ಮಂಗಳೂರು: ಮಾಕ್ಷಿಚೆ ಚಾರ ದಶಕಾ ದಾಕೂನು ಕೊಂಕಣಿ ಭಾಸ ಆನಿ ಸಂಸ್ಕೃತಿಚಿ ಸೇವಾ ಕರನು ಆಸಚೊ ಸಂಸ್ಥೊ ಕೊಂಕಣಿ ಸಾಂಸ್ಕೃತೀಕ ಸಂಘ ಹಾಂನಿ° ಜ. 14ಕ ಹಾಂಗಾಚೆ ಕೆನರಾ ಶಾಳೆಚೆ ಶ್ರೀ ಭುವನೇಂದ್ರ ಸಭಾಂಗಣಾοತು° ಮಕರ ಸಂಕ್ರಾಂತಿ ಪ್ರಯುಕ್ತ "ಫುಲ-ಕುಂಕುಮ" ಕಾರ್ಯಕ್ರಮ ಮಾಡೋನ ಹಾಡಲೊ. ಕೊಂಕಣಿ ಸಮಾಜಾಚೆ ಸ್ತ್ರಿಯಾಂಕ ಕಾಂಕಣ ಆನಿ ತಿಳೆಉಂಡೊ ವಾಂಟೂಚೆ° ಜಾಲೆ°.

ವೇದಮೂರ್ತಿ ವಾಸುದೇವ ಭಟ್ ಹಾಂನಿ° ಮಕರ ಸಂಕ್ರಾಂತಿಚೊ ಸಂದೇಶ ದಿಲೊ. "ಮಕರಸಂಕ್ರಾಂತಿಕ ಉತತ್ತರಾಯಣ ಶುರು ಜಾತಾ. ಆಜಿ ದಾಕೂನ ದೀಸ ಹೋಡು ರಾತಿ ಸಾನಿ. ಹ್ಯಾ ದೀಸಾಂತ ಕೆಲೆಲೆ ಕಾಮ ಸಫಲ ಜಾತಾ" ಮ್ಹಣು ತಾಂನಿ° ಸಾಂಗಲೆ°.

ವೈಷ್ಣವಿ ವಿ. ಕಾಮತ ಮುಖೇಲ ಸೊಯ್ರಿಣಿ ಆಶಿಲಿಂತಿ. ಶೋಭಾ ರಮೇಶ ಶೇಟ್, ಸುಧಾ ಶೇಟ್ ಆನಿ ಸುಚಿತ್ರಾ ನಾಯಕ್ ಮಾನಾಚೆ ಸೊಯ್ರಿಣಿ ಆಶಿಲಿಂತಿ. ಸುಧಾ ಶೇಟ್ ಹಾಂನಿ° ಮಕರ ಸಂಕ್ರಾಂತಿ ಬದಲ ಎಕ ಕವಿತಾ ವಾಚನ ಕೆಲೆ°, ಸುಚಿತ್ರಾ ನಾಯಕ ಹಾಂನಿ° ಫುಲ ಕುಂಕುಮಾ ಬದಲ ವ್ಯಾಕ್ಯಾನ ಕೆಲೆ°. "ಕುಂಕುಮಾಚೊ ರಂಗ ತಾಂಬಡೊ ಆಸಾ. ತೆ° ಶಕ್ತಿಚೆ ಪ್ರತಿಕ ಆಸಾ. ಬಾಯಲ ಮನಶಾಲೆ ನಿಡಲ್ಯಾರಿ ಶಕ್ತಿಚೆ ಕೇಂದ್ರ ಆಸಾ. ಕುಂಕುಮ ಧಾರಣ ಕರಚಾನ ಸ್ತ್ರಿಯಾಂಕ ಶಕ್ತಿ ಮೇಳತಾ" ಮ್ಹಣು ತಾಂನಿ° ಸಾಂಗಲೆ°. ಹಾಂಕಾ° ಸಂಘಾಚೆ ಸಾಂದ್ಯಾನಿ ವ್ಹಂಟಿ ಭರನು ಸನ್ಮಾನ ಕೆಲೊ.

ಕೊಂಕಣಿ ಎಂ.ಎ. ಉತೀರ್ಣ ಜಾಲೆಲೆ ಚಂದ್ರಿಕಾ ಮಲ್ಯ ಹಾಂಕಾ° ಶಾಲ ಪಾಂಗರೂನ ಸನ್ಮಾನ ಜಾಲೊ.

ಸಭಾ ಕಾರ್ಯಕ್ರಮಾಚೆ ಉಪರಾಂತ, ಶ್ವೇತಾ ಕಾಮತ ಆನಿ ಮೇಘಾ ಪೈ ಹಾಂಗೆಲೆ° ಭಾವಗೀತಾ ಆನಿ ಭಕ್ತಿಗೀತಾ ಪ್ರಸ್ತುತ ಜಾಲೆ°.

ಸಂಘಾಚೊ ಅಧ್ಯಕ್ಷ ಎಂ. ದಿನೇಶ ಭಟ್ ಹಾಂನಿ° ಸ್ವಾಗತಾಚೆ ಉತ್ರ° ಸಾಂಗಲಿ°.

ಕಾರ್ಯದರ್ಶಿ ಮಮತಾ ಕಾಮತಾನ ಆಬಾರ ಮಾನಲೊ. ಎಂ. ಆರ. ಕಾಮತಾನ ಸೂತ್ರ ಸಂಚಾಲನ ಕೆಲೆ°. ಆದಲೊ ಅಧ್ಯಕ್ಷ ಕಕ್ವ ರಾಘವ ಕಾಮತ, ಖಜಾಂಚಿ ವಸಂತ ರಾವ್ ಆನಿ ಉಪಾಧ್ಯಕ್ಷ ಸವನಾಳ ಜನಾರ್ಧನ ರಾವ್ ಉಪಸ್ಥಿತ ಆಶಿಲಿಂತಿ. ಶ್ವೇತಾ ಕಾಮತಾನ ಪ್ರಾರ್ಥನಾ ಗಾಯಲಿ. ಸ್ಥಾಪಕ ಸದಸ್ಯ ಟಿ. ಆರ್. ಶೆಣೈ ಹಾಂಕಾ° ಶ್ರದ್ಧಾಂಜಲಿ ಅರ್ಪಣ ಜಾಲೆ°. ಅರ್ಣವ್ ಪ್ರಭುನ ಬೀಟ್ ಬಾಕ್ಸ್ ಪ್ರದರ್ಶನ ದಿಲೆ°, ಉಪರಾಂತ ಅರುಣ್ ಪ್ರಕಾಶ ನಾಯಕ ಹಾಂಗೆಲೆ° ನಿರ್ದೇಶನಾರಿ ಹಾಸ್ಯಮಯ ಕೊಂಕಣಿ ನಾಟ್ಕುಳೆ° "ಸಂಶಯ ಭೂತ" ಹಾಜೆ° ಪ್ರರ್ದಶನ ಜಾಲೆ°. ಪ್ರಕಾಶ ನಾಯಕ, ಪುಷ್ಪಲತಾ ಭಟ್, ವಿಶ್ವನಾಥ ಭಟ್, ಸುರೇಶ ಭಟ್, ಗಜಾನನ ಶೆಣೈ ಆನಿ ಅಮೃತಾ ಪ್ರಭು ಹಾನಿ° ನಟನ ಕೆಲೆ°.