ಚಾರ-ಪಾಂಚ ವರಸಾಚೆ ಮಾಕ್ಷಿ ಕೊಡಿಯಾಲ ಪಳಯಿಲೆ ಪರಗಾಂವಚೆ ಜನಾಂಕ ಆರತಾ° ಕೊಡಿಯಾಲ ಪಳಯಲೆರಿ ಕಂಠಾಳೊಸೊ ದಿಸತಾ. ಖಂಯ ಪಳಯಲ್ಯೆರಿ ಹೋಡ ಹೋಡ ಫೋಂಡ, ಜೆ.ಸಿ.ಬಿ. ಯಂತ್ರ ಆನಿ ಗಟಾರ ನಿರ್ಮಾಣ, ಫುಟಪಾತ ಕಾಮಗಾರಿಚ ದಿಸತಾ. ‘ಸ್ಮಾರ್ಟ ಸಿಟಿ’ ನಾಂವಾರ ಕೋಟ್ಯಾಂತರ ದುಡ್ವಾನ ಶಹರ ಸುಂದರ ಕರಕಾ ಜಾಲ್ಯಾರ ತಾಕಾ ಏಕ ಪ್ಲಾನ್ ಆಸುಕಾ. ಯೋಜನಾ ನಾಶಿ ಕರಚೆ ಕಾಮ ವೈಫಲ್ಯಾಕ ಕಾರಣ ಜಾತಾ. ಸದ್ಯಾ ಮಂಗಳೂರಾಚೆ ಸ್ಥಿತಿ ‘ಸ್ಮಾರ್ಟ ಸಿಟಿ’ ನಾಂವಾರಿ ದುಡು ಖಾಲಿ ಕರಚೆ ಯೆವಜಣಕಿ ಮ್ಹoಣಚೆ ಶಂಕಾ ನಾಗರಿಕಾಂಗೆಲೆ ಮನಾಂತು ಯೆವಚೆ ತಶಿ° ಜಾಲಾ. ಎಕ ಹಫ್ತ್ತೊ ಫೂಡೆ ‘ಕ್ಲಾರ್ಕ ಟವರ್’ಚೆ ಸಕಯ್ಲ ಏಕ ಬುದ್ಧಿಮಾಂದ್ಯ ಮನೀಶ ಸ್ನಾನ ಕರತಾಶಿಲೆ ತಸ್ವೀರ್ ವೈರಲ್ ಜಾಲೆ°. ಹಾಜೆ ಶೀರ್ಷಕ ಆಶ್ಯಿಲೆ ‘ಕೋಟ್ಯಾಂತರ ಖರ್ಚುನು ಬಾಂದಿಲೆ ಸ್ಮಾರಕ ಹ್ಯಾ ಕಾಮಾಕ ಉಪ್ಯೋಗ ಜಾಲೆ° !’. ಹೆ° ಆಡಳಿತಶಾಹಿಂಕ ವ್ಯಂಗ್ಯ ಕರಚೆ ತಸಲೆ ಉತ್ತರ ಜಾಲ್ತರಿ ಹಾಜೆ ಮಾಕ್ಷಿ ಲೋಕಾಲೆ ಸಾಮಾಜಿಕ ಹುಸ್ಕೊ ದಿಸತಾ. ಏಕ ಸ್ಮಾರಕ ಬಾಂದೂನು ತಾಜೆ ನಿರ್ವಹಣ ಸಮ ಕರನಾ ಜಾಲೆರಿ ಹಂಪೆ ಶಹರಾಕ ‘ಹಾಳು ಕೊಂಪೆ’ ಮ್ಹಣಚೆ ಅಪಯಶ ಆಯಿಲೆ ತಶಿ ಕೊಡಿಯಾಲ ಶಹರಾಕ ವಾಯ್ಟ ನಾಂವ ಯೆವಚಾಕ ನಾ. 
ಎ.ಬಿ.ಶೆಟ್ಟಿ ಸರ್ಕಲಾ ಲಾಗಿ ಸಂಚಾರ ವ್ಯವಸ್ಥಾ ಸಮ ಕರಚಾಕ ಗಮನ ದಿವಕಾ. ಟೌನಹಾಲಾಚೆ ಆಜುಬಾಜುನ ಪಾದಾಚಾರಿ ಮಾರ್ಗಾರಿ ಲೊಕಾಂಕ ಭೊಂವಚಾಕ ಸಮ ವ್ಯವಸ್ಥಾ ನಾ. ಸೆಂಟ್ರಲ್ ರೈಲ್ವೆ ಸ್ಟೇಶನಾಕ ರಸ್ತೊ ಪಾರ ಕರನು ವಚ್ಚಾಕ ತ್ರಾಸ ಜಾತ್ತಾ ಆಸಾ. ಲೇಡಿಗೋಶನ್ ಆಸ್ಪತ್ರೆಚೆ ಲಾಗಿಚೆ ವಾತಾವರಣ ಧೂಳಾನ ಭರಿಲೆ ಉರತಾ. ನೆಹರೂ ಮೈದಾನ ನಿರ್ವಹಣಾ ನಾಶಿ ಪಾಳು ಪಡಲ್ಯಾ. ಬಂದರ ಆಲ್ತಾ-ಪಾಲ್ತಾ ವಾಹನ ವಚ್ಚಾಕ ರಸ್ತೊ ನಾ. 
ಸೊದ್ದತ ಗೆಲ್ಲೆರ ಅಸಲೆ ಹಲವಾರು ನ್ಯೂನ್ಯತಾ ಮೆಳತಾ. ಹೆ° ಒಟ್ಟೂ ಸಮ ಕರನು ‘ಸ್ಮಾರ್ಟ ಸಿಟಿ’ ಯೋಜನಾ ನಾಂವಾಕ ತಕೀತ ಸ್ಮಾರ್ಟ’ ಜಾವೊ.