ಮುಂಬಯಿ: ಶಂಬರ ವರಸಾಚೊ ಇತಿಹಾಸ ಆಸಚೊ ಸಂಸ್ಥೊ ಜಿ. ಎಸ್. ಬಿ. ಸ್ಕಾಲರಶಿಪ್ ಲೀಗ್ ಹಾಂನಿ ಆರತಾ° ದಾನಿ ಲೋಕಾಂಚೆ ಸಹಮಿಲನ್ ಆಯೋಜನ ಕೆಲೆ°. ಲೀಗಾಚೊ ಅಧ್ಯಕ್ಷ ಎಸ್. ಎಸ್. ಭಟ್ ಹಾಂನಿ° ಗೋಕರ್ಣ ಮಠಾಧೀಶ ಶ್ರೀಮದ್ ವಿದ್ಯಾಧೀಶ ತೀರ್ಥ ಸ್ವಾಮೀಜಿ ಹಾಂಗೆಲೊ ಆನಿ ದೇವಾಲೊ ಉಡಗಾಸ ಕಾಡೂನ ಸ್ವಾಗತಾಚೆ ಉತ್ರ° ಸಾಂಗಲಿ°. ಉದ್ಯಮಿ ವಂದನಾ ಆನಿ ಶಶಿಕಾಂತ ಶ್ಯಾನಭಾಗ ಮುಖೇಲ ಸೊಯ್ರೆ ಆಶಿಲೆ. ಕಾರ್ಯದರ್ಶಿ ಗಣೇಶ ಶ್ಯಾನಭಾಗ ಹಾಂನಿ° ಸೊಯ್ರೆಲೊ ವಳಕ ಕರನು ದಿಲೊ ಆನಿ ತಾಂನಿ ಅರ್ಹ ವಿದ್ಯಾರ್ಥಿಯಾಂಕ ದಿವಚೊ ಸಹಕಾರಾಚೊ ಉಡಗಾಸ ಕಾಳೊ. ಚೇರಪರ್ಸನ ಗೀತಾ ಆರ್. ಪೈ ಹಾಂನಿ° ಲೀಗ್ ಕಶಿ° ಕಾಮ ಕರತಾ ಮ್ಹಳೆಲೆ ವಿಷಯ ಕಳಯಲೊ. ವಿದ್ಯಾರ್ಥಿ ವೇತನ ದಿವಚೆ ನದರೇನ ನವೀನ ದಾನಿ ಲೋಕ ಮುಕಾರ ಯೆತಾ ಆಸಾತಿ ಮ್ಹಣು ತೀಣೆ ಸಾಂಗಲೆ°. ದಾನಿ ಲೋಕ ಜಾವನು ಆಸಚೆ ಸತೀಷ್ ಆಚಾರ್, ಗುರುದಾಸ ಪೈ, ಕಾಂಚನ ಗಾರ್ಸೆ, ಸಂಜಯ್ ಲೊಟ್ಲಿಕರ್, ದಿನೇಶ ಕಿಣಿ, ನೀಲಕಂಠ ಶ್ಯಾನಭಾಗ, ಸಮೀರ್ ಕೊಪ್ಪಿಕಾರ್ ಹಾಂನಿ ಶುಭಾಷಯ ಪಾಟಯಲೊ. ಲೀಗ್ ಅತ್ಯುತ್ತಮ ಸೇವಾ ಕರತ ಆಸಾ, ಮುಕಲಾವಯಲೆ ದೀವಸಾಂತು° ಆನಿಕಯೀ ಚಡ ಸೇವಾ ಜಾವೊ ಮ್ಹಣು ತಾಂನಿ° ಸಾಂಗಲೆ°. ಶಶಿಕಾಂತ ಶ್ಯಾನಭಾಗ ಹಾಂನಿ° ಅರ್ಜಿ ಕಶಿ° ಪರಿಶೀಲನ ಕರತಾತಿ ಮ್ಹಣು ಕಳಯಲೆ°. ಲೀಗಾನ ಪನ್ನಾಸ ಲಾಖ ರುಪಯೊ ವಿದ್ಯಾರ್ಥಿ ವೇತನ ದಿಲಾ° ಮ್ಹಣು ತಾಣೆ ಸಾಂಗಲೆ°. ಕಾರ್ಯದರ್ಶಿ ಮಧುಕರ ಪೈನ ಆಭಾರ ಮಾನಲೊ. ಗೋಕರ್ಣ ಮಠ ಸಮಿತಿಚೊ ಅಧ್ಯಕ್ಷ ಮುಕುಂದ ಕಾಮತ, ಪ್ರಕಾಶ ಪೈ ಆನಿ ವಿನಾಯಕ ಶ್ಯಾನಭಾಗ ಉಪಸ್ಥಿತ ಆಶಿಲೆ.