ಉಡುಪಿ: ಹಾಂಗಾಚೆ ತೆಂಕಪೇಟೆ  ಶ್ರೀ ಲಕ್ಷ್ಮೀ ವೆಂಕಟೇಶ ದೇವಳಾಚೆ ಪರಿವಾರ ದೇವಾಂಚಿ ಪುನರ್ ಪ್ರತಿಷ್ಠಾ ವರ್ಧಂತಿ  ಮೊಹೋತ್ಸವ  ಮಾರ್ಚ 14 ಮಂಗಳವಾರ ಚಲೊ. ಶ್ರೀ ಲಕ್ಷ್ಮೀ ವೆಂಕಟೇಶ ದೇವಾಕ ವಿಶೇಷ ಅಲಂಕಾರ, ಸಕಾಳಿ ದೇವಾಲೆ ಸನ್ನಿಧಿಂತು° ಸಾಮೂಹಿಕ ಪ್ರಾಥನಾ, ಪಂಚಾಮೃತ ಅಭಿಷೇಕ, ದ್ವಾದಶ ಕಳಶಾಭಿಷೇಕ, ಸಾನ್ನಿಧ್ಯ ಹವನ, ಮಹಾಪೂಜಾ ಉಪರಾಂತ ಸಂತರ್ಪಣ ಚಲೆ. ಚೇಂಪಿ ಶ್ರೀಕಾಂತ್ ಭಟ್ ಹಾಂನಿ° ಧಾರ್ಮಿಕ ಪೂಜಾ ವಿಧಾನ ಸಂಪನ್ನ ಕೆಲೆ°. ದೇವಳಾಚೆ ಆಡಳಿತ  ಮೊಕ್ತೇಸರ ಪಿ ವಿ ಶೆಣೈ, ಅರ್ಚಕ ವಿನಾಯಕ ಭಟ್, ದಯಾಘನ್ ಭಟ್, ದೀಪಕ್ ಭಟ್, ಆಡಳಿತ ಮಂಡಳಿಚೆ ಸಾಂದೆ, ಜಿ. ಎಸ್. ಬಿ ಯುವಕ ಆನಿ ಮಹಿಳಾ ಮಂಡಳಿಚೆ ಸಾಂದೆ ಆನಿ ಹೇರ ಸಮಾಜಭಾಂದವ ಉಪಸ್ಥಿತ ಆಶಿಲೆ. 

ಪಂಡರಾಪುರ: ದೇವಾಲೊ ಅನುಗ್ರಹ, ಗುರು ಪರಂಪರೆಚೊ ಆರ್ಶೀವಾದಾನ ಭಕ್ತಲೋಕಾಂಚೆ ದೋನ ದಶಕಾಂಚೆ ಸೋಪನ ಸಾಕಾರ ಜಾತಾ ಆಸಾ ಮ್ಹಣು ಶ್ರೀ ಕಾಶೀಮಠಾಧೀಶ ಶ್ರೀಮದ್ ಸಂಯಮೀοದ್ರ ತೀರ್ಥ ಸ್ವಾಮೀಜಿ ಹಾಂನಿ° ಸಾಂಗಲೆ°. ಮಹಾರಾಷ್ಟ್ರಾಚೆ ಪಂಡರಾಪುರಾಂತು° ಕಾಶೀಮಠಾಚೆ ನೂತನ ಶಾಖಾ ಮಠಾಕ ನಿಧಿಕಲಶ ಸ್ಥಾಪನಾ ಆನಿ ವಿವಿಧ ಧಾರ್ಮಿಕ ವಿಧಿವಿಧಾನ ಕರನು, ಶಿಲಾನ್ಯಾಸ ಕರನು ತಾಂನಿ° ಆರ್ಶೀವಚನ ದಿಲೆ°. ಪ್ರಸಿದ್ಧ ಪುಣ್ಯಕ್ಷೇತ್ರ ಪಂಡರಾಪುರಾಂತು° ಶಾಖಾ ಮಠ ಸ್ಥಾಪನ ಕರಕಾ ಮ್ಹಣು ಭಕ್ತವರ್ಗ ಸಾಂಗತ ಆಯಿಲೆ°. ಚಂದ್ರಭಾಗಾ ನ್ಹಂಯಚೆ ತಡಿಯೆರಿ ಮಠಾಚೆ ನಿರ್ಮಾಣ ಜಾತಾ ಆಸಾ. ಭಜನಾ ಪ್ರಿಯ ವಿಠಲ ದೇವಾಲೆ° ಕ್ಷೇತ್ರ ಆನಿ ಭಗವಂತು ಕೃಷ್ಣಾಲೆ ಪಾದುಕಾ ಆಸಚೆ ವಿಷ್ಣುಪಾದಾ ಲಾಗಿ ಮಠ ಸ್ಥಾಪನ ಜಾವಚೆ° ಸುಯೋಗ. ಕಾಶಿಮಠಾಚೆ ಮ್ಹಾಲ್ಗಡೆ ಯತಿವರ್ಯರ ಕೇಶವೇಂದ್ರ ತೀರ್ಥ ಸ್ವಾಮೀಜಿ ಹಾಂಗೆಲೆ ಪುಣ್ಯತಿಥಿ ದೀವಸು ನವೀನ ಮಠಾಚೆ ಶಿಲಾನ್ಯಾಸ ಜಾವಚೆ° ದೇವಾಲೆ ಆನಿ ಗುರುಂಗೆಲೆ ಅನುಗ್ರಹಾನ ಸಾಧ್ಯ ಜಾಲೆ° ಮ್ಹಣು ಗುರುವರ್ಯಾನ ಸಾಂಗಲೆ°. ಪುಣ್ಯ ಕ್ಷೇತ್ರಾಂತು° ಶಾಖಾ ಮಠ ಸ್ಥಾಪನ ಜಾವಚೆ ನಿಮಿತ ಭಕ್ತ ಲೋಕಾಂಚೆ ವಾಸ್ತವ್ಯಾಕ ಅನುಕೂಲ ಜಾತಾ. ಹರಿದ್ವಾರ, ತಿರುಪತಿಂತು ಶಾಖಾಮಠ ಸ್ಥಾಪನ ಕರತನಯೀ ಆಮಗೆಲೆ ಗುರು ಶ್ರೀಮದ್ ಸುಧೀಂದ್ರ ತೀರ್ಥ ಸ್ವಾಮೀಜಿ ಹಾಂಗೆಲೆ° ಚಿಂತನಯೀ ತೆಂಚಿ ಜಾವನು ಆಶಿಲೆ°. ತಾಂಗೆಲೆ ಆರ್ಶೀವಾದಾನ ಆತ° ಪಂಡರಾಪುರಾಂತೂಯೀ ಮಠ ನಿರ್ಮಾಣ ಜಾತಾ ಆಸಾ ಮ್ಹಣು ತಾಂನಿ° ಸಾಂಗಲೆ°.
ವೇದಮಂತ್ರ ಘೋಷಾನ ಗುರುವರ್ಯಾಲೆ° ಸ್ವಾಗತ ಜಾಲೆ°. ನೂತನ ಶಾಖಾ ಮಠಾಕ ಯೋಗ್ಯ ಜಾಗೊ ಪಳಯತನಾ ಆಯಿಲೆ ದುಬಾವಾ ಬದಲ ಮಂಬೈಚೆ ದೀಪಕ್ ಭಾಸ್ಕರ್ ಶೆಣೈನ ಕಳಯಲೆಂ. ಜಗನ್ನಾಥ ಕಾಮತ್ ಹಾಂನಿ° ಸ್ವಾಗತಾಚೆ ಉತ್ರ° ಸಾಂಗಲಿ°. ರಘುವೀರ್ ಭಂಡಾರಕಾರ್, ಅಜಿತ್ ಕಾಮತ್, ಜಯಂತ್ ಪ್ರಭು, ದಿನೇಶ್ ಕಾಮತ್ ಕೋಟೇಶ್ವರ್, ರಾಜೇಶ್ ಪ್ರಭು ಎರ್ನಾಕುಲಂ, ರಮೇಶ್ ಭಂಡಾರಕಾರ್, ನಿತಿನ್ ಪ್ರಭು, ಗುರುಪ್ರಸಾದ ಕಾಮತ್ ಕಾಞಗಾಡ್, ಗಣೇಶ್ ಹೆಗ್ಡೆ ಪಂಡರಾಪುರ, ಪ್ರವೀಣ್ ಪೈ ಪಂಡರಾಪುರ, ಚೇತನ್ ಕಾಮತ್, ನರೇಶ್ ಪ್ರಭು ಆನಿ ಮಹಾರಾಷ್ಟ್ರ, ಕರ್ನಾಟಕ, ಕೇರಳ ಸಹಿತ ದೇಶಾಚೆ ಖೂಬ ಪ್ರದೇಶಾ ದಾಕೂನ ಶಿಷ್ಯ ವರ್ಗ ಉಪಸ್ಥಿತ ಆಶಿಲೆ. ಶ್ರೀ ಸುಕೃತೀಂದ್ರ ಸ್ವಾಮಿ ಸೇವಾ ಪ್ರತಿಷ್ಠಾನ ಹಾಂನಿ° ಹೋ ಕಾರ್ಯಕ್ರಮ ಆಯೋಜನ ಕೆಲೆಲೊ. ಪಂಡರಾಪುರಚೆ ಗೌಡ ಸಾರಸ್ವತ ಬ್ರಾಹ್ಮಣ ಸಮುದಾಯಾಚೆ ಲೋಕಾನ ಭಜನಾ ದಿಂಡಿ ಮೆರವಣಿಗಾ ಕೆಲಿ.

ಕೋಟೇಶ್ವರ: ಹಾಂಗಾಚೆ ಶ್ರೀ ಯಾದವೇಂದ್ರ ಆಯುರ್ವೇದ ವೈದ್ಯಶಾಲ, ಶ್ರೀ ಭುವನೇಂದ್ರ ಪಂಚಕರ್ಮ ಸೆಂಟರ್ ಹಾಂನಿ° ಮಾರ್ಚ 10 ಶುಕ್ರಾರಾ ಬಸ್ರೂರು ಶ್ರೀ ಕಾಶೀ ಮಠಾಂತು° ಸಕಾಳಿ 9.30 ದಾಕೂನ ದೋನಪಾರಾ 1.30 ತಾಂಯ ಆಯುರ್ವೇದ ಆರೋಗ್ಯ ತಪಾಸಣಾ ಸಾರ್ವಜನಿಕ ಶಿಬಿರ ಮಾಂಡೋನ ಹಾಡಲಾ. ಶ್ರೀಮದ್ ಕೇಶವೆಂದ್ರ ತೀರ್ಥ ಸ್ವಾಮೀಜಿ ಹಾಂಗೆಲೆ ಪುಣ್ಯತಿಥಿ ಪ್ರಯುಕ್ತ ಚಲಚೆ ಹ್ಯಾ ಶಿಬಿರ ಪರಮಗುರು ಶ್ರೀಮದ್ ಸುಧೀಂದ್ರ ತೀರ್ಥ ಸ್ವಾಮೀಜಿ ಆನಿ ಕಾಶೀ ಮಠಾಧಿಪತಿ ಶ್ರೀಮದ್ ಸಂಯಮೀοದ್ರ ಸ್ವಾಮೀಜಿ ಹಾಂಗೆಲೆ ಆಶೀರ್ವಾದ ಆನಿ ಆಶಯಾಕ ತಕೀತ ಹೀ ಆರೋಗ್ಯ ಸೇವಾ ಚಲತ ಆಸಾ. 46ವೆ° ಹ್ಯಾ ಫುಕಟ ಆಯುರ್ವೇದ ಆರೋಗ್ಯ ತಪಾಸಣಾ ಸಾರ್ವಜನಿಕ ಶಿಬಿರಾಚೆ ಉಪೇಗ ಸಗಟಾನ ಘೆವಕಾ ಮ್ಹಣು ಆಯೋಜಕಾನಿ ಮಾಘಣಿ ಕೆಲ್ಯಾ.