ದಾಭೋಲಿ, ಮಹಾರಾಷ್ಟ್ರ : ಕುಡಾಳ್ ದೇಶಸ್ಥ ಆದ್ಯ ಗೌಡ್ ಬ್ರಾಹ್ಮಣ ಸಮಾಜಾಚೆ ಧರ್ಮಗುರು, ದಾಭೋಲಿ ಮಠಾಧೀಶ ಶ್ರೀ ಶ್ರೀ ಪ್ರದ್ಯುಮ್ನಾನಂದ ಸ್ವಾಮಿ ಮಹರಾಜ್ (87)  ಹಾಂನಿ° ಆನೀ (ನ. 29) ನಿರ್ಯಾಣ ಪ್ರಾಪ್ತ ಕೆಲೆ°. ಶ್ರೀಮಠಾಚೆ ಪೀಠಾಧಿಪತಿ ಜಾವನು ಮಾಕ್ಷಿಚೆ 28 ವರಸ ದಾಕೂನ ಶಿಷ್ಯವರ್ಗಾಕ ಮಾರ್ಗದರ್ಶಕ,  ಪ್ರೇರಣಾಶಕ್ತಿ ಜಾವನು ಆಶಿಲೆ. ಮಠ ಪರಂಪರೆಚೆ ಆದ್ಯ ಶಂಕರಾಚರ‍್ಯ ದಾಕೂನ ಶೃಂಗೇರಿಚೆ ದ್ಹಾಂಚೆ ಯತಿ ಪ.ಪೂ. ವಿದ್ಯಾತೀರ್ಥ ಸ್ವಾಮೀಜಿ ಹಾಂಗೆಲಾಗಿ ಹಾಂನಿ° ದೀಕ್ಷಾ ಪ್ರಾಪ್ತ ಕೆಲೆಲಿ. 1745 ಇಸವಿಂತು° ಸ್ಥಾಪನ ಜಾಲೆಲೆ ದಾಭೋಲಿ ಮಠ ಪ್ರಸ್ತುತ ಕುಡಾಳ್ ದೇಶಕರ್ ಸಮಾಜಾಚೆ ಶ್ರದ್ಧಾಕೇಂದ್ರ ಜಾವನು ಆಸಾ. ಶ್ರೀ ಪ್ರದ್ಯುಮ್ನಾನಂದ ಸ್ವಾಮೀಜಿ ಹಾಂನಿ° 23ವೆ° ಮಠಾಧಿಪತಿ ಜಾವನು 1994 ಏಪ್ರಿಲ್ 29ಕ ಪೀಠಾರೋಹಣ ಕೆಲೆಲೆ°. ಗುರುವರ್ಯಾನಿ ಉಡುಪಿ, ದಕ್ಷಿಣ ಕನ್ನಡ, ಉತ್ತರ ಕನ್ನಡ, ಬೆಂಗಳೂರು, ಗೋವಾ, ಬೆಳಗಾಂವ್, ಕೊಲ್ಹಾಪುರ, ಮುಂಬಯಿಕ ಸಂಚಾರ ಕರನು ಶಿಷ್ಯ ವರ್ಗಾಕ ಆಶೀರ್ವಚನ ದಿಲೆಲೆ° ಆಸಾ. ಶ್ರೀ ಮಠಾಂತ ಸಾಬಾರ ವರಸ ದಾಕೂನ ಸ್ಥಗಿತ ಜಾಲೆಲೆ ವೇದಪಾಠ ಶಾಳಾಚೆ ಪುನರಾರಂಭ ಹಾಂನಿ° ಕೆಲಾ°. ಗೋಶಾಲೆಚಯಿ ಜಿರ್ಣೋದ್ಧಾರ ಕೆಲಾ. ಸಂಶೋಧಕಾಂಕ ಮದದ ಜಾವಚೆ ಖಾತೀರ ಸುಸಜ್ಜಿತ ಗ್ರಂಥಾಲಯಾಚೆ ಸ್ಥಾಪನಾ ಗುರುವರ್ಯಾನಿ ಕೆಲೆಲೆ° ಆಸಾ. 
2010 ಇಸವಿಂತು° ಗುರುವರ್ಯಾನಿ ಶ್ರೀ ದತ್ತಾನಂದ ಸರಸ್ವತಿ ಹಾಂಕಾ° ಸ್ವೀಕಾರ ಕೆಲೆಲೊ ಆಸಾ. ನ. 30ಕ ಸಕಾಳಿ 11 ಗಂಟೆಕ ಸ್ವಾಮೀಜಿಲೆ ವೃಂದಾವನಸ್ಥ ಪೂರ್ವ ಸಾಂಪ್ರದಾಯಿಕ ಅಂತ್ಯವಿಧಿ ಚಲತಾ ಮ್ಹಣು ಶ್ರೀ ಮಠಾಚೆ ಆಡಳಿತ ಮಂಡಳಿನ ಕಳಯಾ°. ಗುರುವರ್ಯಾಲಿ ಪುಣ್ಯ ತಿಥಿ ಮಣಿಪಾಲಚೆ ಶಿವಪಾಡಿಚೆ ಶ್ರೀ ಉಮಾಮಹೇಶ್ವರ ದೇವಳಾಂತು° ಆನೀ  ಶ್ರೀ ಮಠ ಸಂಸ್ಥಾನ ದಾಭೋಲಿಂತು° ಚಲಚೆ ಆಸಾ ಮ್ಹಣು ಕಳನು ಆಯಲಾ°.