ಉಡುಪಿ: ಕಲ್ಯಾಣಪುರಚೆ ಶ್ರೀ ವೆಂಕಟರಮಣ ದೇವಳಾಂತು° ಚಲಚೆ 94ವೆ° ಭಜನಾ ಸಪ್ತಾಹಾಂತು° ನ. 28ಕ  ಮೂಲ್ಕಿ ರವೀಂದ್ರ ಪ್ರಭು  ಹಾಂಗೆಲೆ  ಭಕ್ತಿ ಸಂಗೀತ ಕ್ರಾಯಕ್ರಮ ಚಲೊ. ದೇವಳಾಚೆ ತರಪೇನ ತಾಂಕಾ° ಗೌರವಾರ್ಪಣ ಜಾಲೆ°. ರಾತಿ  ಪೇಂಟಾ ಉತ್ಸವ, ವಸಂತ ಪೂಜಾ, ಅಷ್ಟಾವಧಾನ ಸೇವಾ, ಪಾಳೆಂತು° ಸೇವಾ, ಮಹಾಪೂಜಾ ಚಲಿ. ಅರ್ಚಕ ಜಯದೇವ ಭಟ್, ಗಣಪತಿ ಭಟ್, ಆಡಳಿತ ಮೊಕ್ತೇಸರ ಅನಂತ ಪದ್ಮನಾಭ  ಕಿಣೆ, ಕಾಶೀನಾಥ್ ಭಟ್, ಸಮಿತಿ ಸಾಂದೆ ಉಪಸ್ಥಿತ ಆಶಿಲೆ. 

ಕುಂದಾಪುರ: “ಹರ ಎಕ ವಿಷಯಾಂತು° ಸಂಪದ್ಭರಿತ ಆಶಿಲೆ ಭಾರತ ದೇಶಾಚೆರಿ ವಿದೇಶಿ ಲೋಕಾಲೆ ಆಕ್ರಮಣಾ ನಿಮಿತ ಮೂಲ ಸಂಸ್ಕೃತಿಕ ಮಾರ ಪಡಲೊ. ಆಮಗೆಲೆ ದೌರ್ಭಲ್ಯಾಚೆ ದುರುಪಯೋಗ ಕರನು ತಾಂನಿ° ಆಮಕಾ ಆಳಶಿಲೆ° ಆನಿ ಜೀವನ ಪದ್ಧತಿ ಬದಲೆಚೆ° ಕೆಲೆ°. ಮತಾಂತರ ಕರಯಲೆ°. ಶಿಕ್ಷಣ ವ್ಯವಸ್ಥಾ ಬದಲ ಕೆಲಿ. ಹೆ° ಕರಚಾಂತು° ತಾಂಕಾ° ಆಮಗೆಲೆ ಲೋಕಾನ ಮದದ ಕೆಲೆ°. ಆಜಿಕಯೀ ತಸಲೆ ಮನೋಭಾವ ಆಶಿಲೆ ಲೋಕ ಆಸಾತಿ. ಅಸಲೆ ಪರಿಸ್ಥಿತಿಂತು° ಆಮಗೆಲಿ ಸಂಸ್ಕೃತಿ ರಾಕೂನ ಹಾಡಚಾಂತು° ಜನಪದ ಸಾಹಿತ್ಯ, ಕಲಾ ಪ್ರಕಾರ° ಸಹಕಾರಿ ಜಾಲ್ಯಾಂತಿ. ಹೆಂ ವರೋನು ಹಾಡಚಾಂತು° ಆಮಗೆಲೆ ಮ್ಹಾಲ್ಗಡೆನ ಕೆಲೆಲಿ ಸೇವಾ, ತ್ಯಾಗ ಉಡಗಾಸ ಕರನು ಮುಕಾವಯಲೆ ಪಿಳಗಿಕ ಪಾವೊಚೆ° ಗರಜೆಚೆ° ಆಸಾ. ಆಮಗೆಲಿ ಜನಪದ ಸಂಸ್ಕೃತಿ ಆಮೀಚಿ ವರಯನಾಶಿ° ಆನಿ ಕೊಣೆ ವರೊಚೆ° ? ಉಪ್ಪಿನಕುದ್ರು ಗೊಂಬೆಯಾಟ ಅಕಾಡೆಮಿ ಆನಿ ಫಣಿಗಿರಿ ಪ್ರತಿಷ್ಠಾನ ಶಿರೂರು ಹಾಂನಿ° ಮನೊರಂಜನಾ ದ್ವಾರಿ ಸಾಂಸ್ಕೃತಿಕ ಜಾಗೃತಿ ಹಾಡಚೆ° ಕರತಾ ಆಸಾತಿ. ಹೆ° ಅಭಿನಂದನಿಯ ಜಾವನು ಆಸಾ” ಮ್ಹಣು ವಿಶ್ರಾಂತ ರಾಜ್ಯಪಾಲ ಪಿ. ಬಿ. ಆಚಾರ್ಯ ಹಾಂನಿ° ಸಾಂಗಲೆ°.

ಉಪ್ಪಿನಕುದ್ರು ಗೊಂಬೆಯಾಟ ಅಕಾಡೆಮಿಚೊ ಮ್ಹಯನಾಳೊ ಕಾರ್ಯಕ್ರಮಾಂತು° ಫಣಿಗಿರಿ ಪ್ರತಿಷ್ಠಾನ ಶಿರೂರು ಹಾಂಗೆಲಿ ಫಣಿಗಿರಿ ಪ್ರಶಸ್ತಿ 2022 ಹಾಜೆ° ಉಗ್ತಾವಣ ಕರನು ತಾಂನಿ° ಆಶೆ° ಸಾಂಗಲೆ°.
ಸರ್ವ ಧರ್ಮಾಂಕ ಗೌರವ ದಿವನು, ಕೊಣಾಚೆರಯೀ ಆಕ್ರಮಣ ಕರನಾಶಿ°, ಮೌಲ್ಯಾಧಾರಿತ ಜೀವನ ಕ್ರಮ ಆಪಣಾವನು ಆಸಚಿ ಭಾರತೀಯ ಸಂಸ್ಕೃತಿ ಆಜಿ ಆಧುನಿಕರಣ, ಕೌಟಂಬಿಕ ಮೌಲ್ಯ ವಿಸರೂನ ದುಡು ಸಂಪಾದನ ಕರಚೆಂಚಿ ಮುಖ್ಯ ಮ್ಹಣು ಚಿಂತನ ಕರಚೆ ವಿದ್ಯಾವಂತ ಲೋಕಾ ನಿಮಿತ ಆಮಗೆಲೆ ಸಂಸ್ಕೃತಿಕ ಅಪಾಯ ಆಯಲಾ. ತಾಂಕಾ° ಹ್ಯಾ ಭಜನ, ಹರಿಕಥಾ, ಯಕ್ಷಗಾನ, ನಾಟಕ ತಸಲೆ ಕಲಾಪ್ರಕಾರಾಂತು° ಉಮೇದಿ ನಾ. ತಾಕಾ ಸಮ ಜಾವನು ಆಮಗೆಲೆ ವಿದ್ಯಾಸಂಸ್ಥೆ, ಮುಖೆಲಿ ಲೋಕ ಹ್ಯಾ ಬದಲ ಕಾಳಜಿ ಘೆತಾ ನಾಂತಿ°. ಜಾಲ್ಯಾರಿ ಆಜಿಕಯಿ ಆಮಗೆಲೆ ಲೋಕಾಂಕ ಭಾರತೀಯ ಸಂಸ್ಕೃತಿ ಬದಲ ಉಮೇದಿ ಆಸಾ ಮ್ಹಣಚಾಕ ‘ಕಾಂತಾರ’ ಚಲಚನಚಿತ್ರಾಚೆ ಯಶ ನಿದರ್ಶನ ಜಾವನು ಘೆವಯೆತ ಮ್ಹಣು ಆಚಾರ್ಯಾ ಹಾಂನಿ° ಸಾಂಗಲೆ°.

ಫಣಿಗಿರಿ ಪ್ರತಿಷ್ಠಾನಾಚೆ ಪದಾಧಿಕಾರಿ, ಉಪ್ಪಿನಕುದ್ರು ಗೊಂಬೆಯಾಟ ಅಕಾಡೆಮಿಚೆ ಭಾಸ್ಕರ ಕೊಗ್ಗ ಕಾಮತ ಹಾಂನಿ° ಪ್ರಸಂಗಕರ್ತ ಕಂದಾವರ ರಘುರಾಮ ಶೆಟ್ಟಿ ಹಾಂಕಾ° ಸನ್ಮಾನ ಕೆಲೊ. ಯಕ್ಷಗಾನ ಕಲಾ ಕೇಂದ್ರ ಹಂಗಾರಕಟ್ಟೆಚೆ ಐರೋಡಿ ರಾಜಶೇಖರ ಹೆಬ್ಬಾರ ಹಾಂನಿ° ಸಭೆಚೆ ಅಧ್ಯಕ್ಷ ಆಶಿಲೆ. ಮ್ಹಾಲ್ಗಡೆ ವಿದ್ವಾಂಸ ಡಾ. ಕಬ್ಬಿನಾಲೆ ವಸಂತ ಭಾರದ್ವಾಜ ಮುಖೇಲ ಸೊಯ್ರೆ ಆಶಿಲೆ.

ಶಿರೂರು ಫಣಿಗಿರಿ ಪ್ರತಿಷ್ಠಾನಾಚೆ ಶಿರೂರು ಫಣಿಯಪ್ಪಯ್ಯ ಸಂಸ್ಮರಣಾರ್ಥ ಶಿರೂರು ಫಣಿಯಪ್ಪಯ್ಯ ವಿರಚಿತ ಪ್ರಸಂಗ ಸಂಪುಟ ಹಾಜೆ° ಮೊಕಳಿಕ ಜಾಲೆ°. ಕಂದಾವರ ರಘುರಾಮ ಶೆಟ್ಟಿ ಹಾಂಕಾ° “ಫಣಿಗಿರಿ ಪ್ರಶಸ್ತಿ – 2022” ಪ್ರದಾನ ಜಾಲೆ°. ರೋಟರಿ ಕುಂದಾಪುರ ದಕ್ಷಿಣ ಹಾಜೊ ಅಧ್ಯಕ್ಷ ಸತ್ಯನಾರಾಯಣ ಪುರಾಣಿಕ ಹಾಂನಿ° ಸ್ವಾಗತಾಚೆ ಉತ್ರ° ಸಾಂಗಲಿ°. ಉಮೇಶ ಶಿರೂರು ಹಾಂನಿ° ಪ್ರಾಸ್ತಾವಿಕ ಉತ್ರಂ ಸಾಂಗಲಿ°. ಕೃಷ್ಣಮೂರ್ತಿ ಬ್ರಕ್ಮಾವರ ಹಾಂನಿ° ಫಣಿಯಪ್ಪಯ್ಯ ಹಾಂಗೆಲೆ ತಾಳೆಗರಿ ಸಂಗ್ರಹ ಹಾಜೆ ಬದಲ ಮಾಹಿತಿ ದಿಲಿ. 77ವೆ° ಮ್ಹಯನಾಳೆ ಕಾರ್ಯಕ್ರಮ ಕರತಾ ಆಸಚೆ ಭಾಸ್ಕರ ಕೊಗ್ಗ ಕಾಮತ ಹಾಂನಿ° ತ್ಯಾ ಬದಲ ಮಾಹಿತಿ ದಿಲಿ. ಕವಿತಾ ಆಚಾರ್ಯ ಉಪಸ್ಥಿತ ಆಶಿಲಿಂತಿ. ಹೆರಂಜಾಳ ಗೋಪಾಲ ಗೌಡ ಆನಿ ಸಾಂಗಡ್ಯಾಲೆ° ಯಕ್ಷಗಾನ ಗಾನ ವೈಭವ ಪ್ರದರ್ಶನ ಜಾಲೆಂ. ಉಪ್ಪಿನಕುದ್ರು ಗೊಂಬೆಯಾಟ ಪಂಗಡಾನ ಪ್ರಾತ್ಯಕ್ಷಿಕಾ ದಿಲಿ. ಮಂಜುನಾಥ ಶಿರೂರು ಹಾಂನಿ° ಆಭಾರ ಮಾನಲೊ.

ಉಪ್ಪಿನಕುದ್ರು ಗೊಂಬೆಯಾಟಾಚಿ ಕಾಣಿ
17ವೆ° ಶೇಕಡೆಂತು° ಉಪ್ಪಿನಕುದ್ರು ಕಾಮತ ಕಟುಂಬೆಚೆ ಕೃಷ್ಣ ಬಾಬುರಾಯ ಕಾಮತ ಆನಿ ತಾಂಗೆಲೊ ಪೂತು ಲಕ್ಷ್ಮಣ್ ಭಾಗವತ ಹಾಂನಿ° ಸ್ಥಾಪನ ಕರನು ಗಾಂವ° ಗಾಂವ° ಭೊವನು ಹ್ಯಾ ಬೊಂಬೆಯಾಟಾಕ ಚಾಲನ ದಿಲೆಲೆ°. ಉಪರಾಂತ ಲಕ್ಷ್ಮಣ್, ನರಸಿಂಹ ಆನಿ ಮಂಜಯ್ಯ ಕಾಮತ ಬ್ಹಾಂವಡಾನಿ ತೀನ ಶತಮಾನ ಮಾಕ್ಷಿ ಕುಂದಾಪುರ ತಾಲೂಕೆಚೆ ಉಪ್ಪಿನಕುದ್ರು ಗಾಂವಾοತು° ಗಣೇಶ ಯಕ್ಷಗಾನ ಗೊಂಬೆಯಾಟ ಪಂಗಡ ಬಾಂದಿಲೆ°. ಲಕ್ಷ್ಮಣ್ ಕಾಮತ ಹಾಂಗೆಲೊ ನಾತು ಆನಿ ಚೌತೆ ಪಿಳಗಿಚೊ ದೇವಣ್ಣ ಕಾಮತಿನ ಹೀ ಕಲಾ ಎಕ ತಪಸ್ಯ ಶೆ° ಘೆವನು ಮುಕಾರ ವ್ಹೆಲಿ. ಆರ್ಥಿಕ ಪರಿಸ್ಥಿತಿಕ ಲಾಗೂನ 1941 ಇಸವಿಂತು° ದೇವಣ್ಣ ಕಾಮತ ಹಾಂನಿ° ಗೊಂಬೆಯಾಟ ಸ್ಥಬ್ದ ಕರಚೆಂ ಜಾಲೆ°. ಉಪರಾಂತ 1966 ಇಸವಿಂತು° ತೇದನಾ ಆಲ್ ಇಂಡಿಯಾ ಹ್ಯಾಂಡಿಕ್ರಾಫ್ಟ್ ಬೋರ್ಡ ಹಾಜಿ ಪಯಲಿ ಅಧ್ಯಕ್ಷಾ ಆಶಿಲಿ ಕೊಂಕಣಿ ಮನಿಶಿ ಕಮಲಾದೇವಿ ಚಟ್ಟೋಪಾದ್ಯಾಯ ಹಾಂನಿ° 75 ವರಸಾಚೆ ದೇವಣ್ಣ ಕಾಮತ ಹಾಂಕಾ° ಗೊಂಬೆಯಾಟ ಪರತೂನ ಶುರು ಕರಚಾಕ ಉಮೇದಿ ದಿಲಿ. 1966 ಇಸವಿಂತೂಚಿ ದೇವಣ್ಣ ಕಾಮತ ಹಾಂಕಾ° ದೇಶಾಚೆ ಗಣರಾಜ್ಯೋತ್ಸವಾಚೆ ಸಂದರ್ಭಾರಿ ರಾಷ್ಟ್ರಪತಿಲೊ ಸನ್ಮಾನ ಚಲಾ. ದೇವಣ್ಣ ಪದ್ಮನಾಭ ಕಾಮತ ಹಾಂಗೆಲೆ ಉಪರಾಂತ ಕೊಗ್ಗ ಕಾಮತ ಹಾಂನಿ° ಹಿ ವೃತ್ತಿ ಆಪಣಾಯಲಿ. ಕೊಗ್ಗ ಕಾಮತ ಹಾಂನಿ° ದೇಶ ವಿದೇಶಾಂತು° ಗೊಂಬೆಯಾಟ ಪ್ರದರ್ಶನ ದಿಲೆ°. ಕೆ. ಎಸ್. ಉಪಾದ್ಯಾಯ ಹಾಂನಿ° ಹ್ಯಾ ಬದಲ ಹಾಂಕಾ° ಸಹಕಾರ ದಿಲೆಲೊ ಆಸಾ.
ಆಜಿ ಸ್ಹವೆ ಪಿಳಗಿಚೆ ಭಾಸ್ಕರ ಕೊಗ್ಗ ಕಾಮತ ಹಾಂನಿ° ಗಣೇಶ ಉಕ್ಷಗಾನ ಗೊಂಬೆಯಾಟ ಮಂಡಳಿ ಹಾಜೆ° ಸಾರಥ್ಯ ಗೆತಿಲೆ° ಆಸಾ.

ಉಡುಪಿ: ನ. 14 – 21 ಉಡುಪಾಂತು° ಚಲಚೆ ರಾಜ್ಯ ಸ್ಥರಾಚೆ° 69ವೆ° ಅಖಿಲ ಭಾರತ ಸಹಕಾರಿ ಸಪಾಹಾಚೊ ವಾಂಟೊ ಜಾವನು ಉಡುಪಿ ಪುರಭವನಾಚೆ ಆಂಗಣಾοತು° ಸಹಕಾರಿ ರಥಾಕ ಉಡುಪಿ ನಗರ ಸಭಾ ಅಧ್ಯಕ್ಷಾ ಸುಮಿತ್ರಾ ನಾಯಕ್ ಹಾಂನಿ° ಚಾಲನ ದಿಲೆ°. ತಾಂನಿ° ಉಡುಪಿ ಜಿಲ್ಲಾ ಸಹಕಾರಿ ಯೂನಿಯನ್ ಅಧ್ಯಕ್ಷ ಜಯಕರ್ ಶೆಟ್ಟಿ ಹಾಂಕಾ° ಸಹಕಾರಿ ಧ್ವಜ ಹಾತಾಂತರ ಕೆಲೆ°. ಸಹಕಾರಿ ಲಾಂಛನ (ಪಿನ್) ಹಾಜೆ° ಮೊಕಳಿಕ ಉದ್ಯಮಿ ಪಿ. ಪುರುಶೋಥಮ್ ಶೆಟ್ಟಿ ಹಾಂನಿ° ಕೆಲೆ°. ವೇದಿಕೆರಿ ಸಹಕಾರಿ ಸಂಘಾಚೊ ನಿರ್ದೇಶಕ ದೇವಿ ಪ್ರಸಾದ್ ಶೆಟ್ಟಿ, ಅಲೆವೂರು ಹರೀಶ್ ಕಿಣಿ, ರವಿರಾಜ್ ಹೆಗ್ಡೆ ಕೊಡವೂರು, ಚಂದ್ರಹಾಸ್ ಶೆಟ್ಟಿ ಆನಿ ಹೇರ ಉಪಸ್ಥಿತ ಆಶಿಲೆ.

ಕಲ್ಯಾಣಪುರ: ಕಲ್ಯಾಣಪುರ ಶ್ರೀ ವೆಂಕಟರಮಣ ದೇವಳಾಂತು° ವರಸಾವಧಿ ದೀಪೋತ್ಸವ ಚಲೊ. ದೇವಾಲೆ ನಡೆಂತು° ಹಜಾರಾನಿ ಸಂಖ್ಯಾನಿ ಪಣತಿ ಲಾವನು ಅಲಂಕಾರ, ತಳಯೆ ದೀವೆಚೊ ಅಲಂಕಾರ ಉಪರಾಂತ ಪೆಂಟಾ ಉತ್ಸವ ಚಲೊ. ದೇವಾಕ ವಿಶೇಷ ಫುಲ್ಲಾ ಅಲಂಕಾರ ಆನಿ ಮಹಾಪೂಜಾ ಜಾತರಿ ಪ್ರಸಾದ ವಾಂಟಪ ಜಾಲೆ°. ಆಡಳಿತ ಮೊಕ್ತೇಸರ ಕೆ ಅನಂತಪದ್ಮನಾಭ ಕಿಣಿ ಅರ್ಚಕ ಜಯದೇವ ಭಟ್, ಗಣಪತಿ ಭಟ್, ಆಡಳಿತ ಮಂಡಳಿಚೆ ಹೇರ ಸಾಂದೆ ಆನಿ ಸಮಾಜ ಭಾಂಧವ ಉಪಸ್ಥಿತ ಆಶಿಲೆ.

ಕಲ್ಯಾಣಪುರ:  ಶ್ರೀ  ರಾಮಾಂಜೇನೆಯ ದೇವಸ್ಥಾನ ಕಲ್ಯಾಣಪುರ ದೇವಳಾಚೆ ಟ್ರಸ್ಟಾಚೆ ತರಪೇನ ನ. 6ಕ ಲಕ್ಷ ತುಳಸಿ ಅರ್ಚನ  ಆನಿ ಲಕ್ಷ  ಕುಂಕುಮಾರ್ಚನಾ ಚಲೆ.  ಅರ್ಚಕ ಶ್ರೀಕಾಂತ್ ಅವಧಾನಿ  ಹಾಂಗೆಲೆ ಮಾರ್ಗದರ್ಶನಾರಿ ಧಾರ್ಮಿಕ ಪೂಜಾ ಚಲಿ. ಕಾಶೀನಾಥ ಭಟ್, ಸೀತಾರಾಮ್ ಭಟ್, ಗಣಪತಿ ಭಟ್, ಮಹೇಶ್ ಭಟ್, ಗಣೇಶ ಭಟ್, ಶ್ರೀಕರ್ ಭಟ್, ಪವನ್ ಭಟ್  ಹಾಂಗೆಲೆ ಸಹಕಾರಾನ ಲಕ್ಷ ತುಳಸಿ ಅರ್ಚನಾ ಜಾಲಿ. ಸ್ತ್ರಿಯಾನಿ ಲಕ್ಷ ಕುಂಕುಮಾರ್ಚನಾ, ಭಜನಾ ಕಾರ್ಯಕ್ರಮ ಸಾಂಬಾಳನು ಹಾಡಲೊ.