ಮೂಡುಬಿದಿರೆ: ಯುತ್ ಆಫ್ ಜಿ.ಎಸ್.ಬಿ. ತರಪೇನ ಮಂಗಳೂರಚೆ ರಥಬೀದಿ ಶ್ರೀ ವೆಂಕಟರಮಣ ದೇವಳಾಚೆ ರಾಜಾಂಗಣಾοತು° ಘಡಲೆಲೆ ಸೆಂಚುರಿ ವಾಯ್ಸ್ ಆಫ್ ಜಿ.ಎಸ್.ಬಿ. ಸೀಸನ್ 3 ಸಂಗೀತ ಸ್ಪರ್ಧೇಂತು° ಮೂಡುಬಿದಿರೆಚಿ ಸ್ತುತಿ ಎಸ್. ಪ್ರಭು ಹಿಕಾ ರನ್ನರ್ ಅಪ್ ಪ್ರಶಸ್ತಿ ಫಾವೊ ಜಾಲಾ. ಶ್ರೀ ಕಾಶೀಮಠಾಧೀಶ ಶ್ರೀಮದ್ ಸಂಯಮೀοದ್ರ ತೀರ್ಥ ಸ್ವಾಮೀಜಿ ಹಾಂಗೆಲೆ ಉಪಸ್ಥಿತಿರಿ ಚಲೆಲೆ ಫೈನಲ್ ಸ್ಪರ್ಧೇಂತು° ವಾಂಟೊ ಘೆತಿಲೆ 8 ತರನಾಟೆ ಯುವ ಕಲಾವಿದಾಂ ಪಯಕಿ ಕೊಚ್ಚಿಚೆ ಅನುಶ್ರೀ ಆರ್. ಭಟ್ ಹಿಕಾ ಪ್ರಥಮ ಸ್ಥಾನ ಪ್ರಾಪ್ತ ಜಾಲಾ°. ಪುತ್ತೂರು ನರಸಿಂಹ ನಾಯಕ, ಪಂಡಿತ್ ಉಪೇಂದ್ರ ಭಟ್ ಹಾಂನಿ° ನಿರ್ಣಯಾಕ ಆಶಿಲೆ. ವಾಂಟೊ ಘೆತಿಲೆ ಸ್ಪರ್ಧೀಕಾನಿ ಜೋಡಿಲೆ ಜನಮತಾಕ ಲಾಗೂನ ವಿಜೇತಾಂಕ ಗೌರವಾರ್ಪಣ ಜಾಲೆ°. 2021 ಸೆಪ್ಟೆಂಬರ ದಾಕೂನ ಚಲೆಲೆ ಸೀಸನ್ 3 ಸ್ಪರ್ಧೆಚೆ ಅಂತಿಮ ಚರಣಾಂತು° ಕನಕ ಕೀರ್ತನಾ ವಿಭಾಗಾಂತು° ‘ನೀ ಮಾಯೆಯೊಳಗೋ', ಆನಿ ಹಿಂದಿ ಕೀರ್ತನ ವಿಭಾಗಾಂತು° ‘ಶ್ರೀ ರಾಮಚಂದ್ರ ಕೃಪಾಳು ಭಜಮನ' ಪದ ಗಾವನು ಸ್ತುತಿ ಲೋಕಾಮೋಗಾಳ ಜಾಲಿ. ಬಿ.ಕಾಂ ಪದವೀಧರಾ ಜಾವನು ಆಸಚಿ ಸ್ತುತಿ ಎಸ್. ಪ್ರಭು ಹಿಂದುಸ್ತಾನಿ ಶಾಸ್ತ್ರೀಯ ಸಂಗೀತ ಶಿಖತಾ ಆಸಾ. ಮಂಗಳೂರಚೆ ಕಾಮತ್ ಆಂಡ್ ರಾವ್ ಸಂಸ್ಥೆοತು° ಸಿ.ಎ. ಆರ್ಟಿಕಲಶಿಪ್ ಕರತ ಆಸಚಿ ಹಿ ಮೂಡುಬಿದಿರೆಚೆ ಶ್ರೀ ವೆಂಕಟರಮಣ ಆನಿ ಶ್ರೀ ಹನುಮಂತ ದೇವಳಾಚೆ ಆಡಳಿತ ಮಂಡಳಿಚೆ ಕೋಶಾಧಿಕಾರಿ ಶಿವಾನಂದ ಪ್ರಭು, ಪುರಸಭಾ ಸದಸ್ಯಾ ಸ್ವಾತಿ ಎಸ್. ಪ್ರಭು ಹಾಂಗೆಲಿ ದ್ಹುವ ಜಾವನು ಆಸಾ.

ಮಂಗಳೂರು: ಸಾತ ವರಸ ಪ್ರಾಯೇರಿಚಿ ತಬಲಾ, ಪುಜಾ ತಾಳ, ಚಂಡೆ, ಬ್ಯಾಂಡ್, ದರ‍್ಬುಕಾ, ಹಾರ್ಮೊನಿಯಂ, ಮೃದಂಗ ವಾದನ ಕರಚೊ ಸಾಹಸ್ ನಾಯಕ, ಹಾಕಾ ಕೆನರಾ ಬ್ಯಾಂಕಾಚೆ ಫೌಂಡರ್ಸ ಬ್ರಾಂಚಾοತು° ಮಹಾ ಪ್ರಭಂದಕ ಯೋಗಿಶ ಆಚಾರ್ಯ ಹಾಂನಿ° ಸನ್ಮಾನ ಕೆಲೊ.
ಕೆನರಾ ಸಿ. ಬಿ. ಎಸ್. ಸಿ ಶಾಳೆಂತು° ದುಸ್ರೆ ಕಕ್ಷಾಚೊ ವಿದ್ಯಾರ್ಥಿ ಜಾವನು ಆಸಚೆ ಹಾಣೆ ಆಟ್ರ ಮ್ಹಯನೆ ಪ್ರಾಯೆರಿಚಿ ಪೈಂಟಾ ಡಬ್ಬೆ, ಬಾಲ್ದಿ ವಾಪರೂನ ತಬಲಾ ಮ್ಹಣು ಮಾನೂನು ವಾಜುಚೆ° ಆಶಿಲೆ ಖಂಯ. ಬ್ಯಾಂಕ ಉದ್ಯೋಗಿ ಸುಧೀರ ನಾಯಕ ಆನಿ ಗೃಹಿಣಿ ಲಕ್ಷ್ಮೀ ನಾಯಕ ಹಾಂಗೆಲೊ ಪುತು ಜಾವನು ಆಸಚೆ ಹಾಕಾ ಶೃತಿ ಆನಿ ಸ್ಮೃತಿ ಮ್ಹಳೆಲೆ ಜವಳ ಬ್ಹಯಣ್ಯೊ ಆಸಾತಿ. ಎಕ ವರಸ ಮ್ಹಣತನಾಚಿ ತಾಗೆಲೆ ಆಜ್ಜಾಲೆ ಸಾಂಗತ ತೊ ಕೊಡಿಕಲಚೆ ಜಿ. ಎಸ್. ಬಿ ಸಭಾಚೆ ಭಜನಾ ಕಾರ್ಯಕ್ರಮಾಂಕ ವತಲೊ. ಆಜ್ಜಾಲೆ ಪಾಯಾರ ಬಯಸೂನ ತಬಲಾ ವಾಜೂಚೆ° ಪಳಯತಲೊ. ಹಳೂಚಿ ತಾಣೆ ತಬಲಾ ವಾಜೂಚಾಕ ಶುರು ಕೆಲೆ°. ದೋನ ವರಸ ಪ್ರಾಯೆರಿ ತಾಕಾ ಚೌಲೋಪನಯನ ಜಾಲೆ° ಆನಿ ಇನಾಂ ರೂಪಾರಿ ತಬಲಾ ತಾಕಾ ಮೆಳೊ. ಉಪರಾಂತ ತಾಣೆ ಘರಾಕಡೆನ ಹರದೀವಸು ತಬಲಾ ವಾಜೂಚಾಕ ಶುರು ಕೆಲೆ°. ಮಾಕ್ಷಿಚೆ ಚಾರ ವರಸ ದಾಕೂನ ಮಂಗಳೂರು ಶ್ರೀ ವೆಂಕಟರಮಣ ದೇವಳಾಚೆ ವಠಾರಾಂತು° ನಾವಾದೀಕ ಜಾಲಾ. ವೀರ ವೆಂಕಟೇಶ ಭಜನಾ ಮಂಡಳಿನ ಹಾಕಾ ಖೂಬ ಪ್ರೋತ್ಸಾಹ ದಿಲೆಲೊ ಆಸಾ.
ಎದೋಳು ತಾಂಯ ಖಂಚೆಯ ನಮೂನ್ಯಾಚೆ ತಬಲಾ ಕ್ಲಾಸಾಕ ವಚನಾತಿಲೆ ಹಾಕಾ ತಬಲಾ ಕಲಾ ದೇವಾನಚೀ ದಿಲೆಲೆ ವರ ಮ್ಹಣಯೆತ. ಬಿ. ಪ್ರಶಾಂತ ನಾಯಕ ಹಾಂನಿ° ಹಾಕಾ ಭಜನ ಆನೀ ಸಂಗೀತ ಶಿಕ್ಷಣ ದಿತಾ ಆಸಾತಿ. ಭಜನ ನಂತಾ° ಹಿಂದಿ ಪದಾಂಕಯೀ ಸಾಹಸ್ ಹಾರ್ಮೋನಿಯಂ ಆನಿ ತಬಲಾ ಸಾಥ ದಿವಚೆ° ಕರತಾ.
ಆಜ್ಜೊ ಬಿ. ನಿತ್ಯಾನಂದ ಪೈ ಆನಿ ಆಜ್ಜಮ್ಮಾ ಉಷಾ ಪೈ ಹಾಂನಿ° ಸಾಹಸಾಕ ಸಾನ ಪ್ರಾಯೇರಿ ದಾಕೂನ ಆಮಗೆಲಿ ಸಂಸ್ಕೃತಿಚೆ ವಳಕ ಕರನು ದಿಲಾ°. ಪಶ್ಚಿಮ ಜಾಗರಾ ವೇಳಾರಿ ಸಕಾಳಿ ಪಾಂಚ ಗಂಟ್ಯಾಕ ಉಟಾನು ಆಜ್ಜಾ-ಆಜ್ಜಿಲೆ ಸಾಂಗತ ಹರ ದೀವಸು ದೇವಳಾಕ ವಚೂನ ತಬಲಾ ಆನಿ ಹಾರ್ಮೋನಿಯಂ ಸಾಥ ದಿವಚೆ ಹಾಕಾ ಪಳೊವನು ಆಯಿಲೆ ಸರ್ವ ಮ್ಹಾಲ್ಗಡೆ ಸಂತೋಸ ಪಾವತಾತಿ. ತ್ಯಾ ವೇಳಾರಿ ಹಾಗೆಲೆ ಪ್ರಾಯೆಚೆ ವ್ಹಿಂಗಡ ಚೆರಡುವಾನಿ ಥಂಯ ನಾ ಆಸಚೆ° ಹಾಕಾ ಪ್ರಮುಖ ಕಾರಣ ಮ್ಹಣಯೆತ.
ಹಾಗೆಲೆ ಹ್ಯಾ ವಿಶೇಷ ಗುಣ ಪಳೊವನು ಹೊ ಸನ್ಮಾನ ಹಾಕಾ ಫಾವೊ ಜಾಲಾ. ತುಳು ನಾಡಾಚೆ ತಾಸೆ ಪೆಟ್ಟಯೀ ಹಾಕಾ ಖೂಬ ಆವಡತಾ ಆನಿ ತ್ಯಾ ಶಬ್ದಾಕ ಹೊ ಬರೊ ವಾಘು ನಾಂತಾ.

ಉಡುಪಿ: ಮೂಳತ: ಬೈಂದೂರಚೆ ಕೊಲ್ಲಿ ದೇಶ ಓಮಾನಾಂತುº ಉದ್ಯೋಗ ಕರನು ಆಸಚೆ ಸಿಎ ಎನ್. ರಮಾನಂದ ಪ್ರಭು ಹಾಂಕಾº ಉಡುಪಿ ಜಿಲ್ಲಾ ‘ಕನ್ನಡ ರಾಜ್ಯೋತ್ಸವ ಪ್ರಶಸ್ತಿ’ ಲಾಭಲ್ಯಾ. ನವೆಂಬರಾಂತುº ಹಾಂಗಾಚೆ ಅಜ್ಜರಕಾಡು ಘಡಲೆಲೆ ರಾಜ್ಯಾತ್ಸವ ಸಮಾರಂಭಾಂತುº ಕನ್ನಡ ಮತ್ತು ಸಂಸ್ಕೃತಿ ಇಲಾಖೆಚೊ ಮಂತ್ರಿ ಸುನಿಲ ಕುಮಾರ ಹಾಂನಿº ಪ್ರಶಸ್ತಿ ಪ್ರಧಾನ ಕೆಲೆº. ಶಾಸಕ ರಘುಪತಿ ಭಟ್, ಕರಾವಳಿ ಅಭಿವೃದ್ಧಿ ಪ್ರಾಧಿಕಾರಾಚೆ ಅಧ್ಯಕ್ಷ ಮಟ್ಟಾರ ರತ್ನಾಕರ ಹೆಗ್ಡೆ ಆನಿ ಹೇರ ಉಪಸ್ಥಿತ ಆಶಿಲೆ. ಶೇತಗಾರ ಕುಟುಂಬಾಂತುº ಪ್ರಭುಕೇರಿ ನಾಯ್ಕನಕಟ್ಟೆ ಹಾಂಗಾ ಹಾಂಗೆಲೊ ಜಲ್ಮ ಜಾಲೊ. ಪ್ರಾಥಮಿಕ ಶಿಕ್ಷಣ ನಾಯ್ಕನಕಟ್ಟೆಂತುº, ಪ್ರೌಢ ಶಿಕ್ಷಣ ಖಂಬದಕೋಣೆಂತುº, ಪದವಿಪೂರ್ವ ಶಿಕ್ಷಣ ಉಪ್ಪುಂದಾಂತುº ಆನಿ ಬಿ.ಕಾಂ ಶಿಕ್ಷಣ ಬೈದೂರಾಂತುº ಕೆಲೆಲೆº. ಉಪರಾಂತ ಸಿ.ಎ. ಕರಚಾಕ ತಾಂನಿº ಬೆಂಗಳೂರಾಕ ಗೆಲೆಲೆ. ದೇಶಾಚೆ ವೆಗವೆಗಳೆ ಶಹರಾಂತುº ಸೇವಾ ದಿಲೆಲೆ ಹಾಂನಿº ಓಮಾನಾಕ ಗೆಲೆ. ಹೀ ಪ್ರಶಸ್ತಿ ಫಾವೊ ಜಾಲೆಲೆ ಹಾಂಕಾº ಖೂಬ ಲೋಕಾನ ಅಭಿನಂದನ ಸಾಂಗಲಾº.

ಉಡುಪಿ: ‘ಪಂಚ್ಕದಾಯಿ’ ಕೊಂಕಣಿ ಮಾಸಿಕ ಪತ್ರಿಕೆಚೊ ಆದಲೊ ಸಂಪಾದಕ ಬಂಟ್ವಾಳ ಶಾಂತರಾಮ ಬಾಳಿಗಾ ಹಾಂಕಾ° ಆಜಿ(ಡಿ. 18) ಉಡುಪಾಚೆ ಅದಮಾರು ಮಠಾಚೆ ಶ್ರೀ ಶ್ರೀ ಈಶಪ್ರೀಯ ತೀರ್ಥ ಶ್ರೀಪಾದ ಸ್ವಾಮೀಜಿ ಹಾಂನಿ° ತಾಂಗೆಲೆ ಪ್ರಥಮ ಪರ್ಯಾಯಾಚೆ ದೀಕ್ಷಾ ವಿಶ್ವಾರ್ಪಣ ಕಾರ್ಯಕ್ರಮಾಂತು° ‘ಸಾಹಿತ್ಯ ಶೇಖರಾ’ ಪ್ರಶಸ್ತಿ ದೀವನು ಸಮ್ಮಾನ ಕೆಲೊ. ಉಡುಪಿ ಮಠಾಚೆ ರಾಜಾಂಗಣಾoತು° ಘಡಲೆಲೆ ಹ್ಯಾ ಕಾರ್ಯಕ್ರಮಾಂತು° ಶ್ರೀ ಕಾಶೀ ಮಠಾಧೀಶ ಶ್ರೀಮದ್ ಸಂಯಮೀoದ್ರ ತೀರ್ಥ ಸ್ವಾಮೀಜಿ ಉಪಸ್ಥಿತ ಆಶಿಲೆ. 
ಕಲ್ಯಾಣಪುರಚೆ ದೇವಾದಿನ ಕೃಷ್ಣ ಬಾಳಿಗಾ ಆನೀ ದೇವಾದಿನ ರಮಾ ಬಾಳಿಗಾ ಹಾಂಗೆಲೊ ಪೂತು ಜಾವನು ಆಸಚೆ ಬಿ. ಶಾಂತರಾಮ ಬಾಳಿಗಾ ಹಾಂಗೆಲೆ° ಮೂಳಾವೆ ಶಿಕ್ಷಣ ಬಂಟ್ವಾಳಚೆ ಎಸ್. ವಿ. ಎಸ್ ಪ್ರೌಡ ಶಾಳೆಂತು° ಜಾಲೆಲೆ°. ಉಪರಾಂತ ಚಾಳಿಸ ವರಸ° ಹಾಂನಿ° ಅಂಚೆ-ತoತಿ ಇಲಾಖೆಂತು° ಸೇವಾ ದಿವನು ನಿವೃತ್ತ ಜಾತರಿ ‘ಪಂಚ್ಕದಾಯಿ’ ಕೊಂಕಣಿ ಮಾಸಿಕ ಪತ್ರಿಕೆಚೆ ಸಂಪಾದಕ ಜಾಲೆ. ಕನ್ನಡ – ಕೊಂಕಣಿ, ಕನ್ನಡ – ಇಂಗ್ಲಿಷ್, ಇಂಗ್ಲಿಷ್ – ಕೊಂಕಣಿ ಅಣಕಾರಾಂತು° ಪಂಡಿತ ಆಶಿಲೆ ಹಾಂನಿ° ಖೂಬ ಲೇಖನ° ಆನೀ ಪುಸ್ತಕ° ಅಣಕಾರ ಕರನು ಪ್ರಕಟ ಕೆಲೆಲೆ° ಆಸಾ. ಸ್ವತ: ಗೀತ ರಚನ ಕರನು ಸಂಗೀತ ಸಂಯೋಜನ ಕರತಲೆ ಹಾಂನಿ° ಸಾಬಾರ ಕ್ಯಾಸೆಟ° ಫಾಯಸ ಕೆಲ್ಯಾಂತಿ. ಉಡುಪಾಂತು° ಘಡಲೆಲೆ ಪುರಂದರದಾಸ ನಿರ್ವಾಣ ಚತುಶತಮಾನ ಸಂಭ್ರಮಾಚೆ ವೇಳಾರಿ ‘ಪುರಂದರದಾಸರು’ ಮ್ಹಳೆಲೆ ಗೀತ ನಾಟಕ ರಚನ ಕರನು ಸ್ವತ: ಪುರಂದರದಾಸಲೆ ಪಾತ್ರ ಹಾಂನಿ° ನಿರ್ವಹಣ ಕೆಲೆಲೆ° ಆಸಾ. ‘ಸಚತುಶಾಖಾ ಸುಭಾಷಿತ ಗಂಗಾ’ ಆನೀ ‘ದ್ವಾದಶ ಪಂಜರಿಕಾ’ ತಸಲೆ ಕೃತಿ ಸುತಾ ರಚನ ಕೆಲೆಲೆ ಹಾಂಗೆಲೆ° ವಿದ್ವತ್ ಮನೂನ ಘೆವನು ಉಡುಪಿ ಪರ್ಯಾಯ ಸ್ವಾಮಿಜಿನ ಹಾಂಕಾ° ‘ಸಾಹಿತ್ಯ ಶೇಖರಾ’ ಪ್ರಶಸ್ತಿ ದೀವನು ಸಮ್ಮಾನ ಕೆಲಾ. ಹ್ಯಾ ಸಂದರ್ಭಾರಿ ಮಂಗಳೂರು ದಕ್ಷಿಣ ಶಾಸಕ ವೇದವ್ಯಾಸ ಕಾಮತ ಆನೀ ಉಡುಪಿ ಶಾಸಕ ರಘುಪತಿ ಭಟ್ ಉಪಸ್ಥಿತ ಆಶಿಲೆ. 

2007 ಇಸವಿಂತ ಜನವರಿ ಮ್ಹಯನ್ಯಾಂತು° ಆಮಗೆಲೆ ಲೋಕಾನ ಕೊಂಕಣಿ ಭಾಸ ವಾಪರೂನ ಬರೊವಚೆ° ಆನಿ ವಾಚೂಚೆ° ಕರಕಾ ಆನೀ ಆಮಗೆಲೆ ಲೋಕಾಂಕ ಆಮಗೆಲಿ ಖಬರ ಪಾವೊಕಾ ಮ್ಹಳೆಲೆ ದೋನ ಉದ್ಧೇಶ ದವರೂನ ಶುರವಾತ ಜಾಲೆಲಿ ಕೊಡಿಯಾಲ ಖಬರ ಕೊಂಕಣಿ ಪಾಕ್ಷಿಕ ಪತ್ರಿಕೆಕ 2020 ವರಸಾಂತ ಕೊರೊನಾ ಆನಿ ಲಾಕಡೌನಾಚೆ ದುಬಾವ ಯೆತಾನಾ ಆಮಿ ಕೊಡಿಯಾಲ ಖಬರ ವೆಬ್ ಪೋರ‍್ಟಲ್ ಶುರು ಕರಚಾಕ ಯೋಜನಾ ಘಾಲಿ ಆನಿ 2021 ವರಸಾಚೆ ಅಗೋಸ್ಟ್ ಮ್ಹಯನ್ಯಾಂತು ಕಸಲೊಯಿ ಸಮಾರಂಭ ಕರನಾಶಿ° ಲೋಕಾರ್ಪಣ ಕರಚಾಕ ಸಾಧ್ಯ ಜಾಲೆ°. ಹಾಜೆ° ಶ್ರೇಯ ಸಗಟ ಆಮಗೆಲೆ ಮೋಗಾಚೆ ವಾಚಕ°, ಲೇಖಕ, ಖಬರಿ ಆನೀ ಜಾಹಿರಾತದಾರಾಂಕ ಫಾವೊ ಜಾತಾ. 
ಸಂತೋಸಾಚೊ ವಿಷಯ ಮ್ಹಳ್ಯಾರ ಆಜೀ ಚಾರ ಮ್ಹಯನ್ಯಾಚೆ ಉಪರಾಂತ ಕೊಡಿಯಾಲಖಬರ ಡಾಟ್ ಕಾಮ್ ವೆಬ್ ಪೋರ‍್ಟಲಾಕ ಯೆವಚೆ ವಾಚಕಾಲೊ ಸಂಖೊ ದಿವಸಾಕ 5000 ಜಾಲಾ. ಹ್ಯಾ ಸಂತೋಸಾಕ ಕಾರಣ ಜಾಲೆಲೆ ತುಮಕಾ ವಾಚಕಾಂಕ, ಖಬರಿ ಲೋಕಾಂಕ, ಲೇಖಕಾಂಕ ಆನೀ ಜಾಹಿರಾತದಾರಾಂಕ ಅಭಿನಂದನ ಸಾಂಗತಾತಿ. ಹ್ಯಾ ಚಾರ ಮ್ಹಯನ್ಯಾಂತು ಎದೋಳು ತಾಂಯ ಸಾಬಾರ 70,000 ಲೋಕಾನ ಹ್ಯಾ ಪೋರ‍್ಟಲಾಚೆ ಸಂದರ್ಶನ ಕೆಲಾ°. 
ಮುಕಾವಯಲೆ ದಿವಸಾಂತ ತುಮಗೆಲೆ ಸಹಕಾರಾನ ಹ್ಯಾ ಪೋರ‍್ಟಲ್ ಕೊಂಕಣಿ ಸಂಸಾರಾoತ ಉಂಚಲೆ ಸ್ಥಾನಾಕ ಪಾವೊಚೆ° ಸಂಪೂರ್ಣ ಪ್ರಯತ್ನ ಕರತಾತಿ ಮ್ಹಣು ಸಾಂಗತಾತಿ. 

ದೇವು ಬರೆ° ಕರೊ.
ವೆಂಕಟೇಶ ಬಾಳಿಗಾ ಮಾವಿನಕುರ್ವೆ
ಸಂಪಾದಕ
ಆನೀ 
ವಿದ್ಯಾ ವಿ. ಬಾಳಿಗಾ
ಸಹ ಸಂಪಾದಕಿ