ಮοಗಳೂರು: ಸೊಯ್ರೆಲಿ ಸೇವಾ ಆನೀ ಊಂಛ ಸ್ಥರಾಚೆ ಖಾಣ ಜೇವಣಾಕ ನಾವಾದೀಕ  ಹೋಟೆಲ್ ಓಶಿಯನ್ ಪರ್ಲ್ ಹಾಂನಿ° ಉಜಿರೆಂತು ತಾಂಗೆಲೆ ಪಾಂಚವೆ° ಶಾಖೊ ಶುಭಾರಂಬ ಕೆಲಾ. ಶ್ರೀ ಕ್ಷೇತ್ರ ಧರ್ಮಸ್ಥಳಾಚೆ ಹರ್ಷೇಂದ್ರಕುಮಾರ್ ಹಾಂನಿ° ದಿವೊ ಲಾವನು ಉದ್ಘಾಟನ ಕೆಲೆ°. "ಧರ್ಮಸ್ಥಳಾಂತು° ಎದೋಳು ಸುಸಜ್ಜಿತ ಹೋಟೆಲ್ ನಾ ಆಶಿಲೆ°. ಬರೋಡ ಶಶಿಧರ್ ಶೆಟ್ಟಿ ಆನಿ ಜಯರಾಮ್ ಬನಾನ ಹಾಂನಿ° ತೆ° ಸಾಕಾರ ಕೆಲಾ°. ಸಾಗರ ರತ್ನ ಹೋಟೆಲ° ದೇಶಭರ ಸ್ಥಪನ ಜಾಲ್ಯಾಂತಿ ಆನೀ ಓಷನ್ ಪರ್ಲ್ ಸಾಗಾರಾಂತ ಮೆಳಂಚಿ ಮೋತಿಶೆ° ಝಿಲಮಿಲತಾತಿ” ಮ್ಹಣು ತಾಂನಿ°  ಸಾಂಗಲೆ°. ಹೋಟೆಲಾಚೆ ಇಮಾರತ್ ಶಶಿಧರ್ ಶೆಟ್ಟಿ ಹಾಂನಿ° ತಾಂಗೆಲಿ ಆವಸು ಕಾಶಿ ಶೆಟ್ಟಿ ಹಾಂಗೆಲೆ ನಾವಾರಿ ನಿರ್ಮಾಣ ಕರನು ಕಾಶಿ ಪ್ಯಾಲೇಸ್ ಸುಸಜ್ಜಿತ ಹೋಟೆಲ್ ಲೋಕಾರ್ಪಣ ಕೆಲಾ°.

30 ವರಸ ದಾಕೂನ ಗುಜರಾತಾಂತು° ಕೇಟರಿಂಗ್ ಉದ್ಯಮ ಕರನು ಆಸೂನ ಗಾಂವಾοತು° ಶ್ರೀ ಕ್ಷೇತ್ರ ಧರ್ಮಸ್ಥಳಾಕ ಯೆತಲೆ ಭಕ್ತ ಲೋಕಾಲೆ ಅನುಕೂಲಾಕ  ಹೋಟೆಲ್ ಉದ್ಯಮ, ವಸತಿ ಸೌಲಭ್ಯ ಶುರು ಕೆಲಾ° ಮ್ಹಣು ತಾಂನಿ° ಸಾಂಗಲೆ°. ಓಷನ್ ಪರ್ಲ್ ಸಮೂಹ ಸಂಸ್ಥೆಚೊ ಜಯರಾಮ್ ಬನಾನ, ಆರೆಸ್ಸೆಸ್ ಮುಖೇಲಿ ಕಲ್ಲಡ್ಕ ಪ್ರಭಾಕರ್ ಭಟ್, ಬಿಜೆಪಿ ರಾಜ್ಯಾಧ್ಯಕ್ಷ ನಳಿನ್ ಕುಮಾರ್ ಕಟೀಲ್, ಹರಿಕೃಷ್ಣ ಬಂಟ್ವಾಳ್, ಮಂಗಳೂರು ಉತ್ತರ ಶಾಸಕ ಭರತ್ ಶೆಟ್ಟಿ ವೈ., ಬಂಟ್ವಾಳ ಶಾಸಕ ರಾಜೇಶ್ ನಾಯ್ಕ್, ಮೂಲ್ಕಿ ಮೂಡಬಿದ್ರೆ ಶಾಸಕ ಉಮಾನಾಥ್ ಕೋಟ್ಯಾನ್, ಆದಲೊ ಮಂತ್ರಿ ಕೃಷ್ಣ ಪಾಲೇಮಾರ್, ಆಳ್ವಾಸ್ ಪ್ರತಿಷ್ಠಾನಾಚೊ ಮೋಹನ್ ಆಳ್ವ, ವಿವೇಕ್ ಆಳ್ವ, ಓಶಿಯನ್ ಪರ್ಲ್ ಉಪ ನಿರ್ದೇಶಕ ಗಿರೀಶ್, ಪಟ್ಲ ಸತೀಶ್ ಶೆಟ್ಟಿ, ಶರತ್ ಕೃಷ್ಣ ಪಡ್ವೆಟ್ನಾಯ ಉಪಸ್ಥಿತ ಆಶಿಲೆ.

ಓಷನ್ ಪರ್ಲ್ ಊಜಿರೆ ವಿಶೇಷತಾ:

3 ಮ್ಹಾಳಿಯೆಚೆ ಐಷಾರಾಮಿ ಹೋಟೆಲಾοತು° 34 ಕೂಡ° ಆಸಾತಿ. 31 ಎಕ್ಸಿಕ್ಯೂಟಿವ್ ಸೂಟ್ ರೂಮ°, 2 ಸೂಟ್ ರೂಮ° ಆನಿ 1 ಪ್ರೆಸಿಡೆಂಟ್ ಸೂಟ್ ರೂಮ್ ಆಸಾ. ‘ಪೆಸಿಫಿಕ್' ಸಭಾಗೃಹಾಂತು° ಸಾಬಾರ 200 ಲೋಕಾನ ಬಸೂಂಕ ಜಾವಚೆ°  ಅತ್ಯಾಧುನಿಕ ಕಾನ್ಸರೆನ್ಸ್ ಹಾಲ್, ‘ಸಾಗರರತ್ನ' ಬ್ರಾಂಡ್ ಸಸ್ಯಾಹಾರಿ ರೆಸ್ಟೋರೆಂಟ್, ‘ಕೋರಲ್’ ಮಾಂಸಾಹಾರಿ ರೆಸ್ಟೋರೆಂಟ್ ಆಸಾತಿ.

ದಾವಣಗೆರೆ: ದಾವಣಗೆರೆಚೆ ಕಲಾಕುಂಚ ಸಾಂಸ್ಕøತಿಕ ಸಂಸ್ಥೆಚೊ ಅಂಗ ಸಂಸ್ಥೊ ಯಕ್ಷರಂಗ-ಯಕ್ಷಗಾನ ಸಂಸ್ಥೆಚೆ ತರಪೇನ ಗಾಂವಚೆ ಕೆ. ಬಿ. ಬಡಾವಣೆ, ಕುವೆಂಪು ರಸ್ತೊ (ಲಾಯರ್ ರಸ್ತೆ) ಹಾಂಗಾ ಆಸಚೆ ಕಲಾಕುಂಚ ದಫ್ತರಾಚೆ ಸಭಾಂಗಣಾಂತು° ನಿರಂತರ ಯಕ್ಷಗಾನ ತರಬೇತಿ ಶಿಬಿರ ಮಾಂಡೋನ ಹಾಡಲಾ° ಮ್ಹಣು ಸಾಲಿಗ್ರಾಮ ಗಣೇಶ್ ಶೆಣೈ ಹಾಂನಿ° ಕಳಯಲಾ°. ಹರ ಆಯತಾರಾ ಸಕಾಳಿ 6-30 ದಾಕೂನ 9 ಗಂಟೆ ಥಾಂಯ ಚಲಚೆ ಹ್ಯಾ ಶಿಬಿರಾಂತು° ನಾವಾದೀಕ ವೃತ್ತಿನಿರತ ಯಕ್ಷಗಾನ ಕಲಾವಿದ ಹಟ್ಟಿಯಂಗಡಿ ಆನಂದ ಶೆಟ್ಟಿ ತರಬೇತಿ ದಿತಾತಿ.

ವಯಾಚೆ ಮೀತಿ ನಾತಿಲೆ° ಚೆರಡುವಂ, ಬಾಯಲ ಮನಶ° ಆನಿ ದಾರಲ್ಯಾನಿ ಹ್ಯಾ ಶಿಬಿರಾಕ ಮೆಳಯೆತ. ಕರ್ನಾಟಕ ಕರಾವಳಿ ಜಿಲ್ಲೆಚಿ ವಿಶ್ವ ವಿಖ್ಯಾತ ಆರಾಧಾನಾ ಕಲಾ ಯಕ್ಷಗಾನಾಕ ವಾಣಿಜ್ಯ ನಗರಿ ದಾವಣಗೆರೆಂತು° ಪ್ರಸ್ತುತ ಕರನು ನಾವಾದೀಕ ಕರಚೊ ಉದ್ಧೇಶ ಹ್ಯಾ ಶಿಬಿರಾಚೊ ಜಾವನು ಆಸಾ ಮ್ಹಣು  ಸಂಸ್ಥೆಚೊ ಅಧ್ಯಕ್ಷ ಮಲ್ಯಾಡಿ ಪ್ರಭಾಕರ ಶೆಟ್ಟಿ ಹಾಂನಿ° ಕಳಯಲಾ°.  

ಚಡತೆ ಮಾಹಿತಿಕ ಖಜಾಂಚಿ ನೀಲಾವರ ಭಾಸ್ಕರ ನಾಯಕ್ 9449374300, ಶಿಬಿರಾಚೊ ಸಂಚಾಲಕ ಪ್ರದೀಪ್ ಕಾರಂತ್ 9481181446, 9448028218 ಹಾಂಕಾ° ಸಮಪರ್ಕ ಕರಯೆತ.

ಪ್ಲಾಸ್ಟಿಕ್ ತ್ಯಾಜ್ಯ ಸಮಸ್ಯಾ ಅತ್ಯಂತ ಗಂಭೀರ ಜಾಲ್ಯಾ ಆನಿ ದಿಸಾನ ದೀಸ ಪ್ಲಾಸ್ಟಿಕ್ ಎಕ ಪ್ರಮುಖ ದುಬಾವಾಚೊ ವಿಷಯ ಜಾವನು ತಾಜೆ° ತ್ಯಾಜ್ಯಾಚೆ ಅವೈಜ್ಞಾನಿಕ ನಿರ್ವಹಣೆಚೆ ನಿಮಿತ ಜೀವರಾಶಿಕ ಮಾರಕ ಜಾತಾ ಆಸಾ. ಅವಿಭಜಿತ ದಕ್ಷಿಣ ಕನ್ನಡ ಜಿಲ್ಲೆಚೆ ಸಾಗರಾಂತ ಮೇಳತ ಆಸಚೆ ಪ್ಲಾಸ್ಟಿಕ್ ತ್ಯಾಜ್ಯ ಸಮುದ್ರ ಸಂಪತ್ತ ವಾಯಟ ಕರತ ಆಸಾ. ಹ್ಯಾ ದುಬಾವಾಕ ಪರಿಹಾರ ಸೋದುಚೆ ನದರೇನ ಗಾಂವಾοತು° ಘನತ್ಯಾಜ್ಯ ನಿರ್ವಹಣಾ ಕರಚೆ ಸ್ಟಾರ್ಟಪ್ ಮಂಗಳ ರಿಸೋರ್ಸ್ ಮ್ಯಾನೇಜ್ಮೆಂಟ್ ಆನಿ ಅಮೆರಿಕಾಚೆ ರಿಪರ್ಪಸ್ ಗ್ಲೋಬ್ ಸಂಸ್ಥೆಚೆ ಸಾಂಗತ ಪ್ಲಾಸ್ಟಿಕ್ ತ್ಯಾಜ್ಯ ನಿರ್ವಹಣಾ ಬದಲ ಕರಾರ ಜಾಲ್ಯಾಂತಿ. ಆರತಾ° ಕೊಡಿಯಾಲಚೆ ಎಕ ಹೋಟೆಲಾಂತು° ಘಡಲೆಲೆ ಸರಳ ಕಾರ್ಯಕ್ರಮಾಂತು° ರಿಪರ್ಪಸ್ ಗ್ಲೋಬ್ ಸಂಸ್ಥೆಚೆ ಕಮಲ್ ರಾಜ್ ಆನಿ ಮಂಗಳ ರಿಸೋರ್ಸ್ ಮ್ಯಾನೇಜ್ಮೆಂಟ್ ಸಂಸ್ಥೆಚೆ ವ್ಯವಸ್ಥಾಪಕ ನಿರ್ದೇಶಕ ದಿಲ್ ರಾಜ್ ಆಳ್ವ ಹಾಂನಿ° ಕರಾರಾಕ ಹಸ್ತಾಕ್ಷರ ಕೆಲಿ°. ಹ್ಯಾ ವೇಳಾರಿ ರಿಪರ್ಪಸ್ ಗ್ಲೋಬ್ ಸಂಸ್ಥೆಚೆ ಇಂಪ್ಯಾಕ್ಟ್ ಮ್ಯಾನೇಜರ್ ಸ್ವೆಟ್ಲಾನಾ ಡಿಕೊಸ್ತಾ, ಫೈನಾನ್ಸ್ ವಿಭಾಗಾಚೆ ಮುಖೇಲಿ ಜೋಯಲ್ ಫೆರ್ನಾಂಡಿಸ್, ಸಂಯೋಜಕ ಅಮಿತಾ ಅಜಿತ್, ಪೂಜಾ ಮೊಯಿತ್ರಾ, ಮಂಗಳ ರಿಸೋರ್ಸ್ ಮ್ಯಾನೇಜ್ಮೆಂಟ್ ಸಂಸ್ಥೆಚೆ ಕಾರ್ಯನಿರ್ವಾಹಕ ನಿರ್ದೇಶಕ ರಂಜನ್ ಬೆಳ್ಳರ್ಪಾಡಿ, ನಿರ್ದೇಶಕ ಚಂದನ್ ಕಾಮತ್, ತರ್ಜನಿ ಸಂಸ್ಥೆಚೆ ನಿರ್ದೇಶಕ ಸಂಜಯ್ ಪ್ರಭು ಉಪಸ್ಥಿತ ಆಶಿಲೆ.