ಮಂಗಳೂರು: ದೊರ್ಕೆಲೆ° ಲಂಡನ್ ಕೊಡಿಯಾಲಾಂತು° ಹ್ಯಾ ವರಸ (2022) ದೋನ ಪಾವಟಿ ರಥೋತ್ಸವು ಚಲಚೊ ಆಸಾ ಮ್ಹಣು ಆರತಾ° ಸೋಶಿಯಲ್ ಮಿಡಿಯಾರಿ ಗಾಬು ಜಾಲೊ ಆನೀ ಖೂಬ ಲೋಕಾನ ತೆ° ವಯಿ ಮ್ಹಣು ನಂಬುಗುಚೆ° ಜಾಲೆ°. ಥೊಡೆ ಜಾಂಟೆ ಲೋಕಾನ ತಶಿ° ಜಾವಚಾಕ ಸಾಧ್ಯ ನಾ, ದೋನ ಪಾವಟಿ ರಥೋತ್ಸವ ಕರಚೆ ರಿವಾಜ ನಾ ಮ್ಹಣು ಸಾಂಗಚೆoಯಿ ಆಯಕೂಚಾಕ ಮೆಳೆ°. ಹೊ ಗೊಂದೊಳು ನಾಕಾ ಮ್ಹಣು  ಮಂಗಳೂರು ಶ್ರೀ ವೆಂಕಟರಮಣ ದೇವಳಾಚೆ ತರಪೇನ ಎಕ ಸ್ಪಷ್ಟಿಕರಣ ಸೋಶಿಯಲ್ ಮಿಡಿಯಾರಿ ಫಾಯಸ್ ಜಾಲಾ°. ತಾಜೆ ಪ್ರಮಾಣೆ ಹ್ಯಾ ವರಸ ಫಕತ ಎಕ ರಥೋತ್ಸವು ಫೆ. 3 ದಾಕೂನ ಫೆ. 8, 2022 ಥಾಂಯ ಚಲಚೊ ಆಸಾ ಮ್ಹಣು ಕಳನು ಆಯಲಾ°. ಹೊ ಸಂದೇಶ ಸುತಾ ವಾಟ್ಸಪ್ ಸಂದೇಶಾಚೆ ರೂಪಾರ ಆಶಿಲ್ಯಾನ ಕೊಡಿಯಾಲ ಖಬರ ಪತ್ರಿಕೆನ ದೇವಳಾಚೊ ಮೋಕ್ತೆಸರ ಪ್ರಶಾಂತ ರಾವ್ ಹಾಂಕಾ° ಸಂಪರ್ಕ ಕರನು ಹೊ ಸಂದೇಶ ದೇವಳಾಚೆ ತರಪೆನ ಆಯಲಾವೆ ಮ್ಹಣು ಸಮ್ಜಣಗಿ ಗೆತಲಿ. ತಾಂನಿ° ಹೊ ಸಂದೇಶ ಖರೊ ಆಸಾ ಮ್ಹಣು ಸಾಂಗಲಾ°. 
ದೇವಳಾಚೆ ಕಳವಣಿಚೆ ಪ್ರಮಾಣೆ ಹ್ಯಾ ವರಸ ರಥೋತ್ಸವು ಮಾಘ ಮ್ಹಯನ್ಯಾಂತು° ಫೆ. 3 ದಾಕೂನ ಫೆ. 8 ಥಾಂಯ ಚಲಚೊ ಆಸಾ. ಹ್ಯಾ ವರಸ ದೇವಳಾಕ ನವೀನ ರಥು ಅರ್ಪಣ ಜಾವಚಾಕ ಆಸಾ ಆನಿ ತಾಜೆ ಸಮರ್ಪಣ ಜ. 21, 2022ಕ ಫಾಲ್ಗುಣ ಬಹುಳ ಅಷ್ಟಮಿ ತಿಥಿಕ ಪುನರಪ್ರತಿಷ್ಠೆಚೆ ದಶಮಾನೋತ್ಸವಾಚೆ ಸಂದರ್ಭಾರಿ ಶ್ರಿ ಕಾಶಿಮಠಾಧೀಶ ಶ್ರೀಮದ್ ಸಂಯಮೀoದ್ರ ತೀರ್ಥ ಸ್ವಾಮೀಜಿ ಹಾಂಗೆಲೆ ಉಪಸ್ಥಿತಿರಿ ಚಲಚೆ ಆಸಾ ಮ್ಹಣು ಕಳವಣಿಂತು° ಸಾಂಗಲಾ°. ದೇವಳಾಚೆ ಭಜಕಾನಿ ಹೀ ಸೂಚನಾ ಮಾನೂನ ಘೆವಕಾ ಮ್ಹಣು ಕಳವಣಿ ಸಾಂಗತಾ. ಜ. 21ಕ ಚಲಚೆ ನವೀನ ಭ್ರಹ್ಮ ರಥು ಸಮರ್ಪಣ ಕಾರ್ಯಕ್ರಮ ಫಕತ ಎಕ ವೈದಿಕ ವಿಧಿ ಜಾವನು ಆಸತಲಿ ಮ್ಹಣೂಯಿ ಕಳಯಲಾ°.