ನಾಟಕಾಚೆ ಉಡುಪಿಂತು° ಜಲ್ಮಲೆ. ಉಡುಪಿಚೆ ಕ್ರಿಶ್ಚಿಯನ್ ಹೈಸ್ಕೂಲಾಂತು° ಮೆಟ್ರಿಕ್ಯುಲೇಷನ್ ಕೆಲೆಲೆ ಹಾಂನಿ° 1949ತು° ಉಡುಪಿಚೆ ಮಹಾತ್ಮ ಗಾಂಧಿ ಸ್ಮಾರಕ (ಎಂ.ಜಿ.ಎo) ಕಾಲೇಜಾಂತು° ಪದವಿ ಶಿಕ್ಷಣ ಫಾವೊ ಕೆಲೆಂ. ಉಪರಾಂತ ಉದ್ಯೋಗ ನಿಮಿತ ಮಂಬೈಕ ಗೆಲೆಲೆ ಹಾಂಕಾ° ಅಖಿಲ ಭಾರತೀಯ ವಿದ್ಯಾರ್ಥಿ ಪರಿಷತ್ (ಎ.ಬಿ.ವಿ.ಪಿ)ಚೊ ಸಂಬoಧ ಜಾಲೊ ಆನಿ ಹಾಂನಿ° ಮುಂಬೈ ವಿಶ್ವವಿದ್ಯಾಲಯಾಚೆ ಸೆನೆಟ್ ಸದಸ್ಯ ಜಾಲೆ. ಹಾಂನಿ° ಮುಂಬೈ ವಿಶ್ವವಿದ್ಯಾನಿಲಯಾ ದಾಕೂನ ಎಲ್‌ಎಲ್‌ಬಿ ಪದವಿ ಪ್ರಾಪ್ತ ಕೆಲಿ. ದೆಹಲಿ ವಿಶ್ವವಿದ್ಯಾನಿಲಯಾಚೆ "ಜ್ಞಾನೋದಯ ಎಕ್ಸ್ಪ್ರೆಸ್" ಈಶಾನ್ಯ ಭಾರತಾಕ ಕಾಲೇಜ್ ಆನ್ ವ್ಹಿಲ್ಸ್ ಕಾರ್ಯಕ್ರಮಾಚಿ ಯೋಜನಾ ಕೆಲೆಲಿ ಕೀರ್ತಿ ಹಾಂಗೆಲಿ ಜಾವನು ಆಸಾ.
ರಾಜ್ಯಪಾಲ ಜಾವಚೆ ಪಯಲೆ° ಹಾಂನಿ° ಭಾರತೀಯ ಜನತಾ ಪಕ್ಷ (ಬಿಜೆಪಿ) ಹಾಂತು° ವಿವಿಧ ಹುದ್ದೆ ಸಾಂಬಾಳೆಲೆ ಆಶಿಲೆ. 1980ತು° ಪಿ.ಬಿ. ಆಚಾರ್ಯ ಭಾರತೀಯ ಜನತಾ ಪಕ್ಷಾಕ ಮೆಳೆ. 1987ತು° ವಾಯುವ್ಯ ಬಾಂಬೆ ಜಿಲ್ಲೆ ಬಿಜೆಪಿ ಅಧ್ಯಕ್ಷ ಜಾವನು ವಿಂಚೂನ ಆಯಲೆ ಹಾಂನಿ° 1989ತು° ಮುಂಬೈ ಬಿಜೆಪಿಯ ಸಮಿತಿಚೆ ಸಾಂದೆ ಜಾಲೆ. 1991ತು° ಹಾಂಕಾ° ಈಶಾನ್ಯ ರಾಜ್ಯಾಂಚಿ ಉಸ್ತುವಾರಿ ಜಾವನು ಬಿಜೆಪಿಚೆ ರಾಷ್ಟ್ರೀಯ ಕಾರ್ಯಕಾರಿ ಸಮಿತಿಚೊ ಸಾಂದೊ ಜಾವಚೊ ಅವಕಾಶ ಮೆಳೊ. ಅರುಣಾಚಲ ಪ್ರದೇಶ, ಮಣಿಪುರ, ಮೇಘಾಲಯ, ಮಿಜೋರಾಂ ಆನಿ ನಾಗಾಲ್ಯಾಂಡ್ ಹಾಜಿ ಜಬಾಬದಾರಿ ಹಾಂಕಾ° ಮೆಳಿ. 1995-2002 ಮಧೆ° ತಾಂನಿ° ಬಿಜೆಪಿಚೆ ಅಖಿಲ ಭಾರತ ರಾಷ್ಟ್ರೀಯ ಕಾರ್ಯದರ್ಶಿ ಆನಿ ಈಶಾನ್ಯ ರಾಜ್ಯಾಂಚೆ ಉಸ್ತುವಾರಿ ಸುತಾ ಆಶಿಲೆ.
2002ತು° ಹಾಂನಿ° ಕೇರಳ ಆನಿ ಲಕ್ಷದ್ವೀಪ ಆನಿ 2005ತು° ತಮಿಳುನಾಡಾಚೆ ಉಸ್ತುವಾರಿ ಆನಿ ರಾಷ್ಟ್ರೀಯ ಕಾರ್ಯಕಾರಿ ಸದಸ್ಯ ಆಶಿಲೆ. ಆಚಾರ್ಯ ಹಾಂನಿ° ಎಸ್‌ಸಿ/ಎಸ್‌ಟಿ ಮೋರ್ಚಾಚೆ ರಾಷ್ಟ್ರೀಯ ಉಸ್ತುವಾರಿ ಆನಿ ಬಿಜೆಪಿಚೆ ಸಾಗರೋತ್ತರ ಇಷ್ಟಾಂಚೆ ಸಹ ಸಂಚಾಲಕ ಆಶಿಲೆ. ಈಶಾನ್ಯ ಭಾರತಾಚೆ ಸಂಪರ್ಕ ಕೋಶಾಚೆ ರಾಷ್ಟ್ರೀಯ ಪ್ರಭಾರಿ ಜಾವನುಯಿ ಹಾಂನಿ° ಜಬಾಬದಾರಿ ಸಾಂಬಾಳಲಿ ಆಸಾ. ಮುಂಬೈ ನಗರಿಚೆ ಕುಟುಂಬಾನಿ ಶೈಕ್ಷಣಿಕ ಉದ್ದೇಶಾನ ಯೆವ್ಕಾರ ದಿವನು ಆಪಯಿಲೆ ಈಶಾನ್ಯ ರಾಜ್ಯಾಂಚೆ ಬುಡಕಟ್ಟು ಚೆರಡುವಾಂಕ ಎಬಿವಿಪಿಚಿ ಯೋಜನಾ ಜಾವನು ಆಸಚೆ "ಮೈ ಹೋಮ್ ಈಸ್ ಇಂಡಿಯಾ" ಸಕಳ ಆಚಾರ್ಯಾ ಸಕ್ರಿಯ ಆಶಿಲೆ. ಹಾಂಗೆಲೆ ಘರಕಡೆ ಸುತಾ ಖೂಬ ವಿದ್ಯಾರ್ಥಿ ವಾಸ ಆಸೂನ ಶಿಕ್ಷಣ ಕರತಲೆ. 1975 ದಾಕೂನ ಆಚಾರ್ಯಾ ಹಾಂನಿ° ರಾಣಿ ಮಾ ಗೈಡಿನ್ಲಿಯು ಭವನಾಂತ ಭಾರತೀಯ ಬುಡಕಟ್ಟು ಉಪಭಾಷೆಂಚಿ ಅಕಾಡೆಮಿ ಹಾಜೆ ಸಾಂಗತ ನಿಕಟ ಸಂಭoದ ದವರನು ಘೆತಿಲೊ.

 To Support Kodial Khaber click the following button.

ಮಂಗಳೂರು: ಗೌಡ ಸಾರಸ್ವತ ಬ್ರಾಹ್ಮಣ ಸಮಾಜಾಚೆ ದ್ಹಾ ಪೆಂಟೆಚೆ ದೇವಳ ಜಾವನು ಆಸಚೆ° ಮಂಜೇಶ್ವರಚೆ° ಶ್ರೀಮತ್ ಅನಂತೇಶ್ವರ್ ದೇವಳಾಚೊ ಷಷ್ಠಿ ಮಹೋತ್ಸವ ಡಿಸೆಂಬರ್ 13 ದಾಕೂನ 19 ತಾಂಯ ಚಲಚೊ ಆಸಾ ಮ್ಹಣು ದೇವಳಾಚೆ ಕಳವಣಿಂತು° ಸಾಂಗಲಾ°. ಚೌದಾ ತಾರೀಕೆಕ ಧ್ವಜಾರೋಹಣ, ಪಂದ್ರಾಕ ಹಗಲೋತ್ಸವು, ಸತ್ರಾಕ ರುಪ್ಯಾ ಪಾಲ್ಲಂಕಿ ಉತ್ಸವು, ಸೋಳಾಕ ಭಾಂಗ್ರಾ ಪಾಲ್ಲಂಕಿ ಉತ್ಸವು, ಆಟ್ರಾಕ ರಥಾರೋಹಣ ಆನಿ 19ಕ ಅವಭೃತೊತ್ಸವು ಚಲಚೊ ಆಸಾ ಮ್ಹಣು ಕಳವಣಿ ಸಾಂಗತಾ.

  To Support Kodial Khaber click the following button.

ಮಂಗಳೂರು: ಶ್ರೀ ಸಂಸ್ಥಾನ ಗೌಡಪಾದಾಚಾರ್ಯ ಕವಳೆಮಠ ಹಾಜೆ° ಮಂಗಳೂರು ಶಾಖಾ ಮಠ ಹಾಜೆ° ಬಾಂದಪ ಹಾಂಗಾಚೆ ಕೊಟ್ಟಾರ ಪ್ರದೇಶಾಚೆ ಕೊಡಿಕಲಾಂತು° ಶೀಘ್ರ ಸಂಪನ್ನ ಜಾವಚೆ° ಆಸೂನ ನ.7ಕ ಮಠಾಧೀಶ ಶ್ರೀಮದ್ ಶಿವಾನಂದ ಸರಸ್ವತಿ ಸ್ವಾಮಿ ಗುರು ಮಹಾರಾಜ್ ಹಾಂನಿ° ಬಾಂದ ಸ್ಥಳಾಕ ಭೇಟಿ ದಿವನು ಮಾರ್ಗದರ್ಶನ ದಿಲೆ°.

ಕೊಟ್ಟಾರ ಫೈಒವರಾಕ ಲಾಗೂನ ಆಸಚೆ ಜಾಗೆರಿ ಬಾಂದಿತ ಆಸಚೆ ಹ್ಯಾ ಚೌದ ಹಜಾರ ಸ್ಕ್ವೇರ್ ಫೀಟ್ ಇಮಾರತಾಂತು° ಬೇಸಮೆಂಟ್, ಗ್ರೌಂಡ್ ಆನಿ ಎಕ ಮ್ಹಾಳಿ ಆಸತಲೆ. ಸಾಬಾರ ಚಾರ ಕರೋಡ ರುಪಯೆಚೆ ಹ್ಯಾ ಯೋಜನೆಕ ಸಮಾಜಾಚೆ ಹರ ಎಕಲೆಲೆ ಯೋಗದಾನ ಆಸೂಂಕ ಜಾಯ ಮ್ಹಣು ಗುರುವರ್ಯಾನ ಸಾಂಗಲಾ°. ಹ್ಯಾ ಮಠ ನಿರ್ಮಾಣ ಕರಚಾಕ ಜಾವಕಾ ಜಾಲೆಲೊ 15 ಸೆಂಟ್ಸ್ ಜಾಗೊ ಅಳಿಕೆ ಗೋಪಾಲಕೃಷ್ಣ ಪೈ ಹಾಂನಿ° ತಾಂಗೆಲಿ ಆವಸು ತಾರಾ ಗೋವಿಂದ ಪೈ ಹಾಂಗೆಲೆ ಉಡಗಾಸಾಕ ಮಠಾಕ ಉಡಗಿರೆ ಜಾವನು ದಿಲೆಲೆ° ಆಸಾ.

2700 ವರಸಾಚೊ ಇತಿಹಾಸ ಆಸಚೆ ಹ್ಯಾ ಮಠಾಕ ದೇಶ ಭರ ಎದೋಳೂಚಿ 18 ಶಾಖಾ ಮಠ ಆಸಾತಿ. ಹ್ಯಾ ಮಠಾಕ ಶ್ರೀಮದ್ ಗೌಡಪಾದಾಚಾರ್ಯ ಹಾಂಗೆಲಿ ಗುರು ಪರಂಪರಾ ಆಸೂನ ತಾಂಗೆಲೊ ಶಿಷ್ಯ ಶ್ರೀಮದ್ ಭಗವದ್ ಪಾದಾಚಾರ್ಯ ಹಾಂನಿ° ಆದಿ ಶಂಕರಾಚಾರ್ಯ ಹಾಂಕಾ° ದೀಕ್ಷಾ ದಿಲೆಲಿ ಆಸಾ. ಭವಾನಿ ಶಂಕರ ಮಠಾಚೊ ಆರಾಧ್ಯ ದೇವು ಜಾವನು ಆಸೂನ ಮೂಲ ಮಠ ಗೊಂಯಚೆ ಕವಳೆಂತು° ಆಸಾ. ಶ್ರೀಮದ್ ಸಚ್ಛಿದಾನಂದ ಸರಸ್ವತಿ ಸ್ವಾಮೀಜಿ ಹಾಂಗೆಲೆ ಶಿಷ್ಯ ಜಾವನು ಆಸಚೆ ಆಯಚೆ ಪೀಠಾಧಿಪತಿ ಶ್ರೀಮದ್ ಶಿವಾನಂದ ಸರಸ್ವತಿ ಸ್ವಾಮೀಜಿ ಹಾಂಕಾ° ಕೊಡಿಯಾಲಾಚೆ ಶಿಷ್ಯವರ್ಗಾಚೆರಿ ವಿಶೇಷ ಮೋಗು ಆಸಾ. ಹಾಕಾ ಪ್ರಮುಖ ಕಾರಣ ಮ್ಹಳ್ಯಾರಿ 1994ತು° ಕವಳೆಂತು° ಹಾಂಕಾ° ಶಿಷ್ಯ ಸ್ವೀಕಾರ ಕರಚೊ ಕಾರ್ಯಕ್ರಮ ಘಡತನಾ ಮಂಗಳೂರು ಆನಿ ಉಡುಪಿ ಪರಿಸರಾಚೆ ಅಸಂಖ್ಯ ವೈದಿಕ ಆನಿ ಶಿಷ್ಯ ವರ್ಗಾನ ವಾಂಟೊ ಘೆತಿಲೆ° ಜಾವನು ಆಸಾ. ಗುರುವರ್ಯಾನ ಖಂಚೆಯ ಮೊಕ್ಕಾಂತು° ಆಸಲ್ಯಾರಯಿ ಗಣೇಶೋತ್ಸವಾಚೆ ವೇಳಾರ ಮಂಗಳೂರಚೆ ಸ್ವಯಂಸೇವಕಾನ ವಚೂನ ಗಣಪತಿ ಪಾವೊಚೆ° ಕರತಾತಿ. ಹೆ° ಸಾಬಾರ ದಶಕಾ ದಾಕೂನ ಚಲನು ಯೆವನು ಮಂಗಳೂರ ಶಹರಾ ವಿಷಯಾರಿ ಗುರುವರ್ಯಾಂಕ ಆಸಚೆ ವಿಶೇಷ ಅಭಿಮಾನಾಕ ಕಾರಣ ಜಾಲಾ°. 1998 ಇಸವಿಂತು° ಮಂಗಳೂರ ಶ್ರೀ ವೆಂಕಟರಮಣ ದೇವಳಾಂತು° ಶ್ರೀಮದ್ ಸಚ್ಛಿದಾನಂದ ಸರಸ್ವತಿ ಹಾಂನಿ° ಶಿಷ್ಯ ಸಹಿತ ಚಾತುರ್ಮಾಸ ಅತ್ಯಂತ ವಿಜೃಂಭಣೆನ ಆಚರಣ ಕೆಲೆಲೊ ಆಸಾ.
ಸದ್ಯಾಕ ಆಖೇರಿಚೆ ಸ್ಲೇಬಾಚೆ ಕಾಮ ಚಾಲೂ ಆಸೂನ ಗುರುವರ್ಯಾನ ಅವಲೋಕನ ಕರನು ಬಾಂದ ಸಮಿತಿಚೆ ಸಾಂದ್ಯಾ°ಕ ಸೂಕ್ತ ಮಾರ್ಗದರ್ಶನ ದಿವಚೆ° ಜಾಲೆ°. ಹ್ಯಾ ವೇಳಾರ ಮಂಗಳೂರು ಶಾಖಾ ಮಠಾಚೆ ವ್ಹಾಂಗಡಿ, ಸ್ವಯಂಸೇವಕ, ಇಂಜಿನಿಯರ್, ಆರ್ಕಿಟೆಕ್ಟ್, ಕಾಂಟ್ರೆಕ್ಟರ್ ಆನೀ ಹೇರ ಸಮಾಜ ಭಾಂದವ ಉಪಸ್ಥಿತ ಆಶಿಲೆ.

To Support Kodial Khaber click the following button.