ಮುಂಬಯಿ: ಉತ್ತರ ಕನ್ನಡ ಜಿಲ್ಲೆಚೆ ಹೊನ್ನಾವರ ತಾಲೂಕು ಕಾಸರಕೋಡು ಗಾಂವಚೆ ಬಿಂದುಮಾಧವ ದೇವಸ್ಥಾನ ಮೂಳಾಚೆ ಅನುಭವಸ್ಥ ನಾಟಕಕಾರ ಬಾಲಕೃಷ್ಣ ಪುರಾಣಿಕ ವಿರಚಿತ ಹಾಸ್ಯ ಪ್ರಧಾನ ಕೊಂಕಣಿ ಸಂಗೀತ ನಾಟಕ 'ಲಗ್ನಾ ಪಿಶೆ°', ಲಿಮ್ಕಾ ದಾಖಲೊ ಖ್ಯಾತಿಚೊ ದಿಗದರ್ಶಕ ಡಾ. ಚಂದ್ರಶೇಖರ್ ಶೆಣೈ ಹಾಂಗೆಲೆ ನಿರ್ದೇಶನಾರ ಆರತಾ° ಸ್ಥಾಪನಾ ಜಾಲೆಲೆ 'ಆಮ್ಮಿ ರಂಗಕರ್ಮಿ' ಕೊಂಕಣಿ ನಾಟಕ ಆನಿ ಸಾಂಸ್ಕೃತಿಕ ಕಲಾ ಸಂಸ್ಥೊ ಪ್ರಸ್ತುತ ಕರತಾ. ಹ್ಯಾ ನಾಟಕಾಚೊ ಮೂಹೂರ್ತ ಆರತಾ° ಮುಂಬೈ ದಾದರ್ (ಪೂರ್ವ) ಹಾಂಗಾ ಸಂಸ್ಥೆಚೆ ವಿಶ್ವಸ್ಥಾಲೆ ದಫ್ತರಾಮತು° ವಿಶ್ವಸ್ಥ ಉದ್ಯಮಿ ಎನ್.ಎಸ್.ಕಾಮತ್, ನಾಟಕಕಾರ ಡಾ. ಚಂದ್ರಶೇಖರ್ ಶೆಣೈ, ರಂಗನಟ, ಯಕ್ಷಗಾನ ಕಲಾವಿದ ತೋನ್ಸೆ ವೆಂಕಟೇಶ್ ಶೆಣೈ ಆನಿ ಕೊಂಕಣಿ- ಕನ್ನಡ ಹಾಸ್ಯ ರಂಗನಟ, ಕನ್ನಡಿಗ ಕಲಾವಿದರ ಪರಿಷತ್ತ ಹಾಜೊ ಉಪಾಧ್ಯಕ್ಷ ಕಮಲಾಕ್ಷ ಸರಾಫ್ ಹಾಂಗೆಲೆ ಉಪಸ್ಥಿತಿರಿ ಜುಲೈ 22ಕ ಚಲೆ°.

'ಲಗ್ನಾ ಪಿಶೆ°' ಕೊಂಕಣಿ ನಾಟಕಾಚೆ ಪ್ರಧಾನ ಭೂಮಿಕೆಂತು° ಮ್ಹಾಲ್ಗಡೊ ರಂಗ ನಟ ಕಮಲಾಕ್ಷ ಸರಾಫ್, ಹಾಸ್ಯ ರಂಗ ಕಲಾವಿದ ಹರೀಶ್ ಚಂದಾವರ, ಕೊಂಕಣಿ ಮ್ಹಾಲ್ಗಡೊ ನಟ ತೋನ್ಸೆ ವೆಂಕಟೇಶ್ ಶೆಣೈ, ತರನಾಟೆ ಕಲಾವಿದ ಜಯೇಶ್ ಪ್ರಭು, ಅರ್ಚನಾ ಭಟ್, ವೈಷ್ಣವಿ ಪ್ರಭು ಆನಿ ಹೇರ ಅಭಿನಯ ಕರತಾತಿ. ಸರ್ವ ಕಲಾವಿದ ಆನಿ ಸಂಗೀತ ನಿರ್ದೇಶಕ ಕೃಷ್ಣ ಚಂಡಾವರ ಸುತಾ ಉಪಸ್ಥಿತ ಆಶಿಲೆ. ಸಾಬಾಋ ದೋನ ತಾಸ ಸುಮಧುರ ಆನಿ ಪ್ರಾಸಬದ್ಧ ಛಂದಸ್ಸ ಆಶಚೆ° ಗಾಯನ ಆಸೂನ ಪ್ರೇಕ್ಷಕ ಲೋಕಾಂಕ ಹಾಸಚೆ° ತಶಿ° ಕರಚೆ° 'ಲಗ್ನಾ ಪಿಶೆ°' ನಾಟಕಾಂಚೆ ಖೂಬ ಪ್ರದರ್ಶನ° 'ಆಮ್ಮೀ ರಂಗಕರ್ಮಿ' ಸಂಸ್ಥೊ ಮುಂಬಯಿ, ಉಪನಗರ, ಬೆಂಗಳೂರು, ಮೈಸೂರು, ಮಂಗಳೂರು, ಉತ್ತರಕನ್ನಡಾಚಿ ಕರಾವಳಿ ಆನಿ ಹೇರ ಪ್ರದೇಶಾಂತು° ಕರಚೆ° ಆಸಾ. ನಾಟಕಾಚೆ ಪಾರ್ಶ್ವ ಗಾಯಕ ಜಾವನು ಅಮಿತ್ ಸೌಕೂರು, ಶ್ಲೋಕಾ ಚಂದಾವರ್, ಚೈತ್ರ ನೀರೊಲಿ, ಅಮೇವ ನೆರೋಲಿ, ವಿವೇಕ ಕಾಯ್ಕಿಣಿ (ತಬಲಾ) ಆಸತಲೆ. ದ್ವನಿ ಮುದ್ರಣ ಶರದ್ ಶಿರಾಲಿ ಹಾಂನಿ° ಕೆಲೆಲೆಮ ಆಸಾ. ವೇಷಭೂಶ ಶಾಂತಾರಾಮ ಮಹಾಲೆ ಹಾಂಗೆಲೆ° ಜಾವನು ಆಸಾ. ಆವಾಜಾಚೆ ಸಂಯೋಜನಾ ಸಹಿತ ನಾಟಕ ಪ್ರದರ್ಶನಾಚೆ ಸಂಯೋಜನಾಚಿ ಜಬಾಬ್ದಾರಿ ವಿಶ್ವಸ್ಥ ಸುಧಾಕರ ಭಟ್, ಎನ್.ಎಸ್.ಕಾಮತ್, ವೆಂಕಟೇಶ್ ಶೆಣೈ ಆನಿ ಕಮಲಾಕ್ಷ ಸರಾಫ್ ಹಾಂಗೆಲಿ ಜಾವನು ಆಸಾ.

ದಾವಣಗೆರೆ: ಅಧಿಕ ಶ್ರಾವಣ ಮಾಸಾಕ ಲಾಗೂನ ಹಾಂಗಾಚೆ ಶ್ರೀ ಸುಕೃತೀಂದ್ರ ಕಲಾಮಂದಿರಾοತು° ಶ್ರೀ ಗಾಯತ್ರಿ ಮಹಾಯಜ್ಞ, ಸಾಮೂಹಿಕ ಶ್ರೀ ಸತ್ಯನಾರಾಯಣ ಪೂಜಾ ಚಲಿ. ಹ್ಯಾ ವೇಳಾರ 33 ಕೋಟಿ ದೇವತೆಂಕ ಉಡಗಾಸ ಕಾಣು 33 ಸುಹಾಸಿನಿಯಾಂಕ ಶಾಸ್ತ್ರೋಕ್ತ  ಜಾವನು ಕಂಕಣ ಬಾಂದೂನ, ಹಳದಿ ಕುಂಕುಮ, ಪಾಚ್ವೆ° ಗ್ಯಾಸಾಚೆ ಕಾಂಕಣ, ಶ್ರೀ ಗಾಯತ್ರಿ ಶ್ಲೋಕಾಚೆ ಪುಸ್ತಕ, ಚೋಳಿಯೆ ಕಣ, ನಾರಲು ದಿವನು ವ್ಹಂಟಿ ಭರರು ಗೌರವಾರ್ಪಣ ಕೆಲೆಲೆ ಅವಿಸ್ಮರಣೀಯ ಘಡಣಿ ಘಡಲಿ. ಶ್ರೀ ಗಾಯತ್ರಿ ಪರಿವಾರದ ಅಧ್ಯಕ್ಷಾ ಡಾ|| ಸುಶೀಲಮ್ಮ ಹಾಂನಿ° ತಾಂಗೆಲೊ ಸಂತೋಸ ವ್ಯಕ್ತ ಕೆಲೊ.
ಕಲಾಕುಂಚ ಮಹಿಳಾ ವಿಭಾಗಾಚಿ ಸಂಸ್ಥಾಪಕಿ ಜ್ಯೋತಿ ಗಣೇಶ್ ಶೆಣೈ ಹಾಂಗೆಲೆ ಮುಖೆಲಪಣಾರಿ ಚಲೆಲೆ ಹ್ಯಾ ಕಾರ್ಯಕ್ರಮಾಂತು° ಕಲಾಕುಂಚ ಮಹಿಳಾ ವಿಭಾಗಾಚಿ ಗೌರವಾಧ್ಯಕ್ಷಾ ವಸಂತಿ ಮಂಜುನಾಥ, ಅಧ್ಯಕಾ ಹೇಮಾ ಶಾಂತಪ್ಪ ಪೂಜಾರಿ, ಕಲಾಕುಂಚ ಸಿದ್ದವೀರಪ್ಪ ಬಡಾವಣೆ ಶಾಖೆಚಿ ಅಧ್ಯಕ್ಷಾ ಲಲಿತಾ ಕಲ್ಲೇಶ್, ಮ್ಹಾಲ್ಗಡಿ ಗಾಯಿಕಾ ವಿದುಷಿ ಸಾವಿತ್ರಮ್ಮ ಶಂಕರನಾರಾಯಣ ಶಾಸ್ತ್ರಿ ಆನಿ ಹೇರ ಉಪಸ್ಥಿತ ಆಶಿಲೆ.

बदियडका: साहित्य अकाडेमी, नव डिल्ली, हांचे एक विनूतन कार्यावळ भारतीय भाशेंक प्रोत्साहन दिवचो ‘ग्रामलोक’. असलो एक कोंकणी ग्रामलोक कार्यावळ कासरगोड जिल्लेच्या बदियडका ग्रामांत साहित्य अकाडेमी आनी बदयडका ग्राम पंचायताचे जोडपाळार ‘संस्कृती भवन’ हांतु घडली. कोंकणी उलोपी लोकान आनी कोंकणी वाचप आनी बरप करचें नमूनो आनी साहित्य अकाडॆमीचो हाका मळचो फ़ाटिंब हाचे विशय मंगळूरच्या डा. कस्तुरी मोहन पै हांनी मायती दिल्ली. ‘हजार घरांत कोंकणी बरप’ पुस्तक लोकांक वांटुन घरांत कोंकणी बरपाक उत्साह दिलो.

साहित्य अकाडेमीचो कोंकणी वांगडी मेल्विन रोड्रिगस हांनी येवकार केलो. ग्राम पंचायत वांगडी डी. शंकर हे उपस्थित आशिले आनी कोंकणी भाशेच्या उदरगतीक जाय तें सहाय दितां म्हणु आश्वासन दिल्ली. तर्नाट्यानी कोंकणी कविता वाचन केलें. ग्रामाचे कांयतर ६० कोंकणी लोक उपस्थित आशिले.

ಉಡುಪಿ: ಹಾಂಗಾಚೆ ಕಲ್ಯಾಣಪುರಾಚೆ ಗಾದ್ದೆಂತು° ಜಿ.ಎಸ್.ಬಿ ಸಭಾ ಕಲ್ಯಾಣಪುರ ಹಾಂಗೆಲೆ ತರಪೇನ "ಯೆಯ್ಯಾ ಖೆಳುಯಾ° ಪಾವಸಾಡಿಂತು°" ಕಾರ್ಯಕ್ರಮ ಚಲೊ. ಚೆರಡುವಾಂಕ ಆನಿ ಹೊಡಾಂಕ ಪಾವಸಾಂತೂಚಿ ಖೇಳ ಚಲೆ. ಗಾದ್ದೆಂತು° ಖೇಳಚೊ ಅನುಭವ ಸಗಟಾಂಕ ಮೇಳಕಾ ಆನಿ ಸಗಟಾಂಕ ಪಾವಸಾಚೊ ಆನಂದ ಮೇಳಕಾ ಮ್ಹಳೆಲೊ ಉದ್ಧೇಶ ಹ್ಯಾ ಕಾರ್ಯಕ್ರಮಾಚೊ ಜಾವನು ಆಶಿಲೊ. ಶ್ರೀ ವೆಂಕಟರಮಣಾಲೊ ಉಡಗಾಸ ಕಾಣು ದಿವೊ ಲಾವನು ಕಾರ್ಯಕ್ರಮಾಚೆ ಉಗ್ತಾವಣ ಜಾಲೆ°.

1-10 ವರಸಾಚೆ ಚೆರಡುವಾಂಕ ಚೆಂಡು ಉಡೊವಚೊ ಸ್ಫರ್ಧೋ ಚಲೊ. 'ಕೆರೆ-ದಡ' ಖೇಳ ಸಗಟಾಂಕ ಆವಡಲೊ. ಬಾಲಕ/ಬಾಲಕಿಯಾಂಕ ಆನಿ ಮ್ಹಾಲ್ಗಡೆಂಕ ಗೋಣಿಚೀಲಾಚೊ ಖೇಳ, ಲೆಮನ್ ಅಂಡ್ ಸ್ಪೂನ್, ರಿವರ್ಸ್ ವಾಕಿಂಗ್, ಥ್ರೋಬಾಲ್ ಖೇಳ ಚಲೊ. ಸಗಟಾನ ಸಂತೋಸಾನ ವಾಂಟೊ ಘೆವಚೆ° ಪಳೊವಚಾಕ ಮೆಳೆ°. ಸಕಾಳಿ ಬನ್ಸ್ ಆನಿ ಕುರ್ಮಾ ಕಾಫಿನ ಫಳಾರಾನ ದಿಸಾಚೆ ಶುರುವಾತ ಜಾಲೆ°. ದೋನಪಾರ ಜೆವಣ ತಾಂಯ ವೈಯಕ್ತಿಕ ಖೇಳ ಚಲೆ.

ಜೇವಣಾಕ ಚಟ್ನಿ, ಪತ್ರಾಡೋ, ತಾಯಕಿಳೆಚೆ ಡಾಂಗರ್, ಶೀತ, ಕುಳಿತ ಸಾರು, ಗೊಡ್ಶೆ° ಆಶಿಲೆ°. ಹಾಕಾ ಚಡ ವೇಳ ದಿನಾಶಿ° ದೋನಪಾರಚೆ ಖೇಳ ಶುರು ಜಾಲೆ. ಬಾಯಲ ಮನಶಾಂಕ ಆನಿ ದಾರಲೆಂಕ ಪ್ರತ್ಯೇಕ ಹಗ್ಗಜಗ್ಗಾಟ ಖೇಳ ಚಲೊ. ಚಾರ ಪಂಗಡಾನ ಹ್ಯಾ ಖೇಳಾಂತು° ವಾಂಟೊ ಘೆತಲೊ. ಗಾದ್ದೆಚೆ ಚಿಕಲಾಂತು° ಬುಡ್ಡಿಲೆ ಸಗಟಾನ ಆನಂದಾನ ವಾಂಟೊ ಘೆತಲೊ. ಸಗಟಾ ಪಶಿ ಬರೊ ಖೇಳ ಮ್ಹಳ್ಯಾರಿ ಗಾದ್ದೆಂತು ಪುರಲೆಲೆ ಎಕ ವಿಕೇಟಾಕ ಮಾತೆ° ಲಾವನು ತಾಜೆ ಸುತ್ತು ಘಾಲನು ಪರತೂನ ತಾಂನಿ° ಶುರು ಕೆಲೆಲೆ ಜಾಗೆಕ ಪಾವಚೊ ಖೇಳು. ಗಮ್ಮತ್ ಮ್ಹಳ್ಯಾರಿ ಚಡಾವತ ಲೋಕಾಂಕ ಮಾತೆ° ಗ್ಹುವನು ರಾಬಿಲೆ ಕಡೆನ ರಾಬಚಾಕ ಜಾಯನಾಶಿಂ ತಾಂನಿ° ಭೋಗಚೆ ಕಷ್ಟ ಪಳೊವನು ವ್ಹಿಂಗಡಾಲೆ ತೊಂಡಾರ ಹಾಸು ಪಳೊವಚಾಕ ಮೆಳೆ°. ಆಕೇರಿಕ ಸಗಟಾನ ಮೇಳನು ಕೆಲೆಲೆ° ರೈನ್ ಡ್ಯಾನ್ಸ್ ಖೂಬ ಕಾಳ ಉಡಗಾಸ ದವರಚೆ° ತಶಿ° ಆಶಿಲೆ°. ಪಯಲೆ° ಪಾವಟಿ ಅಸಲೊ ಎಕ ಕಾರ್ಯಕ್ರಮ ಜಿ.ಎಸ್.ಬಿ. ಸಮಾಜಾ ತರಪೇನ ಚಲನು ಸಮಾಜಾಚೆ ಲೋಕಾ ಮಧೆಂ ಭಾಂದವ್ಯ ವಾಡೊಚೆ° ಪ್ರಯತ್ನ ಜಾಲೆ°.

ದಾವಣಗೆರೆ: ಆಮಗೆಲಿ ಸಂಸ್ಕೃತಿ, ಸಂಸ್ಕಾರ, ಸನಾತನ, ಧಾರ್ಮಿಕ, ಐತಿಹಾಸಿಕ ಪರಂಪರೆಚೊ ವೈಭವ ವಿಶ್ವವ್ಯಾಪಿ ಜಾವಚಾಕ ಕಾರಣ ಭಾರತ ದೇಶ, ತಾಂತೂοಯೀ ಆಮಗೆಲೆ ಕನ್ನಡ ನಾಡು-ನುಡಿಚೆ ಸಾಂಗತ ಆಧ್ಯಾತ್ಮಾಚಿ ಜಾಗೃತಾಯ ಆಸಾ ಕರಚೆ° ದಾವಣಗೆರೆಚೆ ಶ್ರೀ ಗಾಯತ್ರಿ ಪರಿವಾರ ಸಂಘಟನೆನ ಕೆಲೆಲೆ° ಭರಮೆಚೊ ವಿಶಯ. ಹೋಮ, ಹವನ, ಪೂಜಾ, ಪುನಸ್ಕಾರ ಕ್ರಮಬದ್ದ ವೇವಸ್ಥಿತ ಜಾವನು ಲೋಕಕಲ್ಯಾಣಾ ಕಾತಿರ ಕರನು ಪರಮಾತ್ಮಾಲೆ ಕೃಪೆಕ ಫಾವೊ ಜಾಲ್ಯಾಂತಿ ಮ್ಹಣು ಶ್ರೀ ಕ್ಷೇತ್ರ ಪುರವರ್ಗ ಹಿರೇಮಠದ ಶ್ರೀ ಶ್ರೀ ಓಂಕಾರ ಶಿವಾಚಾಚಾರ್ಯ ಮಹಾಸ್ವಾಮಿ ಹಾಂನಿ° ಆಶೀರ್ವಚನಾಂತು° ಸಾಂಗಲೆ°. ಹಾಂಗಾಚೆ ಶ್ರೀ ಸುಕೃತೀಂದ್ರ ಕಲಾಮಂದಿರಾοತು° ಶ್ರೀ ಗಾಯತ್ರಿ ಪರಿವಾರ ಹಾಂನಿ° ಮಾಡೊನ ಹಾಡಲೆಲೆ ಶ್ರೀ ಗಾಯತ್ರಿ ಯುಜ್ಞ, ಸಾಮೂಹಿಕ ಶ್ರೀ ಸತ್ಯನಾರಾಯಣ ಪೂಜಾಚೆ ಸಂದರ್ಭಾರ ತಾಂನಿ° ಅಶೆ° ಸಾಂಗಲೆ°. ಮುಖೇಲ ಸೊಯ್ರೆ ಜಾವನು ಮ್ಹಾಲ್ಗಡೆ ವೇದಶಾಸ್ತ್ರ ತಜ್ಞ, ಮ್ಹಾಲ್ಗಡೆ ಪುರೋಹಿತ ವೇ|| ಮು|| ಎಸ್. ಶಂಕರ ನಾರಾಯಣ ಶಾಸ್ತ್ರೀ, ಬೆಂಗಳೂರಚೆ ಸಿದ್ದಿ ಸಮಾಧಿ ಯೋಗ ಸಮಿತಿಚೆ ದಾವಣಗೆರೆ ಜಿಲ್ಲಾ ಮುಖ್ಯಸ್ಥ ರೇಣುಕಮ್ಮ ಮಾತಾಜೀ, ಮಾರಿಕಾಸ್ ಶ್ರೀ ವೆಂಕಟೇಶ್ವರ ಆಶ್ರಮಾಚೆ ತಿಸ್ರೆ ಪಿಳಗಿಚೆ ಸ್ವಾಮಿ ಜಾವನು ಆಸಚೆ ಸುದರ್ಶನ ದೇವೆಂದ್ರ ಅಪ್ಪಯ್ಯ ಗುರುಜೀ, ದಾವಣಗೆರೆ ಪಾಟೀದಾರ ಸಮಾಜಾಚೆ ಅಧ್ಯಕ್ಷ ಡಾ|| ರಮೇಶ್ ಪಟೇಲ್ ಉಪಸ್ಥಿತ ಆಶಿಲೆ. ಶ್ರೀ ಗಾಯತ್ರಿ ಪರಿವಾರ ಹಾಜೆ ಗೌರವಾಧ್ಯಕ್ಷ ಕೆ. ಹೆಚ್. ಮಂಜುನಾಥ್ ಹಾಂನಿ° ಪ್ರಾಸ್ತಾವಿಕ ಉತ್ರ° ಸಾಂಗಲಿ°. ಶ್ರೀ ಗಾಯತ್ರಿ ಪರಿವಾರ ಹಾಜಿ ಅಧ್ಯಕ್ಷಾ ಡಾ|| ಸುಶೀಲಮ್ಮ ಕಾರ್ಯಕ್ರಮಾಚಿ ಅಧ್ಯಕ್ಷಾ ಆಶಿಲಿ. ಶ್ರೀ ಗಾಯತ್ರಿ ಹೋಮ, ಶ್ರೀ ಸತ್ಯನಾರಾಯಣ ಸಾಮೂಹಿಕ ಪೂಜಾ ಸಂಕಲ್ಪ ಕರನು ಸೇವಾ ಕೆಲೆಲೆ ಲೋಕಾಂಕ ಶ್ರೀ ಗಾಯತ್ರಿ ದೇವಿಲಿ ಯಾದಸ್ತಿಕಾ, ಪೂಜಾ ಕಳಶ, ಶ್ರೀ ಸತ್ಯನಾರಾಯಣ ದೇವಾಲೆ ಬಿಲ್ಲಾ ದಿವಚೆ° ಜಾಲೆ°. ಬಾಲಪ್ರತಿಭಾ ಆಯಿಷ್ಯಕೃಷ್ಣ ಪ್ರಭುನ ಭಗವದ್ಗೀತೆಚೆ ಶ್ಲೋಕ ಸಾಂಗೂನ ಪ್ರಾರ್ಥನಾ ಕೆಲಿ. ಶೈಲಾ ವಿನೋದ್ ದೇವರಾಜ್ ಹಾಂನಿ° ಸ್ವಾಗತಾಚೆ ಉತ್ರಂ ಸಾಂಗಲಿ°. ಪ್ರಧಾನ ಕಾರ್ಯದರ್ಶಿ ಸಾಲಿಗ್ರಾಮ ಗಣೇಶ್ ಶೆಣೈ ಹಾಂನಿ° ಸೂತ್ರ ಸಂಚಾಲನ ಕರನು ಆಬಾರ ಮಾನಲೊ.