ಮಂಗಳೂರು: ಆಗಸ್ಟ್ 20, 2013 ದೀವಸ ಹತ್ಯಾ ಜಾಲೆಲೊ ವಿಚಾರವಾದಿ ಆನಿ ಸಾಮಾಜಿಕ ಕಾರ್ಯಕರ್ತ ಡಾ. ನರೇಂದ್ರ ದಾಭೋಲ್ಕರ್ ಹಾಂಗೆಲೆ ಸ್ಮರಣಾರ್ಥ ಗಾಂವಚೆ ಬಿಜೈಚೆ ಕೆಬಿಇಎ ಸಭಾಂಗಣಾοತು° ದಕ್ಷಿಣ ಕನ್ನಡ ವಿಚಾರವಾದಿಗಳ ಸಂಘ ಹಾಂನಿ° ಆಯತಾರಾ, ಆಗಸ್ಟ್ 20, 2023 ದೀವಸ ರಾಷ್ಟ್ರೀಯ ವೈಜ್ಞಾನಿಕ ಮನೋಭಾವ ದಿವಸ ಜಾವನು ಆಚರಣ ಕೆಲೊ. ನಾವಾದೀಕ ವೈದ್ಯ ಡಾ. ಬಿ. ಶ್ರೀನಿವಾಸ್ ಕಕ್ಕಿಲಾಯ ಆನಿ ಭಾರತೀಯ ವಿಚಾರವಾದಿ ಸಂಘಾοಚೆ ಒಕ್ಕೂಟಾಚೊ (ಎಫ್‌ಐಆರ್‌ಎ) ಅಧ್ಯಕ್ಷ ಪ್ರೊ. ನರೇಂದ್ರ ನಾಯಕ್ ಹಾಂನಿ° ವಿಚಾರ ಮಂಡನ ಕೆಲೆ°. ಡಾ. ಕೆ. ಎಸ್. ಮಾಧವ ರಾವ್ ಕಾರ್ಯಕ್ರಮಾಚೆ ಅಧ್ಯಕ್ಷ ಆಶಿಲೆ.

"ಆರೋಗ್ಯ ರಕ್ಷಣೆಂತು° ವೈಜ್ಞಾನಿಕ ಮನೋಭಾವ" ಹ್ಯಾ ವಿಷಯಾರ ಡಾ. ಬಿ. ಶ್ರೀನಿವಾಸ್ ಕಕ್ಕಿಲಾಯ ಉಲಯಲೆ. "ಆಧುನಿಕ ವಿಜ್ಞಾನಾನ ಅನೇಕ ಅಪಾಯಕಾರಿ ರೋಗ ಆನಿ ಸಾಂಕ್ರಾಮಿಕ ರೋಗಾಂಕ, ಕೊಟಲೆ ಆನಿ ಕ್ಷಯರೋಗಾಂಕ ಪರಿಹಾರ ಸೋದಿಲಾ. ಭಾರತಾಕ ಸ್ವಾತಂತ್ರ‍್ಯ ಮೇಳೆಲೆ ವೇಳಾರ ಶಿಶು ಮರಣ ಹರ ಹಜಾರ ಜನನಾಕ 200 ಮರಣ ಆಶಿಲಿಂತಿ. ಆಜಿ, ವೈಜ್ಞಾನಿಕ ವಿಧಾನಾಂಕ ಲಾಗೂನು, ರಾಷ್ಟ್ರೀಯ ಶಿಶು ಮರಣ ಪ್ರಮಾಣ 28 ಕ ದೇವಂಲಾ°. ಕರ್ನಾಟಕಾಂತು° ಹೆ° ಸಾಬಾರ 20 ಆಸಾ. ದಕ್ಷಿಣ ಕನ್ನಡ ಜಿಲ್ಲೆಂತು° ಹೆ° 11 ಆಸಾ. ಹೆ° ಶ್ಲಾಘನೀಯ ಪ್ರಗತಿ ಮ್ಹಣಯೆತ, ಜಾಲ್ಯಾರ ಹ್ಯಾಚ ವೇಳಾರ, ಕೇರಳಚೆ ಎರ್ನಾಕುಲಂ ಜಿಲ್ಲೆಂತು° ಶಿಶು ಮರಣ ಫಕತ 3 ಆಸಾ ಮ್ಹಳೆಲೆ° ಆಮಿ ಸಮಜೂನ ಘೆವಕಾ. ಹೆ° ಯುಎಸ್‌ಎ ತಸಲೆ ಅಭಿವೃದ್ಧಿ ಪಾವಿಲೆ ದೇಶಾಂಕ ಸಮ ಜಾವನು ಆಸಾ. ಆಮಗೆಲೆ ಜಿಲ್ಲೆಚೆ ಲೋಕಾನ ವೈಜ್ಞಾನಿಕ ಜೀವನಾಕ ಪಶಿ ಚಡ ಸಾಂಪ್ರದಾಯಿಕತಾಕ ಚಡ ಮಹತ್ವ ದಿತಾ ಆಸಚೆ° ಕಾರಣ ವೇ ಮ್ಹಣು ಆಮಿಕ ಚಿಂತೂಕಾ" ಮ್ಹಣು ತಾಣೆ ವಿಚಾರಲೆ°.
ಆಜಿ ಆಧುನಿಕ ವೈದ್ಯ ಪದ್ಧತಿ ಮೂಢನಂಬಿಕಾಚೆ ನಿಮಿತ ಸಮಾಜ ಮಾಕ್ಷಿ ಪಡೂನ ಆನಿ ಪರ್ಯಾಯ ಚಿಕಿತ್ಸಾ ಆನಿ ಸಾಂಪ್ರದಾಯಿಕ ವೈದ್ಯ ಪದ್ಧತಿಂಕ ಸರಕಾರಾಚೆ ಮದದ ಘೆವನು ನ್ಯಾಯಸಮ್ಮತ ಕರಚೆ° ಆಶೆ° ಸಾಬಾರ ವಲಯಾ ದಾಕೂನ ಸರ್ವತೋಮುಖ ಆಕ್ರಮಣ ಜಾತಾ ಆಸಾ ಮ್ಹಣು ಡಾ. ಕಕ್ಕಿಲಾಯ ಹಾಂನಿ° ಶಿಟಕಾವಣಿ ದಿಲಿ.
ಆಧುನಿಕ ವೈದ್ಯಪದ್ಧತಿಚೆ° ವಾಣಿಜ್ಯೀಕರಣ ಜಾಲಾ° ಮ್ಹಣಚಾಂತು° ಸತ್ಯ ಆಸೂಂಕ ಶಕ್ಯ ಆಸಾ, ಜಾಲ್ಯಾರ ಪರ್ಯಾಯ ಚಿಕಿತ್ಸಾ ಕ್ರಮ ವಾಪೂರಚೆ° ಹಾಕಾ ಪರಿಹಾರ ನ್ಹಹಿ°, ವೈಜ್ಞಾನಿಕ ಮನೋಭಾವನಾ ಹೋಡಗಾನ ಘೆನಾಶಿಂ ಲೋಪದೋಷ ಸೋದೂನು ಸಮ ಕರಚೆಂ ಜಾವಕಾ ಮ್ಹಣು ತಾಂನಿ° ಸಾಂಗಲೆ°. "ವೈಜ್ಞಾನಿಕ ಮನೋಭಾವ ಮ್ಹಳ್ಯಾರಿ ಸಗಟಾಂಕ ಪ್ರಶ್ನೊ ಘಾಲಚೆ°, ತುಮಗೆಲೆ ವೈದ್ಯಾಕ ಸಹಿತ" ಮ್ಹಣು ತಾಂನಿ° ಸಾಂಗಲೆ°.
ಸಾರ್ವಜನಿಕ ಆರೋಗ್ಯ ಕ್ಷೇತ್ರಾಂತ ಚಲಚೆ ಆರತಾಂಚೆ ಪ್ರವೃತ್ತಿ ಬದಲ ತಾಂನಿ° ಉಲಯಲೆ. ಮಾಕ್ಷಿಚೆ ದೋನ ದಶಕಾಂತ ಸ್ಥೂಲತಾಯ, ಉಚ್ಛ ರಕ್ತದಾಬ, ಡಾಯಾಬೇಟಿಸ್, ಚರ್ಬಿಯುಕ್ತ ಯಕೃತ್ತ ಆನಿ ಹೃದಯವಿಕಾರ ಅಶೆ° ಆಧುನಿಕ ರೋಗ ಫಾಟಲೆ ದೋನ ದಶಕಾಂತ ಚಡ ಜಾಲ್ಯಾಂತ. "ಮಾಕ್ಷಿ ದೀಸಾಂತ ದುರಬಳಪಣ ಚಡ ಆಶಿಲೆ°, ಡಾಯಾಬೇಟಿಸ್ ಶ್ರೀಮಂತಾοಚೊ ರೋಗ ಮ್ಹಣೋನ ಘೆತಲೊ, ಜಾಲ್ಯಾರ ಆಜಿ ಜೋಡಿ ಚಡ ಜಾತಾ ಅಸೂನ "ಶ್ರೀಮಂತ" ರೋಗ ಆದಾಯ ಚಡ ಆಶಿಲೆ ಲೋಕಾ ಮಧೆ° ವ್ಯಾಪಕ ಜಾವನು ವಾಡತ ಆಸಾ. ಮುಖ್ಯ ಜಾವನು ಅವೈಜ್ಞಾನಿಕ ಆಹಾರ ಪದ್ಧತಿ ಆನಿ ಗೊಡ್ಶೆ° ಆನಿ ಸಂಸ್ಕರಣ ಕೆಲೆಲೆ ಸಾಕರ ವಿಪರೀತ ಜಾವನು ಖಾವಚೆ ನಿಮಿತ ಹ್ಯಾ ಅಧುನಿಕ ರೋಗ ಯೆತಾತಿ. ಹ್ಯಾ ರೋಗಾ ದಾಕೂನ ದೂರ ಆಸೂಕಾ ಜಾಲ್ಯಾರ ಸಾಕರ, ಜಂಕ್ ಫುಡ್ ಆನಿ ಗೊಡ್ಶೆ° ಖಾಣ ಖಾವಚೆ° ಸೊಡಚೆ° ಆನಿ ಮಾಸ, ಜಳಕೆ°, ತಾಂತಿ ಆನಿ ರಾಂದೆಕಾಯಿ ಖಾವಚೆ° ಕರನು ದೀವಸಾಕ ಕನಿಷ್ಠ 30 ಮಿನೀಟ ಬ್ರಿಸ್ಕ್ ವಾಕ್ ಕರಕಾ ಮ್ಹಣು ತಾಣೆ ಸಲ್ಲಾ ದಿಲಿ.

ಉಪರಾಂತ ಉಲಯಿಲೆ ಪ್ರೊ. ನರೇಂದ್ರ ನಾಯಕ್ ಹಾಂನಿ° ವೈಜ್ಞಾನೀಕ ಮನೋಭಾವ ವಾಡೊಚಾಕ ಉಲೊ ದಿಲೊ. ವೈಜ್ಞಾನಿಕ ಮನೋಭಾವನೆಚೆ ಪ್ರಚಾರಾ ಖಾತೀರ ಪ್ರಾಣ ದಿಲೆಲೆ ಡಾ. ನರೇಂದ್ರ ದಾಭೋಲ್ಕರ್ ಹಾಂಕಾ° ತಾಂನಿಮ ಶ್ರದ್ಧಾಂಜಲಿ ಅರ್ಪಣ ಕೆಲಿ. "ಮಹಾರಾಷ್ಟ್ರಾಂತು° ಮೂಢನಂಬಿಕಾ ಆನಿ ಬ್ಲ್ಯಾಕ್ ಮ್ಯಾಜಿಕ್ ವಿರೋಧಿ ಕಾಯ್ದೊ ಹಾಡಚಾಕ ಡಾ. ನರೇಂದ್ರ ದಾಭೋಲ್ಕರ್ ಕಾರಣ ಆಶಿಲೆ ಆನಿ ಕರ್ನಾಟಕಾಂತು° ಹ್ಯಾಚ ನಮೂನ್ಯಾಚೆ ಕಾನೂನು ಯೆವಚಾಕ ಹೆ° ಮಾದರಿ ಆಸಾ. ತಾಕಾ ಜೀವಾಕ ಭಂಯ ಆಸಾ ಮ್ಹಣು ಕಳತಾನ ತಾಂನಿ° ಧೈರ್ಯಶಾಲಿ ಆಶಿಲೆ ಆನಿ ಪೋಲೀಸ್ ರಕ್ಷಣೆಚೆ ನಿರಾಕರಣ ಕೆಲೆ°. ತಾಂಗೆಲೆ ಹತ್ಯಾ ಜಾತರಿ ಆನೀ ತೀನ ವಿಚಾರವಾದಿ ಲೋಕಾಂಚೆ ಹತ್ಯಾ ಜಾಲಿ."
ವೈಜ್ಞಾನಿಕ ಮನೋಭಾವ ವಾಡೋಚಾಕ ವಿಮರ್ಶಾತ್ಮಕ ಚಿಂತನಾ ಬಹುಮುಖ್ಯ ಮ್ಹಣು ಪ್ರೊ. ನರೇಂದ್ರ ನಾಯಕ್ ಹಾಂನಿ° ಸಾಂಗಲೆ°. "ಆರತಾ°, ಕೋವಿಡ್ ಸಾಂಕ್ರಾಮಿಕಾನ ಸಾರ್ವಜನಿಕಾ ಮಧೆ° ಅವೈಜ್ಞಾನಿಕ ಮನಸ್ಥಿತಿ ವ್ಯಾಪಕ ಜಾವನು ವಾಡಯಲಿ ಆನಿ ಬಹಿರಂಗ ಜಾಲೆ."
"ಪವಾಡ ಪುರುಷಾಂಚೆ ದೀಸ ಜಾಲೆ. ಆಜಿ ಸಾರ್ವಜನಿಕಾಂಕ ಮೂರ್ಖ ಕರಪಾಕ ವೈಜ್ಞಾನಿಕ ಪರಿಭಾಷಾ ವಾಪೂರಚೆ ಅತ್ಯಾಧುನಿಕ ದೇವಮಾನವಾಂಚಿ ನವೀನ ಪೀಳಿಗಾ ಆಯಲ್ಯಾ. ತಾಂನಿ° ಪ್ರತಿಭಾವಂತ ಐಐಟಿ ಪ್ರಾಧ್ಯಾಪಕ ಆನಿ ವಿದ್ಯಾರ್ಥಿಯಾಂಕ ಸುತಾ ಮೂರ್ಖ ಕರಚಾಕ ಸಫಲ ಜಾಲ್ಯಾಂತಿ°." ಮ್ಹಣು ತಾಂನಿ° ವಿಡಿಯೋ ಪ್ರದರ್ಶನ ಕರನು ಸಾಂಗಲೆ°.

ಡಾ. ಕೆ. ಎಸ್. ಮಾಧವ್ ರಾವ್ ಹಾಂನಿ° ಅಧ್ಯಕ್ಷೀಯ ಭಾಷಣ ಕೆಲೆ°. ವಯಸ್ಕ ಲೋಕ ತಾಂಗೆಲೆ ಆಲೋಚನೆ ಬದಲ ಸ್ಥಿರ ಆಸತಾತಿ. ಬದಲಾವ ಕರಚಾಕ ಆಯಕನಾತಿ ಮ್ಹಣು ತಾಂನಿ° ಸಾಂಗಲೆ°. "ಆಮಗೆಲೆ ಭವಿಷ್ಯಾಚೊ ಭರವಸೊ ಫಕತ ಚೆರಡುವಾಂತ ಆಸಾ. ತಾಂನಿ° ಸ್ಪಂಜ ಶೆಂ ನವೀನ ಮಾಹಿತಿ ಸ್ವೀಕಾರ ಕರತಾತಿ, ಮುಕಾವಯಲೆ ಪಿಳಗಿಕ ಆಮಿ ವೈಜ್ಞಾನಿಕ ಮನೋಭಾವ ವಾಡೋಚಾಕ ಪ್ರೇರಣಾ ದಿವಕಾ, ಎಕಲೆನ ಎಕಲೆಕ ಶಿಖೊವಚೆ° ಕರಕಾ" ಮ್ಹಣು ಉಲೋ ದಿಲೊ. ವಾಸುದೇವ್ ಉಚ್ಚಿಲ್ ಹಾಂನಿ° ಸ್ವಾಗತಾಚೆ ಉತ್ರ° ಸಾಂಗಲಿ°. ಕೃಷ್ಣಪ್ಪ ಕೊಂಚಾಡಿ ಹಾಂನಿ° ಆಬಾರ ಮಾನಲೊ.