“ಆಮಗೆಲಿ ಸಂಸ್ಕೃತಿಚೆರಿ ನಂಬಿಕಾ ದವೊರಚೆ°, ಆಮಗೆಲೆ ಮೂಳ ವಿಸರನಾಶಿ° ಆಸಚೆ° ಆನೀ ಕಷ್ಟಾರ ಆಸತನ ಮದದ ಕೆಲೆಲೆಲ್ಯಾಂಕ ವಿಸರನಾಶಿ° ಆಸಚೆ° ಮುಖ್ಯ ಆಸಾ” ಮ್ಹಣು ಲಿಂಗೊ ಇಂಡಿಯಾ ಪ್ರೈವೇಟ್ ಲಿ., ಮುಂಬಯಿ ಹಾಜೊ ಸ್ಥಾಪಕ ಮನೋಹರ ನಾಯಕ ಹಾಂನಿ° ಸಾಂಗಲಾ°. ಶ್ರೀಮದ್ ಕೇಶವೇಂದ್ರ ತೀರ್ಥ ಸ್ವಾಮಿ ಚ್ಯಾರಿಟೆಬಲ್ ಟ್ರಸ್ಟ್ ಹಾಜೆ° ವಾರ್ಷಿಕ ಕಾರ್ಯಕ್ರಮ ಉಗ್ತಾವಣ ಕರನು ತಾಂನಿ° ಅಶಿ° ಸಾಂಗಲೆ°. ಕಠಿಣ ಶ್ರಮ ಆನೀ ಪ್ರಾಮಾಣಿಕತಾ ಆಸಲ್ಯಾರಿ ಜೀವನಾಂತು° ಯಶ ಪಾವಚಾಕ ಸಾಧ್ಯ ಜಾತಾ. ಶ್ರೀಮದ್ ಸುಧೀಂದ್ರ ತೀರ್ಥ ಸ್ವಾಮೀಜಿ ಹಾಂಗೆಲಿ ಕೃಪಾ ತಾಂಗೆಲೆ ಕುಟುಂಬೆರಿ ಆಶಿಲೆ ನಿಮಿತ ತಾಂಕಾ ಯಶ ಮೆಳಾ ಮ್ಹಣುಯೀ ತಾಂನಿ° ಸಾಂಗಲೆ°. ಡಿ. 25ಕ ಉಡುಪಿಚೆ ಶ್ರೀ ಲಕ್ಷ್ಮೀ ವೆಂಕಟೇಶ ದೇವಳಾಂತು ಘಡಲೆಲೆ ಶ್ರೀಮದ್ ಕೇಶವೇಂದ್ರ ತೀರ್ಥ ಸ್ವಾಮಿ ಚ್ಯಾರಿಟೆಬಲ್ ಟ್ರಸ್ಟಾಚೆ ವಿದ್ಯಾರ್ಥಿ ವೇತನ ನಿಧಿ ಆನಿ ‘ಸ್ಪಾನ್ಸರ್ ಎ ಸ್ಟುಡೆಂಟ್’ ಕಾರ್ಯಕ್ರಮಾಚೆ ತಾಂನಿ° ಮುಖೇಲ ಸೊಯ್ರೆ ಆಶಿಲೆ. 

‘ಸ್ಪಾನ್ಸರ್ ಎ ಸ್ಟುಡೆಂಟ್’ ಕಾರ್ಯಕ್ರಮಾಚೆ ಸಕಳ 84 ಪಿ.ಯು.ಸಿ, ಡಿಗ್ರಿ, ಪ್ರೊಫೆಶನಲ್ ಕೋರ್ಸ, ಮಾಸ್ಟರ್ಸ ಡಿಗ್ರಿ ಶಿಖಚೆ ಪ್ರತಿಭಾವಂತ ವಿದ್ಯಾರ್ಥಿಯಾಂಕ ವಿದ್ಯಾರ್ಥಿ ವೇತನ ಮೆಳಾ°. ಹ್ಯಾ ಯೋಜನೆಂತ ವಿದ್ಯಾರ್ಥಿಯಾಂಕ ತಾಂಗೆಲೆ ಅರ್ಹತಾ ಆನೀ ಕುಟುಂಬೆಚೆ ಆರ್ಥಿಕ ಪರಿಸ್ಥಿತಿ ಪಳೊವನು ಅಗತ್ಯಾಕ ತಕೀತ ವಿದ್ಯಾರ್ಥಿ ವೇತನ ದಿತಾತಿ. ಹೆ° ನತಾ° ಸಾಮಾನ್ಯ ಯೋಜನೆ ಸಕಳ 160 ಎಸ್.ಎಸ್.ಎಲ್.ಸಿ, ಪಿ.ಯು.ಸಿ, ಡಿಗ್ರಿ, ಪ್ರೊಫೆಶನಲ್ ಆನೀ ಮಾಸ್ರ‍್ಸ ಶಿಖಚೆ ವಿದ್ಯಾರ್ಥಿಯಾಂಕ ಸುತಾ ಹ್ಯಾ ವಿದ್ಯಾರ್ಥಿ ವೇತನ ನಿಧಿಚೆ ಉಪೇಗ ಜಾಲಾ. 

ಶಿಕ್ಷಕ ಆನೀ ರಾಷ್ಟ್ರೀಯ ಸ್ಥರಾಚೊ ತರಬೇತುದಾರ ಕೆ. ರಾಜೇಂದ್ರ ಭಟ್ ಆನೀ ವಿಶೇಷ ಸೊಯ್ರೊ ಐ.ಐ.ಟಿ ಮದ್ರಾಸ ಹಾಜೊ ಆಲ್ಯುಮನಿ ಅಭಯ ನಾಯಕ ಹಾಂನಿ° ವಿದ್ಯಾರ್ಥಿಯಾಂಕ ಮಾರ್ಗದರ್ಶನ ದಿಲೆ°. ಟ್ರಸ್ಟಾಚೊ ಅಧ್ಯಕ್ಷ ಸಿ.ಎ. ನಂದಗೋಪಾಲ ಶೆಣೈ ಹಾಂನಿ° ಸ್ವಾಗತಾಚೆ ಉತ್ರ° ಸಾಂಗಲಿ°. ಶ್ರೀ ಲಕ್ಷ್ಮೀ ವೆಂಕಟೇಶ ದೇವಳಾಚೆ ಆಡಳಿತ ಮೋಕ್ತೆಸರ ಸಿ.ಎ. ಪಿ.ವಿ. ಶೆಣೈ ಸಮಾರಂಭಾಚೆ ಅಧ್ಯಕ್ಷ ಆಶಿಲೆ. ಟ್ರಸ್ಟಾಚೆ ಕಾರ್ಯದರ್ಶಿ ಡಾ| ಗೀರಿಷ್ ಪೈ ಕುಲ್ಯಾಡಿ ಆನೀ ಖಜಾನದಾರ ದಿನೇಶ ಶೆಣೈ ಹಾವಂಜೆ ಹಾಂನಿ° ಟ್ರಸ್ಟಾಚೆ ಕಾರ್ಯಕ್ರಮಾ ಬದಲ ಮಾಹಿತಿ ದಿಲಿ. ಶ್ರೀನಿವಾಸ ಪ್ರಭು ಯು ಆನೀ ವಿಶಾಲ ಶೆಣೈ ಹಾಂನಿ° ಸೊಯ್ರೆಲೊ ವಳಕ ಕರನು ದಿಲೊ. ಶ್ರೀನಿವಾಸ ಪ್ರಭು ಹಾಂನಿ° ಆಭಾರ ಮಾನಲೊ. ಪಲ್ಲವಿ ಭಟ್ ಹಾಂನಿ° ಸೂತ್ರ ಸಂಚಾಲನ ಕೆಲೆ°. ಎ. ಪುಂಡಲಿಕ ಕಾಮತ, ರಾಧಾಕೃಷ್ಣ ಶೆಣೈ, ಎಂ. ವಿಶ್ವನಾಥ ಭಟ್, ಬಾಲಕೃಷ್ಣ ಪ್ರಭು ಆನೀ ಶಾಂತರಾಮ ಪೈ ಉಪಸ್ಥಿತ ಆಶಿಲೆ.